Unsa nay Nahitabo sa Pagtahod Ngadto sa Uban?
KON NGANONG IMPORTANTE ANG PAGTAHOD NGADTO SA UBAN
Ang pagtahod ngadto sa uban makapakalma sa situwasyon ug makatabang aron dili mograbe ang kahimtang.
-
Ang usa ka panultihon sa Bibliya nag-ingon: “Ang kalmadong tubag makawala sa kapungot, apan ang sakit nga pulong makahaling sa kasuko.” (Proverbio 15:1) Ang dili matinahorong sinultihan ug binuhatan makapasamot ra hinuon sa problema, ug sagad dili ni maayog resulta.
-
Si Jesus miingon: “Gikan sa kadagaya sa kasingkasing ang baba mosulti.” (Mateo 12:34) Ang dili matinahorong sinultihan mahimong magpaila sa mas lalom nga problema—kon unsa gyoy atong pagbati bahin sa mga tawo nga lahi natog rasa, tribo, nasyonalidad, o kahimtang sa kinabuhi.
Sa survey nga bag-o lang gihimo sa kapig 32,000 ka tawo sa 28 ka nasod, 65 porsiyento ang miingon nga karon pa sila nakakitag kawalay-pagtahod nga ingon ani ka grabe.
ANG IMONG MAHIMO
Sa eskuwelahan man o sa trabahoan, tahora ang tanang tawo—bisag dili mo parehas ug panglantaw. Paghunahunag mga butang nga puwede mong magkauyon. Makatabang na aron malikayan nimo nga manghukom sa uban o mahimong hinawayon.
Tratara ang uban sa paagi nga gusto nimong trataron ka nila. Kon buotan ka ug maayog tinagdan sa uban, dakog purohan nga mao pod nay ilang himoon nimo.
Magpasaylo. Ayawg hunahunaa nga daotan ang motibo sa uban, ug palabya ang ilang dili maayong nasulti o nahimo.
ANG AMONG GINAHIMO
Sa mga lugar diin ang mga Saksi ni Jehova nagpuyo ug nagtrabaho, nagpakita silag pagtahod ngadto sa uban.
Nagtanyag mig libreng pagtuon sa Bibliya ngadto sa tanan, pero wala namo ipamugos ang among gituohan o opinyon ngadto sa uban. Hinuon, naningkamot mi nga ipadapat ang tambag sa Bibliya pinaagi sa pagsulti sa among mensahe nga “may kalumo ug lawom nga pagtahod.”—1 Pedro 3:15; 2 Timoteo 2:24.
Gisalikway namo ang diskriminasyon ug giabiabi namo sa among mga panagkatigom ang tanang klase sa mga tawo nga gustong makakat-on kon unsay gitudlo sa Bibliya. Naningkamot mi nga sabton ang uban ug ‘tahoron ang tanang tawo.’—1 Pedro 2:17, Maayong Balita Biblia.
Gitahod namo ang awtoridad sa gobyerno sa among lugar. (Roma 13:1) Nagsunod mi sa balaod ug nagabayad pod mig buhis. Ug bisag neyutral mi sa politika, gitahod namo ang katungod sa uban nga mohimog personal nga mga desisyon bahin sa mga isyu sa politika.
