“Kapoy kaayo nga maabtan ug 1:00 sa buntag sa paghimog asaynment. Lami na kaayong itulog.”​—David.

 “Usahay maabtan kog 4:30 sa buntag sa pagtuon, dayon momatag 6:00 sa buntag aron moeskuwela. Hago kaayo!”​—Theresa.

 Natambakan ba ka sa imong asaynment? Kon mao, matabangan ka niini nga artikulo.

•  Nganong mohatag ug asaynment ang mga titser?

•  Mga tip sa pagtuon

•  Ang giingon sa ubang batan-on

 Ang mga asaynment makatabang nimo nga . . .

•   madugangan ang imong kahibalo

•   mahimong responsable

•   makakat-on sa pag-organisar sa imong panahon

•   mas masabtan ang gitudlo diha sa klase a

 “Mohatag ug asaynment ang mga titser aron ilang maseguro nga dili malimtan sa mga estudyante ang ilang nakat-onan imbes nga ipalapos ra kini sa pikas dalunggan.”​—Marie.

 Pananglitan, ang math ug science makapauswag sa imong abilidad sa pagsulbad ug mga problema. Makapatungha pa gani nig bag-ong mga koneksiyon diha sa utok, miingon ang mga eksperto. Busa ang mga asaynment samag ehersisyo sa utok!

 Makita man nimo o wala ang mga benepisyo niini, ang mga asaynment maoy normal nga bahin sa kinabuhi. Hinuon, bisag dili nimo kontrolado kon unsa ka daghang asaynment ang imong madawat, puwede nimo ning humanon sa mas mubong panahon. Sa unsang paagi?

 Kon naglisod ka sa paghuman sa imong mga asaynment, basin kinahanglan kang mohimog mga paagi aron mahuman nimo kini nga dili ra mapulaw o kapoyon pag-ayo. Sulayi ang mosunod nga mga tip.

•   Tip 1: Pagplano. Ang Bibliya nag-ingon: “Ang mga plano sa kugihan moresulta gyod ug kalamposan.” (Proverbio 21:5) Sa dili pa ka maghimog asaynment, andama daan ang tanan nimong gamit aron dili ka magsigeg tindog aron mangita sa imong gikinahanglang gamit.

   Pagpili sab ug lugar nga makapokus ka. Ang uban ganahang magtuon sa hilom ug hayag nga kuwarto sa ilang balay. Naa poy ganahang magtuon sa gawas sa balay, sama sa library.

   “Makatabang ang planner o kalendaryo aron maorganisar nimog maayo ang imong panahon. Kon imong i-monitor ang imong mga asaynment ug kon kanus-a kini angayng humanon, mamenosan ang imong stress.”​—Richard.

•   Tip 2: Organisaha ang imong himoonon. Ang Bibliya nag-ingon: “Himoa ang tanang butang nga may kahapsay.” (1 Corinto 14:40) Busa pilia kon unsay imong unahon sa imong mga asaynment.

   Ginauna sa uban ang mas lisod nga asaynment. Unahon pod sa uban ang mas sayon aron daghan na dayon silag mahuman. Depende ra nimo kon unsay imong unahon.

   “Dako gyod ug tabang ang paghimog listahan, kay mahibaloan nimo kon unsay imong kinahanglang unahon. Pinaagi niana, kontrolado nimo ang imong oras ug dili ka matambakan ug asaynment.”​—Heidi.

•   Tip 3: Himoa dayon. Ang Bibliya nag-ingon: “Magmakugihon, dili magtinapolan.” (Roma 12:11) Ayaw tugoti ang ubang butang​—bisag makalingaw pa kaayo ni—​nga moilog sa imong panahon sa paghimog asaynment.

   Ang mga langaylangayan o mag-unya-unya sa ilang trabaho sagad dili makaabot sa deadline o dalidalion na lang nilag himo ang ilang asaynment. Ang resulta, dili kaayo maayo ang ilang pagtuon ug pagkahimo sa asaynment. Kon himoon dayon nimo ang imong asaynment, malikayan nimo nga mabalaka ug maguol.

   “Dihang himoon dayon nako ang akong homwork o sugdan dayon ang mga project, dili na ko maproblema ani sa ulahi​—ug dili pod mabalda ang uban nakong himoonon.”​—Serina.

   SUGYOT: Himoa ang imong asaynment sa parehong oras kada adlaw. Matabangan ka niini nga mahimong disiplinado ug dunay regular nga eskedyul sa paghimog asaynment.

•   Tip 4: Pagpokus. Ang Bibliya nag-ingon: “Tutok sa imong unahan.” (Proverbio 4:25) Aron masunod nimo ni nga tambag, kinahanglang likayan nimo ang mga butang nga makadisturbo​—ilabina ang mga gadyet.

   Ang pag-Internet ug pagsigeg text makalangan nimo sa paghuman sa imong asaynment. Pero kon pokus ka, dili kaayo ka ma-stress ug madugangan ang imong libreng panahon.

   “Lisod gyod magpokus kon naay cellphone, computer, video game, ug TV. Nakatabang nako ang pag-off sa akong cellphone ug pagpalong sa mga gamit nga makadisturbo nako.”​—Joel.

•   Tip 5: Magmabalanse. Ang Bibliya nag-ingon: “Ipakita sa tanan ang inyong pagkamakataronganon.” (Filipos 4:5) Kon kinahanglan, pahulay kadali aron dili ka sobrang ma-stress. Puwede kang maglakawlakaw, magbisikleta, o mag-jogging.

   Kon morag daghan ra gyod kaayo ang imong asaynment, pakig-estorya sa imong mga titser. Kon nakita nila nga gihimo na nimo ang tanan, basig duna silay himoong mga adjustment.

   “Ayaw tugoti nga ma-stress ka pag-ayo ug mawad-ag kalipay tungod sa imong homwork. Himoa lang ang imong maarangan. Naay mga butang nga dili ka kinahanglang magpaapekto pag-ayo, sama sa homwork.”​—Julia.

 Pangutan-a ang kaugalingon:

•   Unsang mga gamit ang kinahanglan nako sa akong homwork?

•   Unsa ang pinakamaayong oras sa paghimog asaynment?

•   Asa ang pinakamaayong lugar nga makapokus ko sa paghimog asaynment?

•   Sa unsang paagi nako malikayan ang paglangaylangay?

•   Unsang mga butang ang makabalda nako?

•   Unsay akong himoon aron dili ko madisturbo sa mga gadyet o ubang butang?

•   Unsay akong himoon aron mahimo kong balanse ug dili sobrang ma-stress sa akong mga asaynment?

 IMPORTANTENG HINUMDOMAN: Seguroa nga nakasabot ka sa gihatag nga asaynment. Kon naa kay mga pangutana, duola ang imong titser sa dili pa ka mogawas sa classroom.