•  Nganong dili man ko makapokus?

•  Mga paagi aron mas makapokus

•  Ang giingon sa ubang batan-on

 “Sa una ganahan ko magbasag mga libro, pero karon dili na. Dili na gani ko ganahang mobasag tag-as nga mga parapo.”​—Elaine.

 “Kon laayon ko sa usa ka salida, i-adjust nako ang gipaspason sa video.”​—Miranda.

 “Bisag naa koy importanteng gibuhat unya motingog ang akong cellphone, pirme na kong maghunahuna kon kinsay nag-text nako.”​—Jane.

 Nalisdan ba ka sa pagpokus tungod sa teknolohiya? Kana poy gibati sa uban. “Kon magsige tag Internet, gianad nato ang atong utok nga dili makapokus​—nga paspas kaayong mokuhag impormasyon bisag dili ra magpokus,” misulat ang awtor ug management consultant nga si Nicholas Carr. a

 Niay tulo ka situwasyon diin ang teknolohiya makawala tingali sa imong pokus.

•   Dihang makig-estorya. “Bisag naay kaestorya, ang mga tawo mag-text, magdula, o magsigeg check sa social media sa ilang cellphone​—wala sila magpokus sa tawo nga ilang kaestorya,” miingon ang batan-ong si Maria.

•   Dihang naa sa klase. “Kadaghanan sa mga estudyante miingon nga sila magtext, mag-browse, o magtan-awg mga video diha sa ilang computer o gadyet panahon sa klase,” nag-ingon ang librong Digital Kids, ug gigamit nila ang mga gadyet sa classroom “para sa mga activity nga walay koneksiyon sa ilang klase.”

•   Dihang magtuon. “Lisod kaayo nga dili motan-aw sa akong cellphone dihang motingog kini,” miingon ang 22 anyos nga si Chris. Kon estudyante ka, imbes usa ka oras ra ang imong homwork maabtan kag tulo ka oras o kapin pa kon mabalda ka sa imong mga gadyet.

 Ang punto: Malisdan ka sa pagpokus kon magpabalda ka sa teknolohiya ug magpakontrol niini.

•   Dihang makig-estorya. Ang Bibliya nag-ingon: “Magtan-aw dili lang sa kaugalingong kaayohan, kondili sa kaayohan sab sa uban.” (Filipos 2:4) Ipakita ang konsiderasyon pinaagi sa pagpaminaw ug maayo. Tan-aw pirme sa imong kaestorya, ug ayaw pabalda sa imong mga gadyet.

   “Kon naa kay kaestorya, ayaw pagsigeg tan-aw sa imong cellphone. Ipakita nga gitahod nimo ang imong kaestorya pinaagi sa pagpaminaw pag-ayo kaniya.”​—Thomas.

   TIP: Kon naa kay kaestorya, hiposa ang imong cellphone. Sumala sa research, ang cellphone nga naa ra sa duol puwedeng makawala sa imong pokus kay segurado man ning motingog.

•   Dihang naa sa klase. Ang Bibliya nag-ingon: “Angay mong mamati pag-ayo.” (Lucas 8:18) Unsay atong makat-onan niini nga prinsipyo? Kon ang inyong classroom naay Internet access, ayaw pag-check ug mga message, pagdulag mga game, o pag-chat online kon kinahanglan kang magpokus sa pagkat-on.

   “Kutob sa mahimo paminaw pag-ayo sa klase. Isulat ang mga punto nga gisulti sa imong titser. Kon posible lingkod sa mga lingkoranan sa atubangan aron dili ka mabalda.”​—Karen.

   TIP: Isulat ang imong nakat-onan sa notebook imbes sa computer. Gipakita sa research nga mas makapokus ka ug mas dali nimong mahinumdoman ang imong nakat-onan kon imo ning isulat.

•   Dihang magtuon. Ang Bibliya nag-ingon: “Batoni ang kaalam ug ang pagsabot.” (Proverbio 4:5) Kana nagpasabot nga tun-an nimo pag-ayo ang mga leksiyon imbes magdalidalig tuon aron makapasar sa test.

   “Kon magtuon ko, akong i-airplane mode ang akong tablet ug magpokus lang sa akong ginahimo. Dili ko motan-aw sa mga notification. Kon naa koy kinahanglang hinumdoman, ako ning isulat.”​—Chris.

   TIP: Pagpilig lugar nga makapokus ka sa pagtuon. Seguroa nga hinlo kini ug dili katag.