“Mao nga sultihan mo nako, pagbaton ug pagtuo nga madawat ninyo ang tanang butang nga inyong ginaampo, ug mabatonan ninyo kini.”—Marcos 11:24, Bag-ong Kalibotang Hubad.

“Tungod niini, ingnon ko kamo nga bisag unsa ang inyong pangayoon diha sa pag-ampo, tuohi nga madawat ninyo kini ug mainyo gayod kini.”—Marcos 11:24, Ang Bag-ong Maayong Balita Biblia.

Dihang gisulti kini ni Jesus, iyang gipakita sa iyang mga sumusunod kon unsa ka importante ang pagbatog lig-ong pagtuo sa gahom sa pag-ampo. Iya silang gipasaligan nga ang Diyos dili lang kay mamati sa ilang mga pag-ampo kondili iya sab ning tubagon. Ang tawo nga sinserong nag-ampo uyon sa kabubut-on sa Diyos makaseguro nga ang iyang giampo mahitabo gyod. Sama nig natubag na ang pag-ampo.

Gipasiugda ni Jesus ang kaimportante sa pag-ampo nga may pagtuo. Siya miingon nga ang usa nga nag-ampo “dili [angayng] magduhaduha” kondili kinahanglan siyang “motuo gayod nga mahitabo ang iyang gisulti.” (Marcos 11:23) Ngano? Kay kadtong nagduhaduha ‘dili makadahom nga duna siyay madawat gikan kang Jehova.’ a—Santiago 1:5-8.

Ang tawo nga may pagtuo kadaghang mag-ampo sa lainlaing situwasyon. (Lucas 11:9, 10; Roma 12:12) Pinaagi niini, gipakita niya nga gikinahanglan gyod niya ang iyang gipangayo ug nagtuo gyod siya nga matubag sa Diyos ang iyang pag-ampo. Siyempre, nahibalo sab siya nga posibleng tubagon sa Diyos ang iyang pag-ampo sa paagi ug panahon nga lahi sa iyang gidahom.—Efeso 3:20; Hebreohanon 11:6.

Pero ang giingon ni Jesus wala magpasabot nga madawat ni bisan kinsa ang bisan unsa nga iyang giampo sa Diyos. Si Jesus nakigsulti sa iyang mga sumusunod, mga tawo nga may pagtuo ug naningkamot kutob sa ilang maarangan sa pagsimba kang Jehova nga Diyos sa dalawatong paagi. Ang Bibliya nag-ingon nga si Jehova mamati lang sa mga pag-ampo nga nahiuyon sa iyang kabubut-on. (1 Juan 5:14) Dili siya mamati sa mga pag-ampo niadtong tinuyong nagsalikway sa iyang mga sukdanan ug dili mahinulsolong nagbuhat ug daotan. (Isaias 1:15; Miqueas 3:4; Juan 9:31) Aron mahibalog dugang bahin sa mga pag-ampo nga paminawon sa Diyos, tan-awa kining mubo nga video.

Sa kataposang mga adlaw sa iyang pagministeryo sa yuta, gihisgotan ni Jesus sa iyang mga tinun-an ang kaimportante sa pagpakitag lig-ong pagtuo sa Diyos. Iya kanang gipasiugda pinaagig ilustrasyon. Samtang nagpaingon sa Jerusalem, nakakita siyag kahoyng igos nga may mga dahon. Pero ang kahoy walay bunga, maong gitunglo kini ni Jesus. (Marcos 11:12-14) Makailad tan-awon ang maong kahoy. Ingon ana pod ang karaang nasod sa Israel. Ang katawhan niini, kon tan-awon, morag nagsimba sa Diyos pero ang tinuod wala silay pagtuo. (Mateo 21:43) Human adto, nalaya ang kahoyng igos, nga nagpakita kon unsa unyay mahitabo sa dili madugay sa walay pagtuo nga nasod sa Israel.—Marcos 11:19-21.

Sa laing bahin, kombinsido si Jesus nga ang iyang mga sumusunod makaugmad ug pagtuo nga gikinahanglan aron madaog nila ang mga kalisdanan ug sila magmalamposon. (Marcos 11:22, 23) Ang tambag ni Jesus bahin sa pag-ampo haom kaayo para sa iyang mga sumusunod kay sa dili madugay, masulayan ang ilang pagtuo. Kinahanglan nilang atubangon ang kamatayon ni Jesus ug ang magkagrabe nga pagsupak sa ilang ministeryo. (Lucas 24:17-20; Buhat 5:17, 18, 40) Karon, madaog sab sa mga sumusunod ni Jesus ang lisod nga mga kahimtang kon magpakita silag pagtuo sa Diyos ug sa gahom sa pag-ampo.—Santiago 2:26.

Tan-awa kining mubo nga video nga nagsumaryo sa basahon sa Marcos.