•  Lisod ikasabot nga mga titser

•  Ang imong mahimo

•  Kon unsaon nimo pagpakig-estorya sa imong titser

•  Ang giingon sa ubang batan-on

 Halos tanang estudyante nakaagig titser nga naay pagka-unfair, sobra ka demanding, o kaha maldito o maldita.

•   Si Luis, 21 anyos, nahinumdom: “Naa koy maestra sa una nga magsigeg pamalikas ug panginsulto sa iyang mga estudyante. Nagsalig tingali siya nga dili siya matangtang sa trabaho kay hapit na man siyang mo-retire.”

•   Si Melanie, 25 anyos, nahinumdom nga pirme lang siyang initan sa iyang maestra. “Ang iyang pasumangil kay lahi kuno kaayo kog relihiyon. Mas okey daw nang maanad na ko nga dili ayohog tratar sa uban.”

 Kon lisod kaayong ikasabot ang imong titser, ayawg hunahunaa nga wala na gyod kay mahimo bahin ana. Sulayi ang mosunod nga mga sugyot.

•   Sulayi nga ikaw ang mo-adjust. Lainlain ug pagdahom ang mga titser sa ilang mga estudyante. Hunahunaa kon unsay gusto sa imong titser, ug paningkamoti nga buhaton kana.

   Prinsipyo sa Bibliya: “Ang tawong maalamon maminaw ug modawat ug dugang pagtudlo.”​—Proverbio 1:5.

   “Naamgohan nako nga ako ang kinahanglang mo-adjust kon unsay gusto sa akong maestra. Mao nga naningkamot ko nga himoon ang mga butang sumala sa iyang gusto. Nakatabang to nako nga magkasinabot mi sa akong maestra.”​—Christopher.

•   Magpakitag pagtahod. Magmatinahoron dihang makig-estorya ka sa imong mga titser. Ayaw silag tubagtubaga, bisan pag para nimo sakto ka. Hinumdomi nga estudyante ka nila, ug dili nimo sila kaedad.

   Prinsipyo sa Bibliya: “Himoa ang inyong sinultihan nga kanunayng maayo, tinimplahag asin, aron mahibalo mo kon unsaon pagtubag ang matag tawo.”​—Colosas 4:6.

   “Kasagaran sa mga estudyante walay pagtahod sa ilang mga titser, mao nga kon tahoron nimo sila mas dakog purohan nga maayo pod ang ilang pagtratar nimo.”​—Ciara.

•   Sabta sila. Ang mga titser naa poy mga problema ug gikabalak-an sama nato. Busa ayaw dayon paghunahuna nga ‘Maldita gyod nâ akong titser’ o ‘Di gyod ganahan nako ang akong titser.’

   Prinsipyo sa Bibliya: “Kitang tanan masayop.”​—Santiago 3:2, footnote.

   “Dili lalim ang trabaho sa mga titser. Gawas nga magtudlo sila, daghan pa gyong mga badlongon. Maong naningkamot ko nga dili madugangan ang labad sa ulo sa akong titser.”​—Alexis.

•   Pakig-estorya sa imong ginikanan. Gusto sa imong ginikanan nga molampos ka sa pag-eskuwela. Makatambag sila kon unsay maayong himoon kon lisod ikasabot ang imong titser.

   Prinsipyo sa Bibliya: “Mapakyas ang mga plano kon dili mangonsulta.”​—Proverbio 15:22.

   “Kon bahin sa pagsulbad ug mga problema, mas eksperyensiyado ang mga ginikanan kay sa mga batan-on. Maong paminaw sa ilang tambag. Makatabang nâ nimo nga molampos.”​—Olivia.

 Dunay mga kahimtang nga kinahanglan tingali nimong isulti sa imong titser kon unsay imong gibati. Ayawg kahadlok nga makig-estorya kay dili man ka makiglalis, makig-estorya lang ka. Imo unyang makita nga dili ra diay ni lisod himoon, ug maayo hinuon ang resulta.

 Prinsipyo sa Bibliya: “Buhaton nato ang tanan aron malinawon ang atong relasyon sa uban.”​—Roma 14:19.

 “Kon morag ikaw ra pirme ang initan sa titser, pangutan-a siya kon naa ba kay nahimo nga nakapasuko niya. Basin makatabang nâ nimo nga makita kon unsay angay nimong pauswagon.”​—Juliana.

 “Mas maayong kalmado nimong isulti sa imong titser ang imong gibati sa dili pa magsugod ang klase o human sa klase, aron walay laing makadungog. Posible nga maminaw siya nimo ug makadayeg siya sa imong paagi sa pagpakig-estorya.”​—Benjamin.

 EKSPERYENSIYA

 “Ubos kaayo ang akong mga grado, ug gipasagdan ra ko sa akong titser. Gusto na kong moundang ug eskuwela kay nalisdan ko tungod niya.

 “Nagpatambag ko sa laing titser, ug iya kong giingnan: ‘Wala siyay ideya sa imong gibati, ug wala pa pod ka nakaila niya. Kinahanglan nimong ipahibalo niya nga nalisdan ka sa klase. Basin makatabang diay ka sa ubang estudyante nga nahadlok makig-estorya niya.’

 “Di gyod unta ko makig-estorya! Pero akong gihunahuna pag-ayo ang iyang gisulti, ug sakto siya. Kon gusto nako nga mabag-o ang kahimtang, kinahanglan kong makig-estorya sa akong titser.

 “Pagkasunod adlaw, giduol nako ang akong titser. Gipasalamatan nako siya sa iyang klase ug matinahoron nako siyang giingnan nga gusto gyod kong makakat-on sa iyang klase, pero nalisdan ko ug wala ko mahibalo sa akong buhaton. Gihatagan ko niyag mga sugyot, ug iya pa gani kong giingnan nga puwede ko niyang tabangan human sa klase o pinaagig e-mail.

 “Wa gyod ko magdahom adto! Tungod sa among panag-estoryahay, okey na mi sa akong titser. Mas ganahan na kong moeskuwela karon.”​—Maria.

 Tip: Kon naglisod ka sa imong titser, isipa nâ nga pagbansay para sa umaabot. Si Katie, 22 anyos, miingon: “Bisag human na kag eskuwela, makahibalag gihapon kag mga tawo nga may awtoridad nga lisod ikasabot. Kon makamao kang makiglabot sa imong titser nga lisod ikasabot, dili na ka malisdan sa pagpakiglabot ug mga tawo nga sama niana sa umaabot.”