KASINATIAN NI DAMI

Sa primero, abi namog ordinaryong labad lang to sa ulo. Pero dihang misamot ug sakit ang ulo ni Papa, mitawag si Mama ug ambulansiya. Dili ko malimot dihang gidala siya sa mga paramedic. Kadto na diay ang kataposang higayon nga makita nako siyang buhi. Paglabayg tulo ka adlaw, ang akong papa namatay tungod sa aneurysm. Sayis anyos pa ko niadto.

Daghang tuig nga gibasol nako ang akong kaugalingon kay nagtuo ko nga akoy nakaingon sa kamatayon ni Papa. Mosantop pirme sa akong hunahuna ang esena nga gikarga siya sa mga paramedic sa ambulansiya, ug mangutana ko sa akong kaugalingon: ‘Nganong nagtan-aw man lang ko? Nganong wala man koy gihimo?’ Kon makakita kog mga tigulang nga masakiton, mangutana ko, ‘Nganong sila buhi gihapon pero ang akong papa patay na?’ Sa ulahi, gitabangan ko ni Mama aron mapagawas nako ang akong kaguol. Kay kami mga Saksi ni Jehova, gitabangan mi sa among kongregasyon.

Ang uban nagtuo nga ang kaguol bation lang panahon sa kamatayon ug pagkahuman mawala na, apan dili kana tinuod sa akong situwasyon. Gibati nako ang kaguol dihang nagtin-edyer na ko.

Ang akong ikatambag sa mga batan-on nga namatyag ginikanan mao kini, “Isulti sa uban ang imong gibati. Kon isulti nimo ang imong gibati nga grabeng kaguol nga mas sayo pa, mas makaayo kana kanimo.”

Oo, lisod kaayong magdako nga walay amahan. Pero nahupayan ko saad sa Bibliya diha sa Pinadayag 21:4 nga naghisgot nga sa dili madugay ‘pahiran [sa Diyos] ang tanang luha gikan sa atong mga mata, ug ang kamatayon mawala na, ni may pagbangotan ni pagtiyabaw ni may kasakit pa.’

KASINATIAN NI DERRICK

Dili gyod ko malimot sa panahon nga mamasol mi ni Papa ug magkamping sa bukid. Ganahan kaayo siyag bukid.

Dugay nang may sakit sa kasingkasing si Papa; makahinumdom pa ko nga giduaw nako siya ospital sa bata pa ko. Pero wala ko mahibalo kon unsa na ka grabe ang iyang sakit. Namatay si Papa dihang nuybe anyos ko.

Pagkamatay niya, nagsige kog hilak. Mora kog gituok, ug dili ko gustong makig-estorya kang bisan kinsa. Wala pa ko makasinati ug ingon niini ka grabe nga kaguol sa tibuok nakong kinabuhi, ug nawad-an kog gana sa paghimog bisan unsa. Sa primero, mahunahunaon kaayo nako ang akong kaubang mga batan-on sa simbahan pero nausab to  sa ulahi. Ang mga tawo didto moingon, “Panahon na gyod to sa imong papa” o “Gikuha na siya sa Ginoo” o “Tua na siya sa langit karon.” Wala gyod ko malipay niana, pero niadtong higayona wala ko mahibalo kon unsay gitudlo sa Bibliya bahin nianang mga butanga.

Dayon si Mama nagtuon ug Bibliya uban sa mga Saksi ni Jehova, sa ulahi ako ug ang akong igsoong lalaki miuban sa pagtuon. Among nakat-onan ang bahin sa kahimtang sa mga patay ug ang makapahupay nga saad sa Diyos bahin sa pagkabanhaw. (Juan 5:28, 29) Pero ang teksto nga nakatabang gyod nako mao ang Isaias 41:10, diin ang Diyos nag-ingon: “Ayaw kahadlok, kay ako uban kanimo. Ayaw iliraw ang imong panan-aw, kay ako imong Diyos. Ako magapalig-on kanimo. Ako sa pagkatinuod magatabang kanimo.” Ang pagkahibalo nga si Jehova nagauban kanako nakapahupay gyod nako sa panahong naguol ko, ug bisan hangtod karon.

KASINATIAN NI JEANNIE

Siyete anyos ko dihang namatay si Mama tungod sa kanser. Dili ko makatuo sa nahitabo niadtong adlawa. Buhi pa sa akong panumdoman nga namatay siya sa balay, didto sab si Lolo ug Lola ug ang tanan kalmado. Niadtong gabhiona tortilyas ang among sud-an. Daw ang akong kinabuhi hinayhinayng nahugno.

Niadtong panahona—ug mga tuig human niadto—gibati nako nga kinahanglan nakong ipakita nga lig-on ko para sa akong manghod nga babaye, busa giluom nako ang akong gibati. Bisag karon, ginatago gihapon nako ang kaguol nga akong bation, ug nahibalo ko nga dili na maayo.

Dili ko malimot sa gugma ug tabang sa lokal nga kongregasyon sa mga Saksi ni Jehova. Bisag bag-o pa lang mi nga nagtambongan sa mga tigom sa Kingdom Hall, gitabangan mi nilang tanan nga morag dugay na ming sakop sa pamilya. Morag usa ka tuig gani nga wala makaluto ug panihapon si Papa kay kanunay ming hatdan sa mga igsoon ug pagkaon.

Usa ka teksto nga nakapadasig kaayo nako mao ang Salmo 25:16, 17. Didto, ang salmista nangamuyo sa Diyos: “Lingia ako, ug pakitai ako ug kaluoy; kay ako nag-inusara ug sinakit. Ang mga kasakit sa akong kasingkasing midaghan; Oh pagawasa ako gikan sa akong mga kapit-os.” Makapalipay gyod ang pagkahibalo nga wala ka mag-inusara dihang maguol ka. Ang Diyos motabang nimo. Ang Bibliya nakatabang nako nga makapadayon sa akong kinabuhi ug makapokus kanunay sa positibong mga butang, sama sa makapahupay nga saad sa Bibliya nga pagkabanhaw. Naglaom ko nga akong makita pag-usab si Mama ug makauban siya nga himsog ug panglawas diha sa paraisong yuta.—2 Pedro 3:13.

Gusto ka bang makakat-on ug dugang bahin sa makapahupayng mensahe sa Bibliya alang niadtong namatyag minahal? I-download ang libreng kopya sa publikasyon nga “Sa Dihang ang Imong Minahal Mamatay.” Ablihi ang www.pr2711.com/ceb ug tan-awa sa PUBLIKASYON > LIBRO UG BROSYUR.