BAG I 35
Mba be kuʼni neloʼ mbwô mfiʼ là
Mba we lo ghù neloʼ mfiʼ. Tsemoʼ netèt tshen mfiʼ là kuʼni nekwag zebe kushun bo Yaweh Nsi. Mba mfiʼ là, be ghù netshoʼ dùʼ be tswe bwe là, lèn faʼ be faʼ là, mbèn ntshoʼ nena ndà, ke nebe ke na lo. Ngelañ be num ndoʼ mbwô mfiʼ là, a num ntsiañde ntù Yaweh Nsi, mbèn mfà taʼ mbwô yôg ben.
1. Be Ñwaʼni Nsi ywimdʼo neloʼ mbwô mfiʼ à ndùke?
Bètte ywimde Yaweh Nsi ntùm leʼde kà ndoʼ taʼ mfiʼ, mbèn ndôde ju ze Ñwaʼni Nsi tshwèt ntshob mfà num mfiʼ zʼo loʼ là. (Siañ Tànkùt 2:3-6.) Tsemoʼ ngelañ, bʼo fon ntùm Ñwaʼni Nsi ba ntshùʼ tsʼa laʼdʼo kuaʼ ju zʼo ghù là. O bét tshen ntshùʼ là, mba oaʼ loʼ mbwô mfiʼ.
Là, Ñwaʼni Nsi be ke tshob kuaʼ ju zʼa bètte o ghù là ô? Mba Yaweh Nsi aʼ nèn mbwe netshagdʼo “num manze zʼa bwô ndù o zin bwe là.” (Esaya 48:17) Ndùke? Be tun ntshùʼ Ñwaʼni Nsi ywimdʼo. Tun ntshùʼ Ñwaʼni Nsi bʼa ba nenùn ndùb tsʼa tshwèt ndaʼde nkwade Yaweh Nsi mba ze nekô là. Tsemoʼ ngelañ, bag bin num nsiañ taʼ tshô Ñwaʼni Nsi kà ndèn nkwade Yaweh Nsi mfà num taʼ ju. Be lèn nkwade Yaweh Nsi, mba bag bin aʼ loʼ ba mfiʼ tsʼa tsiañde ntù i là.
2. Ke zʼa bètte o lôde kà ndoʼ taʼ mfiʼ à?
Ñwaʼni Nsi mbe: “Ngazede nke ndôdʼà mi zin.” (Tànkùt 14:15) Yenni diag tshob à mbe, a bètte be siañde nu kuaʼ mebwô kà ndoʼ taʼ mfiʼ. O be siañde nu, bètte wul o mbe: ‘Mfiʼ me loʼ là aʼ fà fide ntù me ké? Mfiʼ me loʼ là aʼ kwag tsemoʼ à ndùke? Mbèn mbe bètte ndùb li, aʼ tsiañde ntù Yaweh Nsi ké?ʼ—Nebwôgde 32:29.
Yaweh Nsi bèn ngù netshob ju zʼa bwô mba zʼa keʼ bwô num ben nà. Be ziʼde nelèn ntshùʼ bo tun ntshùʼ tse mbèn nzin num bwe, mba bag bin aʼ ghù taʼ nzentù zʼa làn nà. Nzentù bèn nke njwimde ben neghù bade netèt numebwô bo nukebwô. (Roma 2:14, 15) Taʼ nzentù bo tswidʼé mebwô là aʼ ywimde ben neloʼ ba mbwô mfiʼ.
TSWEʼ NTUN MI
Lôde njen mba tun ntshùʼ Ñwaʼni Nsi mba nzentù ben kuʼni neywimde ben neloʼ mbwô mfiʼ là.
3. Fañ mbe Ñwaʼni Nsi tshagdʼo
Be tun ntshùʼ Ñwaʼni Nsi ywimde ben ngelañ be tshwèt ndoʼ mfiʼ lʼà ndùke? Lôde LAʼDE NETSHAÑ, mbèn mbùnde tshen mbètte li.
-
Zit ndaʼ Yaweh Nsi fà ben à?
-
Numke Yaweh Nsi fañ mbe be kuʼni neloʼ mfiʼ zebe tu à?
-
Ke zʼa fà ben num neywimde ben neloʼ mbwô mfiʼ à?
Neyen taʼ tun ntshùʼ Ñwaʼni Nsi, siañ Efésô 5:15, 16, mbèn mbùnde tshen mbètte li. Bʼo tshuʼ ngelañ num . . .
-
nesiañ Ñwaʼni Nsi njoñ léʼ fa à ndùke?
-
nebe taʼ mbwô ndu, mbwô mènnzwi, mbwô tà, mbwô mà, mbwô nshum ke mbwô ngon no à ndùke?
-
nenèn ba ntseʼde à ndùke?
4. Tswide nzentù o neloʼ mbwô mfiʼ
Ngelañ ze Ñwaʼni Nsi tshwèt mfà ntshùʼ num ju zʼa bètte o ghù là, a fiag neloʼ mbwô mfiʼ. Là, taʼ ntshùʼ ze bʼa ywimdʼo là nya ke be ô? Lôde LAʼDE NETSHAÑ, mbèn mbùnde yen bètte li.
