Sa rekord sa Genesis bahin sa paglalang, atong nakat-onan nga gisugo sa Diyos ang unang tawo, si Adan: “Gikan sa tanang kahoy sa tanaman makakaon ka hangtod sa pagkatagbaw. Apan kon bahin sa kahoy sa kahibalo sa maayo ug sa daotan dili ka gayod mokaon gikan niini, kay sa adlaw nga mokaon ka gikan niini mamatay ka gayod.” (Genesis 2:16, 17) Kanang mga pulonga klarong nagpakita nga kon gisunod ni Adan ang sugo sa Diyos, dili unta siya mamatay, kondili padayon siyang mabuhi diha sa tanaman sa Eden.

Pero makapaguol kay imbes mosunod ug mabuhi sa walay kataposan, si Adan misupak sa sugo sa Diyos ug mikaon sa gidiling bunga nga gihatag sa iyang asawa nga si Eva. (Genesis 3:1-6) Ug kita apektado sa resulta sa ilang pagsupak. Gipatin-aw kini ni apostol Pablo niining paagiha: “Ang sala misulod sa kalibotan pinaagi sa usa ka tawo ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.” (Roma 5:12) Siyempre, kanang “usa ka tawo” mao si Adan. Pero unsa ang sala, ug nganong miresulta kinig kamatayon?

Ang sala mao ang gihimo ni Adan nga tinuyong pagsupak o paglapas sa balaod sa Diyos. (1 Juan 3:4) Ug ang silot sa sala maoy kamatayon, sumala sa giingon sa Diyos kang Adan. Kon si Adan ug ang iyang umaabot nga mga kaliwat padayon lang untang misunod sa sugo sa Diyos, wala unta silay sala ug dili sila mamatay. Gilalang sa Diyos ang tawo dili aron mamatay kondili aron mabuhi hangtod sa hangtod.

 Dili ikalalis nga ang kamatayon “mikaylap sa tanang tawo,” sumala sa giingon sa Bibliya. Pero duna bay bahin sa atong lawas nga magpabiling buhi inigkamatay nato? Daghan ang moingon nga dunay bahin sa atong lawas nga dili mamatay​—mao kuno nang kalag. Kon tinuod na, sama ra kanag pag-ingon nga ang Diyos namakak kang Adan. Ngano? Tungod kay kon dunay bahin sa atong lawas nga magpabiling buhi sa laing kalibotan inigkamatay nato, ang kamatayon dili mahimong silot sa sala, sumala sa giingon sa Diyos. Ang Bibliya nag-ingon: “Dili gayod mahimo nga mamakak ang Diyos.” (Hebreohanon 6:18) Sa pagkatinuod, si Satanas ang namakak dihang iyang giingnan si Eva: “Dili gayod kamo mamatay.”​—Genesis 3:4.

Pero ang pangutana, Kon bakak ang doktrina nga ang kalag dili mamatay, unsa man gyoy mahitabo sa tawo inigkamatay niya?

Ang rekord sa Genesis bahin sa paglalang nag-ingon: “Giumol ni Jehova nga Diyos ang tawo gikan sa abog sa yuta ug gihuypan ang mga buho sa iyang ilong sa gininhawa sa kinabuhi, ug ang tawo nahimong buhing kalag.” Ang ekspresyong “buhing kalag” gihubad gikan sa Hebreohanong pulong nga ne’phesh, * nga sa literal nagkahulogang “nagginhawa nga linalang.”​—Genesis 2:7.

Busa ang Bibliya klarong nagpakita nga ang tawo wala lalanga nga dunay kalag nga dili mamatay. Hinunoa, ang matag indibiduwal maoy “buhing kalag.” Busa bisag unsaon nimo pagpangita, dili gyod ka makakitag teksto sa Bibliya nga nag-ingon nga ang “kalag dili mamatay.”

Kon wala magtudlo ang Bibliya nga ang tawo dunay kalag nga dili mamatay, nganong mao man niy gitudlo sa daghan kaayong relihiyon? Aron matubag kini, mobalik kita sa karaang Ehipto.

