Ang pipila ka magtiayon nga dili magkasinabot moingon nga ang diborsiyo mas makaayo sa mga anak kay sa magpuyo sila uban sa ginikanan nga magsigeg away. Unsay gipakita sa mga ebidensiya?

•  Unsay epekto sa diborsiyo diha sa mga anak?

•  Mas magmalipayon ba ang akong anak kon makigdiborsiyo ko sa akong kapikas?

•  Unsay epekto kon kaming duha ang magpadako sa among anak bisag nagdiborsiyo na mi?

•  Duna bay mas maayong paagi sa pagsulbad sa mga problema sa kaminyoon?

 Gipakita sa mga research nga dili maayo ang epekto sa diborsiyo diha sa mga anak. Ang mga anak sa ginikanan nga nagdiborsiyo posibleng:

•   mobatig kasuko, kabalaka, ug depresyon

•   makaugmad ug kinaiya nga makadaot kanila o sa uban

•   dili maayo sa klase o moundang pag-eskuwela

•   mas daling masakit

 Dugang pa, basolon sa mga anak ang ilang kaugalingon, nga maghunahuna nga silay hinungdan sa diborsiyo o mapugngan unta nila kini.

 Ang diborsiyo mahimong makaapektar sa mga anak bisan dihang hamtong na sila. Basin maghunahuna sila nga wala silay pulos o malisdan tingali sila sa pagsalig sa uban. Posibleng makigdiborsiyo sab sila kon may problema ang ilang kaminyoon.

 Ang punto: Bisag ang pipila nga naghunahunang magdiborsiyo moingon nga makaayo ni sa mga anak, gipakita sa research nga dili nâ tinuod. Ang usa ka eksperto bahin sa pag-atiman ug mga anak, nga si Penelope Leach, misulat: “Miserable ang mga anak kon magdiborsiyo ang ginikanan.” a

 Prinsipyo sa Bibliya: ‘Tan-awa dili lang ang kaugalingong kaayohan, kondili ang kaayohan sab sa uban.’—Filipos 2:4.

 Ang pipila ka tawo moingon ug oo. Pero hinumdomi nga ang gibati sa ginikanan lahi tingali sa gibati sa anak. Ang tawong naghunahunag diborsiyo gustong mausab ang iyang kinabuhi. Kadaghanan sa mga anak dili gustong mausab ang ilang kinabuhi, ug gusto nila nga mag-uban gihapon ang ilang ginikanan.

 Human maestudyohi ang linibo ka kaso sa diborsiyo, ang mga awtor sa librong The Unexpected Legacy of Divorce misulat: “Klaro ang mensahe, ang mga anak wala moingon nga mas malipayon sila. Hinunoa, sila miingon, ‘Dihang nagdiborsiyo ang akong ginikanan, dili na malipayon ang panahon sa akong pagkabata.’” Ang libro miingon sab nga para nila ang kalibotan “dili kasaligan ug mas peligroso kay ang relasyon sa duha ka tawo nga suod kaayo nila nabungkag na.”

 Ang punto: Ang mga anak dili malipayon human magdiborsiyo ang ilang ginikanan.

 Prinsipyo sa Bibliya: “Ang dugmok nga espiritu makahurot sa kusog.”—Proverbio 17:22.

 Ang pipila ka nagdiborsiyong ginikanan nakadesisyon nga silang duha ang magpadako sa ilang anak, nga sama rag magtiayon gihapon sila. Pero lisod ni. Gipakita sa research nga ang nagdiborsiyong ginikanan sagad:

•   mas diyutay nag panahon sa ilang mga anak

•   lainlaig itudlo sa ilang mga anak

•   patumanan ang ilang mga anak kay nakonsensiya sila o gikapoy kaayo

 Ang anak sa nagdiborsiyong ginikanan sagad dili maminaw sa iyang ginikanan. Maghunahuna siya nga ang iya ganing ginikanan wala man mohimo kon unsay husto, sama sa pagtuman sa ilang panaad nga mounong sa usag usa. Mangatarongan tingali siya, ‘Nganong maminaw man ko nila?’

 Ang punto: Lisod para sa nagdiborsiyong ginikanan kon sila gihapong duha ang magpadako sa ilang mga anak. Pero, mas malisdan ang mga anak.

 Prinsipyo sa Bibliya: “Kamong mga amahan, ayaw palagota ang inyong mga anak, aron dili sila maluya.”—Colosas 3:21.

 Nagkinahanglag dakong paningkamot ang pagsugod ug bag-ong kinabuhi human sa diborsiyo. Sagad, mas maayong paningkamotan na lang sa magtiayon nga mapreserbar ang ilang kaminyoon. “Kon dili maayo ang kaminyoon, wala nâ magpasabot nga dili na gyod ni moarang-arang,” nag-ingon ang librong The Case for Marriage. “Paglabay sa panahon, ang kaminyoon sa kadaghanang dili malipayon nga magtiayon nga wala magbulag nahimo rang malipayon.” Kasagaran, mas malipayon ang mga anak kon dili magbulag ang ginikanan.

 Wala ni magpasabot nga dili gyod puwedeng magdiborsiyo. Gani, ang Bibliya nagtugot sa diborsiyo kon ang bana o asawa nakahimog seksuwal nga imoralidad. (Mateo 19:9) Pero, ang Bibliya nag-ingon sab nga “ang maalamon mamalandong sa matag lakang.” (Proverbio 14:15) Kon ang magtiayon naghunahuna nga magdiborsiyo, angay nilang konsiderahon ang tanang epekto sa ilang desisyon—apil na ang epekto niana sa ilang mga anak.

 Siyempre, kon dili malipayon ang kaminyoon, wala ni magpasabot nga agwantahon na lang nimo kini ug wala ka nay himoon. Ang Bibliya naghatag sa kinamaayohang tambag sa pagtabang sa mga bana ug asawa nga maugmad ang mga hiyas nga gikinahanglan para sa malungtaron ug malipayong kaminyoon. Dili nâ ikatingala, kay ang Awtor sa Bibliya, si Jehova, maoy nagmugna sa kaminyoon.—Mateo 19:4-6.

 Prinsipyo sa Bibliya: “Ako, si Jehova, ang imong Diyos, ang Usa nga nagtudlo kanimo aron makabaton kag kaayohan.”—Isaias 48:17.