-
Ntùm laʼde netshañ tsit tshu mvèt ben ze mènnzwi ghù num netswide nzentù i, mba num neloʼ taʼ mfiʼ zʼa tsiañde ntù Yaweh Nsi à?
Numke a ke bètte be tshob tsemoʼ mbe bo loʼ mfiʼ num zebe dùʼ à? Siañ Héber 5:14, mbèn mbùnde tshen mbètte li:
-
Bʼa fiag nebètte tsemoʼ mbe bo loʼ mfiʼ num zebe dùʼ: numke? Ke zʼa bètte be ghù zebe tu à?
-
Ke ze be a ywimdʼo netswide nzentù o kuaʼ mebwô mbèn ndoʼ mbwô mfiʼ à?
Mba taʼ mènntùn num ndôde netshañ tañlaʼ nelèn mbwô manze là, nzentù ben num njwimde ben neloʼ mbwô mfiʼ ntùm yôg
5. Kuʼni nzentù tsemoʼo
Njoñ benntùn fa keʼ be loʼ à mfiʼ ntshùʼ. Be bag bin kuʼni nzentù tsemoʼ à ndùke? Tshù mfiʼ bàa li:
Mbwe mfiʼ: Taʼ mvèt ze mènnzwi zʼa num nkô nemak se i là, nèn ntùm taʼ ndà ntseʼde dùʼ ze mbeʼyàm fètfèt tse bènnzwi num njen tsemoʼ bo mak se yub, njuʼ kebwô là.
Siañ Roma 15:1 bo 1 Korintô 10:23, 24, mbèn mbùnde tshen mbètte li:
-
Njéʼde num tshen nka Ñwaʼni Nsi li, be yen mvèt ze mènnzwi là tshoʼ neghù à ke? O kô neghù taʼ ju ndaʼndù mbe bo taʼ mènntùn ndù nzentù i tshwèt ntshèttʼé neghù yen ju là, mba oaʼ ghù à ndùke?
Mbatte mfiʼ: Taʼ mvèt lèn mbe Ñwaʼni Nsi keʼ tshùʼ nenaʼ nu me nduʼ ndaʼndù a loʼ mfiʼ nenya ke nu. Bo tsiañ i num taʼ jùa, a kum bwe njen benntùn nke nu nduʼ.
Siañ Eklésia 7:16 bo Roma 14:1, 10, mbèn mbùnde tshen mbètte li:
-
Njéʼde num tshen nka Ñwaʼni Nsi li, zit mfiʼ yen mvèt là kuʼni neloʼ à? O yen mènntùn nke ngù taʼ ju ndù nzentù o ke tshwèt mbam o ghù, mba oaʼ ghù à ndùke?
Tsit tshu a bètte o ghù kà ndoʼ mbwô mfiʼ à?
1. Bètte Yaweh Nsi a ywimdʼo neghù ju zʼa bwô là.—Yakobo 1:5.
2. Diag ntùm Ñwaʼni Nsi mba ntùm ba nkide Tu Ntseʼde ba tun Ntshùʼ tse bʼa ywimdʼo là. Bʼo bèn ntshobte bo benkristô tse bo ta num bag ywèt là.
3. Siañde njen ju ze mfiʼ zʼo loʼ là aʼ ghù num nzentù o, mba num ze tsemoʼ là.
TSEMOʼ BENNTÙN NUM NTSHOB MBE: “Bʼo ghù mba ke lo zʼo kô là, a ke tshwèt ndôde mènntùn.”
-
Numke a mbètte nelôde nkwade Nsi kà ndoʼ taʼ mfiʼ, mbèn ndôde a be ze yen mfiʼ là ke keʼ tsemoʼ benntùn à?
JU NETSHÙBE
Bag bin num ndoʼ mbwô mfiʼ à ngelañ be lôde nkwade Yaweh Nsi là, mbèn ndôde be ze mfiʼ be loʼ là aʼ ywimde tsemoʼo ke nekeʼ yub lo.
Mbètte nekwimde
-
Bʼo loʼ mfiʼ tsʼa tsiañde ntù Yaweh Nsi lʼà ndùke?
-
Bʼo tswide nzentù o à ndùke?
-
Bʼo laʼde mbʼo tshwèt nkuʼni nzentù tsemoʼ benntùn à ndùke?
DIAGE
Bʼo loʼ mfiʼ tsʼa ghù mbe yu kushun bo Yaweh Nsi ta nèn mbwe lʼà ndùke?
“Prenons des décisions qui honorent Dieu” (La Tour de Garde, 15 avril 2011)
Lôde njen mba Yaweh Nsi num ntshùade kà mfà ntag ben nà.
Taʼ mandum naʼ loʼ taʼ mfiʼ zʼa naʼ mbe ke fiag yi là: yen tshu tsʼa naʼ njwimdʼé là.
Ziʼde mbʼo kuʼni netsiañde ntù Yaweh Nsi ngelañ zʼo tshwèt ndiag neloʼ taʼ mfiʼ ze Ñwaʼni Nsi keʼ fà ntshùʼ num bwe là.
“Vous faut-il un commandement pour tout?” (La Tour de Garde, 1er décembre 2003)
