Ang Bibliya wala mag-ingon kon kanus-a nagsugod ang Diyos sa paglalang sa uniberso ug kon unsa ni ka dugay. Kini igo lang nag-ingon: “Sa sinugdan gibuhat sa Diyos ang langit ug ang yuta.” (Genesis 1:1) Ang Bibliya wala mag-ingon kon kanus-a nâ nga “sinugdan.” Pero gipakita sa rekord sa Genesis nga kini nahitabo una pa ang unom ka yugto, o “adlaw,” sa paglalang.

•  Ang unom ba ka adlaw sa paglalang maoy literal nga mga adlaw nga 24 oras ang gitas-on?

•  Unsay nahitabo sulod sa unom ka adlaw sa paglalang?

•  Nahiuyon ba sa siyensiya ang asoy sa Genesis?

•  Kanus-a gilalang ang adlaw, bulan, ug mga bituon?

•  Pilay edad sa yuta sumala sa Bibliya?

 Dili. Sa Bibliya, ang pulong “adlaw” mahimong magpasabot ug lainlaing gitas-on sa panahon, depende sa konteksto. Pananglitan, ang usa ka bahin sa asoy naghisgot sa entirong yugto sa paglalang ingong usa ka adlaw.—Genesis 2:4.

 Gipahinabo sa Diyos nga ang yuta nga “walay porma ug haw-ang” kapuy-an na sa buhing mga butang. (Genesis 1:2) Dayon naglalang siyag may kinabuhing mga butang dinhi sa yuta. Gihisgotan sa Bibliya ang unom ka grupo sa panghitabo sulod sa mga adlaw, o yugto, sa paglalang:

•  Unang adlaw: Gipahinabo sa Diyos nga ang kahayag makaabot sa yuta, maong dunay adlaw ug gabii.—Genesis 1:3-5.

•  Ikaduhang adlaw: Gibuhat sa Diyos ang hawan ug gibahin ang katubigan. Ang usa ka bahin naa sa ilalom sa hawan ug ang laing bahin didto sa ibabaw sa hawan.—Genesis 1:6-8.

•  Ikatulong adlaw: Gipatungha sa Diyos ang mala nga dapit. Gilalang sab niya ang mga tanom.—Genesis 1:9-13.

•  Ikaupat nga adlaw: Gipahinabo sa Diyos nga ang adlaw, bulan, ug mga bituon—nga magsilbing banwag—makita na gikan sa yuta.—Genesis 1:14-19.

•  Ikalimang adlaw: Gilalang sa Diyos ang buhing mga linalang sa dagat ug ang nagalupad nga mga mananap.—Genesis 1:20-23.

•  Ikaunom nga adlaw: Gilalang sa Diyos ang mga mananap sa yuta ug ang tawo.—Genesis 1:24-31.

 Human sa ikaunom nga adlaw, ang Diyos mipahulay, o mihunong sa paglalang.—Genesis 2:1, 2.

 Ang Bibliya wala mag-ingon nga ang asoy niini bahin sa paglalang maoy detalyado nga analisis labot sa siyensiya. Hinunoa, kini naghisgot sa paglalang sa paagi nga bisan ang mga magbabasa sa kapanahonan sa Bibliya dali rang makasabot sa pagkasunodsunod sa paglalang. Ang asoy sa paglalang dili kasumpaki sa napamatud-an na nga siyensiya. Ang astrophysicist nga si Robert Jastrow misulat: “Ang tanang detalye managlahi, pero ang gihisgotan sa astronomiya ug sa asoy sa Bibliya sa Genesis parehas lang; ang sunodsunod nga mga panghitabo nga misangko sa paglalang sa tawo kalit nga misugod, ug untop sa panahon.”

 Ang adlaw, bulan, ug mga bituon naglungtad na ingong bahin sa “langit” nga gilalang sa “sinugdan.” (Genesis 1:1) Pero dayag nga ang ilang kahayag wala pa makaabot sa yuta tungod sa baga nga atmospera. (Genesis 1:2) Busa bisag dihay gamayng kahayag nga makita sa unang adlaw, dili pa mailhan kon asa ni gikan. Sa ikaupat nga adlaw, dayag nga ang atmospera mitin-aw. Ang Bibliya nag-ingon nga ang adlaw, bulan, ug mga bituon misugod na sa ‘paghatag ug kahayag sa yuta,’ nga dayag nga nagpaila kon unsay makita sa usa nga naa sa yuta.—Genesis 1:17.

 Ang Bibliya wala mag-ingon kon pilay edad sa yuta. Ang Genesis 1:1 igo lang nag-ingon nga ang uniberso, apil ang yuta, dunay sinugdanan. Kini uyon sa kasaligang mga balaod sa siyensiya ug sa mga banabana sa mga siyentipiko bahin sa edad sa yuta.