Kining sumaryo sa pangunang mga pagtulon-an sa Bibliya nakapalig-on gayod sa imong gugma kang Jehova. Kini nga gugma kinahanglan nga padayong palig-onon. (1 Pedro 2:2) Ang imong paglaom nga mabuhi sa walay kataposan nagdepende sa imong padayong pagpakigsuod sa Diyos pinaagi sa pagtuon sa iyang Pulong.​—Basaha ang Juan 17:3; Judas 21.

Samtang mag-uswag ang imong kahibalo bahin sa Diyos, ang imong pagtuo mas molig-on. Ang pagtuo makatabang kanimo nga mapalipay ang Diyos. (Hebreohanon 11:1, 6) Kini magpalihok kanimo sa paghinulsol ug sa paghimog mga kausaban sa imong pagkinabuhi.​—Basaha ang Buhat 3:19.

Siyempre, gusto nimong ipaambit sa uban ang imong nakat-onan kay malipay gayod kitang mosultig maayong balita. Samtang padayon kang magtuon sa Bibliya, makakat-on ka sa paggamit niini aron isaysay ang imong pagtuo kang Jehova ug ang maayong balita.​—Basaha ang Roma 10:13-15.

Ang unang sultihan sa kadaghanan bahin sa maayong balita mao ang ilang mga higala o paryente. Magmataktikanhon. Imbes ingnan sila nga sayop ang ilang relihiyon, suginli sila sa mga saad sa Diyos. Hinumdomi usab nga ang imong maayong panggawi sagad mas makapadani sa mga tawo kay sa imong isulti.​—Basaha ang 2 Timoteo 2:24, 25.

Ang pagtuon sa Pulong sa Diyos motabang kanimo nga mouswag sa espirituwal. Sa ngadtongadto, makabaton kag espesyal kaayo nga relasyon uban kang Jehova. Ikaw mahimong membro sa iyang pamilya.​—Basaha ang 2 Corinto 6:18.

Mouswag ka sa espirituwal kon mopadayon ka sa pagtuon sa Pulong sa Diyos. (Hebreohanon 5:13, 14) Hangyoa ang usa sa mga Saksi ni Jehova nga dumalahan kag pagtuon sa Bibliya gamit ang librong Unsay Gitudlo Kanato sa Bibliya? Kon mouswag ang imong kahibalo sa Pulong sa Diyos, mas magmalamposon ang imong kinabuhi.​—Basaha ang Salmo 1:1-3; 73:27, 28.

Ang maayong balita naggikan kang Jehova, ang malipayong Diyos. Mas masuod ka kaniya kon makigsuod ka sa iyang katawhan. (Hebreohanon 10:24, 25) Pinaagi sa padayong pagpaningkamot nga mapalipay si Jehova, imong ginapangab-ot ang tinuod nga kinabuhi—kinabuhi nga walay kataposan. Ang pagpakigsuod sa Diyos mao gayod ang kinamaayohang butang nga imong mahimo.​—Basaha ang 1 Timoteo 1:11; 6:19.