Kanus-a Magmando sa Yuta ang Gingharian sa Diyos?
Ang pipila sa mga sumusunod ni Jesus gustong mahibalo kon kanus-a magmando ang Gingharian. Gitubag sila ni Jesus nga dili sila mahibalo kon kanus-a kini magmando sa yuta. (Buhat 1:6, 7) Pero una pa niana, iyang giingnan sila nga dihang makita sa iyang mga sumusunod ang espesipikong mga hitabo nga dungang mahitabo, ilang mahibaloan nga “duol na ang Gingharian sa Diyos” ug hapit na kining magmando sa kalibotan.—Lucas 21:31.
UNSA NGA MGA HITABO ANG GIINGON NI JESUS?
Si Jesus miingon: “Ang nasod makiggubat batok sa nasod, ug ang gingharian batok sa gingharian. Duna unyay dagkong linog, mga kanihit sa pagkaon, ug kamatay sa lainlaing dapit.” (Lucas 21:10, 11) Sama sa mga linya nga magpaila sa usa ka fingerprint, kini nga mga hitabo magpaila sa usa ka klarong ilhanan. Ug sama nga ang fingerprint magpaila sa usa ka tawo, kini nga mga hitabo nga dungang mahitabo magpaila nga “duol na ang Gingharian sa Diyos.” Kini ba nga mga hitabo dungang nahitabo sa tibuok kalibotan? Matikdi ang mga ebidensiya.
1. MGA GUBAT
Sa 1914, nahitabo ang gubat nga wala pa sukad mahitabo sa tibuok kasaysayan sa tawo! Ang mga historyano miingon nga pagka-1914 nausab ang dagan sa kasaysayan tungod sa unang gubat sa kalibotan. Niini nga gubat unang gigamit ang daghan kaayong tangke de giyera, mga bomba nga ihulog gikan sa eroplano, mga machine gun, makahilong mga gas, ug uban pang hinagiban. Kini gisundan sa ikaduhang gubat sa kalibotan, diin unang gigamit ang atomic nga mga hinagiban. Sukad sa 1914, ang mga tawo naggubatay sa lainlaing lugar, ug ang maong mga gubat mipatay ug minilyong tawo.
2. MGA LINOG
Kada tuig, mga 100 ka kusog nga linog ang magpahinabog “dakong kadaot,” nag-ingon ang Britannica Academic. Ug ang United States Geological Survey mireport nga “sumala sa mga rekord (sukad sa mga 1900), makadahom ta ug mga 16 ka kusog nga linog kada tuig.” Ang pipila nagtuo nga mas daghan ang narekord nga mga linog karon tungod kay mas maayo na ang pamaagi sa pag-detect niini. Bisan pa niana, ang kusog nga mga linog sa tibuok kalibotan miresultag pag-antos ug kamatayon sa daghang tawo kay sukad masukad.
3. KANIHIT SA PAGKAON
Ang hinungdan sa kanihit sa pagkaon sa tibuok kalibotan mao ang gubat, korapsiyon, pagkahugno sa ekonomiya, dili maayong pamaagi sa pagpanguma, o kakulang ug plano kon may kausaban sa klima. Ang “2018 Year in Review” sa World Food Programme nag-ingon: “Sa tibuok kalibotan, 821 ka milyong tawo ang walay igong pagkaon—124 ka milyon niana ang wala gyoy makaon.” Ang malnutrisyon maoy usa sa mga hinungdan sa kamatayon sa mga 3.1 ka milyong bata kada tuig. Sa 2011, kini ang hinungdan sa mga 45 porsiyento sa mga bata nga namatay sa tibuok kalibotan.
4. MGA SAKIT UG EPIDEMYA
Ang usa ka publikasyon sa World Health Organization miingon: “Daghang grabeng epidemya ang nahitabo sukad sa 2001. Mibalik ang mga sakit kaniadto, sama sa kolera, plague ug yellow fever. Nanungha pod ang bag-ong mga sakit sama sa SARS, pandemic influenza, MERS, Ebola ug Zika.” Ang kinaulahian mao ang COVID-19 nga pandemic. Bisan pag miuswag ang kahibalo sa mga siyentista ug doktor bahin sa mga sakit, wala gihapon sila makakaplag ug tambal sa tanang sakit.
5. TIBUOK KALIBOTAN NGA PAGSANGYAW
Gihisgotan ni Jesus ang laing bahin sa ilhanan. Siya miingon: “Kining maayong balita sa Gingharian isangyaw sa tibuok yuta sa pagpamatuod ngadto sa tanang kanasoran, ug unya moabot ang kataposan.” (Mateo 24:14) Samtang ang kalibotan nakaeksperyensiyag grabeng mga problema, kapin sa walo ka milyong tawo gikan sa tanang kanasoran ang nagsangyaw sa maayong balita sa Gingharian sa Diyos ngadto sa 240 ka kayutaan sa kapig 1,000 ka pinulongan. Wala pa ni sukad mahitabo.
UNSAY IPASABOT SA ILHANAN ALANG KANATO?
Ang ilhanan nga gihatag ni Jesus nagakahitabo karon. Nganong angay tang mainteres sa maong kamatuoran? Kay si Jesus miingon: “Dihang makita ninyo nga nagakahitabo na kining mga butanga, makaseguro mo nga duol na ang Gingharian sa Diyos.”—Lucas 21:31.
Sa dili madugay, tumanon sa Gingharian ang katuyoan sa Diyos para sa yuta
Ang ilhanan nga gihatag ni Jesus ug ang kronolohiya sa Bibliya makatabang nato sa pagsabot nga gitukod sa Diyos ang iyang Gingharian sa langit niadtong 1914. a Nianang panahona, iyang gipalingkod ingong Hari ang iyang Anak, si Jesu-Kristo. (Salmo 2:2, 4, 6-9) Hapit nang magmando ang Gingharian sa Diyos dinhi sa yuta, ug wagtangon niini ang tanang gobyerno sa tawo ug himoong paraiso ang tibuok yuta aron puy-an sa mga tawo hangtod sa hangtod.
Sa dili madugay, ang modelong pag-ampo nga gitudlo ni Jesus matuman na: “Paanhia ang imong Gingharian. Matuman unta ang imong kabubut-on, maingon sa langit, mao man usab sa yuta.” (Mateo 6:10) Pero unsa may gihimo sa Gingharian sukad nga nagmando kini niadtong 1914? Ug unsay atong madahom dihang ang Gingharian bug-os nang magmando sa katawhan?
a Para sa dugang detalye bahin sa tuig 1914, tan-awa ang leksiyon 32 sa librong Mabuhi Ka Hangtod sa Hangtod! nga gipatik sa mga Saksi ni Jehova.
Basin Ganahan Pod Ka
TUBAG SA MGA PANGUTANA BAHIN SA BIBLIYA
Unsay Gipakita sa Kronolohiya sa Bibliya Bahin sa Tuig 1914?
Ang tagna bahin sa “pito ka panahon” sa Daniel kapitulo 4 nagtumong sa kritikal nga panahon sa pagmando sa tawo.
ANG BANTAYANANG TORRE
Kanus-a Moabot ang Kataposan? Ang Giingon ni Jesus
Nakita na ba nimo ang mga hitabo nga gitagna ni Jesus?
TUBAG SA MGA PANGUTANA BAHIN SA BIBLIYA
Unsa ang Ilhanan sa “Kataposang mga Adlaw,” o “Panahon sa Kataposan”?
Daghag gitagna ang Bibliya nga magpaila sa kataposang mga adlaw.
