“ANG PAGLAOM MAOY . . . HINUNGDANONG BAHIN SA ATONG ESPIRITUWALIDAD,” matod pa sa librong Hope in the Age of Anxiety. “Ug kini mao ang labing maayong solusyon sa pagbuntog sa pagbati nga walay mahimo, pagbati nga ginalikayan, ug kahadlok.”

Ang atong panginahanglan alang sa paglaom mabasa diha sa Bibliya, nga nagpasidaan sab nato batok sa paglaom nga dili matuman. “Ayaw . . . pagsalig sa mga hamili, ni sa anak sa yutan-ong tawo, nga kaniya walay kaluwasan,” matod pa sa Salmo 146:3. Imbes mosalig sa mga paningkamot sa tawo sa pagluwas kanato, maalamong mosalig kita sa atong Maglalalang, kinsa dunay gahom sa pagtuman sa tanan niyang mga saad. Unsay iyang gisaad nato? Tagda kini.

TAPOSON ANG PAGKADAOTAN; DAYON MALUNGTARONG KALINAW ALANG SA MGA MATARONG: “Sa dili na madugay, ug ang daotan mawala na . . . Apan ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait,” nag-ingon ang Salmo 37:10, 11. Ang bersikulo 29 midugang nga ‘ang mga matarong magapuyo hangtod sa kahangtoran’ dinhi sa yuta.

TAPOSON ANG GUBAT: ‘Hunongon [ni Jehova] ang mga gubat hangtod sa kinatumyan sa yuta. Balion niya ang busogan ug putolputolon ang bangkaw; ang mga karomata iyang sunogon sa kalayo.’​—Salmo 46:8, 9.

WALA NAY SAKIT, PAG-ANTOS, O KAMATAYON: “Ang tolda sa Diyos anaa uban sa mga tawo . . . Iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa.”​—Pinadayag 21:3, 4.

ABUNDANG PAGKAON SA TANAN: “Aduna unyay dagayang lugas sa ibabaw sa yuta; sa tumoy sa kabukiran adunay pagsugwak.”​—Salmo 72:16.

MATARONG NGA PAGMANDO PINAAGI SA USA KA TIBUOK KALIBOTANG GOBYERNO​—GINGHARIAN NI KRISTO: “Dihay gihatag [kang Jesu-Kristo] nga pagmando ug dignidad ug gingharian, aron ang tanang mga katawhan, nasodnong mga pundok ug mga pinulongan magaalagad gayod kaniya. Ang iyang pagmando maoy usa ka pagmando nga mohangtod sa panahong walay tino nga dili mahanaw, ug ang iyang gingharian dili magun-ob.”​—Daniel 7:14.

Nganong makasalig kita niining mga saara? Sa dinhi pa sa yuta, gipamatud-an ni Jesus nga takos siya ingong Tinudlong Hari. Siya nag-ayog masakiton, nagpakaon sa kabos, ug nagbanhawg mga patay. Pero ang mas importante mao ang iyang gipanudlo, kay kini naglakip ug mga prinsipyo nga makatabang sa mga tawo sa pagkinabuhi hangtod sa hangtod nga may kalinaw ug panaghiusa. Si Jesus nagtagna sab sa umaabot nga mga panghitabo, lakip na ang mga ilhanan sa kataposang mga adlaw niining presenteng sistema sa kalibotan.

Si Jesus nagtagna nga ang ilhanan sa kataposang mga adlaw mao ang kagubot ug kawalay kasegurohan! Ang iyang giingon nga ilhanan sa “kataposan sa sistema sa mga butang” naglakip sab ug tibuok kalibotang gubat, kanihit sa pagkaon, kamatay, ug kusog nga mga linog. (Mateo 24:3, 7; Lucas 21:10, 11; Pinadayag 6:3-8) Si Jesus usab miingon: “Tungod sa pag-uswag sa kalapasan mobugnaw ang gugma sa kadaghanan.”​—Mateo 24:12.

Ang pagbugnaw sa gugma makita sa daghang paagi, nga espesipikong gitagna sa laing magsusulat sa Bibliya. Ang 2 Timoteo 3:1-5 nag-ingon nga sa “kataposang mga adlaw,” ang mga tawo mahigugmaon sa kaugalingon, sa salapi, ug sa kalipayan. Sila mapahitas-on ug mabangis. Ang mga pamilya dili na mabination, ug ang mga anak masinupakon sa mga ginikanan. Daghan ang magpakaaron-ingong relihiyoso.

Ang maong samag unos nga mga kahimtang nagpamatuod nga kining kalibotana hapit nang matapos. Kini nagpakita usab nga ang kalinaw sa pagmando sa Gingharian duol na. Gani, gilakip ni Jesus kini nga pasalig sa iyang tagna bahin sa kataposang mga adlaw: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.”​—Mateo 24:14.

Kanang maayong balita nagsilbing pasidaan alang sa mga daotan ug paglaom alang sa mga matarong, nga nagpasalig sa mga matarong nga ang gisaad nga mga panalangin matuman na unya. Kon gusto kang mahibalo ug dugang bahin sa maong mga panalangin, palihog tan-awa ang panid sa likod niining magasina.