“Kon naa gani koy problema sa school, makatabang kaayo kon mag-imagine ko sa usa ka tawo nga nakaagi na sa akong mga problema. Dayon sundogon nako ang iyang gihimo. Kon naa kay role model nga masundog, dili na kaayo lisod ang pag-atubang sa mga problema.”​—Haley.

 Ang usa ka role model makatabang nimo nga malikayan ang mga problema ug maabot ang imong mga goal. Ang sekreto mao ang pagpili ug usa ka maayong role model.

•  Nganong mag-amping sa pagpili?

•  Kon unsaon pagpili

•  Kon unsay giingon sa ubang batan-on

•   Ang imong pilion nga role model makaimpluwensiya sa imong buhaton.

   Ang Bibliya nagtambag sa mga Kristohanon nga sundogon ang maayong mga ehemplo. Kini nag-ingon: “Samtang mamalandong kamo kon unsay gisangpotan sa ilang panggawi sundoga ang ilang pagtuo.”​—Hebreohanon 13:7.

   Sugyot: Ang imong pilion nga role model makaimpluwensiya nimo sa paghimog maayo o daotan, maong pilia gyod tong naay maayong kinaiya, dili lang kadtong sikat o kaedad nimo.

   “Naa koy amigong Kristohanon pod, si Adam. Daghan kog nakat-onan sa iyang kinaiya ug linihokan. Daghan siyag gisulti ug gibuhat nga wa gyod nako makalimti. Dako kaayo siyag impluwensiya nako.”​—Colin.

•   Ang imong pilion nga role model makaimpluwensiya sa imong hunahuna ug pagbati.

   Ang Bibliya nag-ingon: “Ayaw pagpahisalaag. Ang daotang pakig-uban makadaot sa mapuslanong pamatasan.”​—1 Corinto 15:33.

   Sugyot: Pilia tong maayog kinaiya. Ayaw lang ibase sa hitsura kay basig ma-discourage lang ka.

   “Kon magsige kag compare sa imong kaugalingon sa mga sikat ug hitsuraan, mobati ra kang maot ug useless. Magsige na nuon kag hunahuna sa imong hitsura.”​—Tamara.

   Hunahunaa: Nganong dili maayo nga himoong role model ang mga artista ug sikat nga mga player?

•   Ang imong pilion nga role model makaimpluwensiya nimo sa pagkab-ot sa imong mga goal.

   Ang Bibliya nag-ingon: “Siya nga nagalakaw uban sa mga tawong maalamon mahimong maalamon.”​—Proverbio 13:20.

   Sugyot: Pilia ang mga role model nga may mga kinaiya nga gusto pod nimong sundogon. Samtang obserbahan nimo sila, makakat-on kag mga steps aron maabot ang imong goal.

   “Imbes maghimog goal nga way klaro, pareho anang moingon ka nga ‘gusto kong mahimong responsable,’ ingna hinuon nga ‘gusto kong mahimong responsable parehas ni Jane. Di gyod siya ma-late ug iya gyong himoon ang iyang mga assignment.’”​—Miriam.

   Ang punto: Kon maayo nga role model ang imong pilion, mahimo pod kang maayong tawo sa umaabot.

 Naay duha ka paagi aron makapili kag maayong role model.

1.   Paghunahunag kinaiya nga gusto nimong i-improve ug pangitag tawo nga naa anang kinaiyaha.

2.   Paghunahuna ug tawo nga nakadayeg kaayo ka ug unya pagpilig kinaiya niya nga gusto nimong sundogon.

 Ang worksheet nga ma-download sa ubos makatabang nimo.

 Kon kinsay puwedeng himoong role model:

•  Ubang batan-on. “Gusto nakong sundogon akong best friend. Pirme gyod siyang naay time sa uban ug mahunahunaon pod siya. Manghod nako siya, pero naa siyay nindot nga mga kinaiya nga gusto nakong sundogon.”​—Miriam.

•  Mga hamtong. Puwede ang mga ginikanan o kadtong pareho nimog tinuohan. “Ang akong mga ginikanan mao ang akong role model. Daghan silag nindot nga kinaiya. Masayop man pod sila, pero faithful gihapon sila. Inigkaparehas nako sa ilang edad, unta mao pod nay isulti sa uban bahin sa ako.”​—Annette.

•  Mga karakter sa Bibliya. “Daghan kog role model nga naa sa Bibliya​—si Timoteo, Ruth, Job, Pedro, ug ang batang babaye nga Israelinhon. Kada usa nila naa koy ganahan nga kinaiya. Samtang nagkadaghan akong nahibaloan bahin sa ila, mas nailhan nako sila. Nalingaw gyod kog study sa librong Sundoga ang Ilang Pagtuo, ug sa ‘Indise sa Maayong Panig-ingnan’ diha sa duha ka volume sa librong Mga Pangutanang Gisukna sa mga Batan-on​—Mga Tubag nga Mosaler.”​—Melinda.

 Sugyot: Daghana ang imong role model. Giingnan ni apostol Pablo ang iyang kaubang mga Kristohanon: “Ipunting ang inyong mata kanila nga nagalakaw sa paagi nga nahiuyon sa panig-ingnan nga inyong nabatonan dinhi kanamo.”​—Filipos 3:17.

 Nahibalo ba ka? Puwede kang mahimong role model sa uban! Ang Bibliya nag-ingon: “Himoa ang imong kaugalingon nga panig-ingnan sa mga matinumanon sa sinultihan, sa panggawi, sa gugma, sa pagtuo, sa kaputli.”​—1 Timoteo 4:12.

 “Bisag naa pa kay dapat i-improve, makatabang gihapon ka sa uban. Wala ka kabalo kon kinsay nag-observe sa imo, basin diay ang imong gisulti nakatabang pod sa ila.”​—Kiana.