Si Herodotus, usa ka Gregong historyano sa ikalimang siglo B.C.E., miingon nga ang mga taga-Ehipto mao ang “unang nagpasiugda sa doktrina nga ang kalag dili mamatay.” Lain pang karaang kultura nga nagtuo niana mao ang mga taga-Babilonya. Dihang gisakop ni Alexander the Great ang Middle East sa 332 B.C.E., gidawat sab ug gitudlo sa mga Gregong pilosopo ang maong doktrina, ug wala madugay kini nakaabot sa tibuok Imperyo sa Gresya.

Sa unang siglo C.E., duha ka prominenteng sekta sa mga Hudiyo, ang mga Essene ug mga Pariseo, nagtudlo nga ang kalag magpabiling buhi inigkamatay sa lawas. Ang The Jewish Encyclopedia nag-ingon: “Ang pagtuo nga ang kalag dili mamatay nakuha sa mga Hudiyo gikan sa Gregong mga ideya ug ilabina sa mga pilosopiya ni Plato.” Ang Hudiyong historyano usab sa unang siglo nga si Josephus miingon nga ang maong doktrina dili gikan sa Balaang Kasulatan, kondili gikan sa “patuotuo sa mga anak sa Gresya,” nga matod pa niya maoy koleksiyon sa mga estorya nga dili tinuod.

Samtang nagkadako ang impluwensiya sa Gregong kultura, gidawat sab sa nag-angkong mga Kristohanon kining pagano nga doktrina. Sumala sa historyanong si Jona Lendering, “tungod sa teoriya ni Plato nga ang atong kalag kaniadto anaa sa maayong dapit ug karon anaa na sa makasasalang kalibotan, napasayon ang pagsagol sa pilosopiya ni Plato ug sa Kristiyanidad.” Busa, gidawat sa “Kristiyanong” relihiyon ang paganong doktrina nga ang kalag dili mamatay ug nahimo kining pangunang bahin sa doktrina niini.

Sa unang siglo, si apostol Pablo nagpasidaan: “Ang inspiradong pulong nag-ingon gayod nga sa ulahing mga yugto sa panahon adunay pipila nga mangahulog gikan sa pagtuo, nga magtagad sa nagpahisalaag nga inspiradong mga pulong ug mga pagtulon-an sa mga demonyo.” (1 Timoteo 4:1) Tinuod gayod kana! Ang doktrina nga ang kalag dili mamatay maoy usa sa mga “pagtulon-an sa mga demonyo.” Ang Bibliya wala magtudlo niini, kondili gikan kini sa karaang paganong mga relihiyon ug pilosopiya.

Makapalipay nga si Jesus miingon: “Ang kamatuoran magpagawas kaninyo.” (Juan 8:32) Tungod sa atong pagkuhag tukmang kahibalo sa kamatuoran sa Bibliya, kita wala na maulipon sa makapasipala sa Diyos nga mga doktrina ug mga tradisyon nga gipasiugda sa daghan kaayong relihiyon sa kalibotan. Dugang pa, tungod sa kamatuoran sa Pulong sa Diyos, nakagawas kita gikan sa pagkaulipon sa mga tradisyon ug mga patuotuo bahin sa kamatayon.​—Tan-awa ang kahon nga “ Hain ang mga Patay?”

Dili katuyoan sa Diyos nga mabuhi ang tawo ug 70 o 80 lang ka tuig ug dayon magkinabuhi sa laing kalibotan hangtod sa hangtod. Ang iyang orihinal nga katuyoan alang sa mga tawo mao nga mabuhi sila sa walay kataposan dinhi sa yuta ingong iyang masinugtanong mga anak. Kining dakong katuyoan maoy kapahayagan sa gugma sa Diyos alang sa mga tawo, ug kini seguradong matuman. (Malaquias 3:6) Ang salmista giinspirar sa paghatag niini nga pasalig: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.”​—Salmo 37:29.