Sa Bibliya, ang pulong “espirituwalidad” nagtumong sab sa tinamdan o disposisyon sa kinabuhi. (Judas 18, 19) Ang mga tawo nga dili gustong magpagiya sa Diyos nagpokus lang sa ilang kaugalingon, pero kadtong gustong magpagiya sa Diyos nagpabili sa iyang mga sukdanan.​—Efeso 5:1.

PRINSIPYO SA BIBLIYA: “Kon maluya ka panahon sa kalisdanan, modiyutay ang imong kusog.”​—Proverbio 24:10, footnote.

ANG GIPASABOT NIINI: Kon maluya ta tungod sa mga kalisdanan, mas malisdan ta sa pagsagubang sa mga problema sa kinabuhi. Pero kon naa tay paglaom, makabaton tag kaisog nga mopadayon ug dili mosurender. Makahupay ang paghunahuna nga ang atong mga problema temporaryo lang. Gani, posibleng makabaton tag kaayohan gikan niana.

ANG IMONG MAHIMO: Pagbaton ug positibong panglantaw sa umaabot. Imbes mabalaka kon unsay posibleng mahitabo o maghulat ug perpektong kahimtang, lihok uyon sa imong mga tumong. Siyempre, naay mga “wala damhang panghitabo.” (Ecclesiastes 9:11) Pero kasagaran, ang mahitabo mas maayo pa kay sa atong gidahom. Sa pag-ilustrar niana, gigamit sa Bibliya ang pananglitan sa pagpanguma. Kini nag-ingon: “Sa buntag ipugas ang imong binhi ug ayaw papahulaya ang imong kamot hangtod sa gabii; kay wala ka masayod kon hain niini ang magmalamposon, kini ba o kadto, o kaha parehas kining motubo.”​—Ecclesiastes 11:6.

PRINSIPYO SA BIBLIYA: “Hatagi kog pagsabot . . . [Ang] imong pulong maoy kamatuoran.”​—Salmo 119:144, 160.

 ANG GIPASABOT NIINI: Naa sa Bibliya ang tubag sa mga pangutana sa mga tawo, sama sa pangutana nga

• Asa gikan ang tawo?

• Nganong nia kita dinhi?

• Unsay mahitabo dihang mamatay ang tawo?

• Mao ra ba gyod ni ang kinabuhi?

Minilyon sa tibuok kalibotan ang nakabaton ug mas maayong kinabuhi kay ilang gisusi ang tubag sa Bibliya sa maong mga pangutana ug sa uban pang pangutana.

ANG IMONG MAHIMO: Susiha mismo kon unsay gitudlo sa Bibliya. Pangutana sa usa sa mga Saksi ni Jehova aron tabangan kang masabtan ang Bibliya. Ablihi ang among website nga jw.org, o tambong sa usa sa among mga tigom, kini libre ug para sa tanan.

ILHA NGA NAA KAY ESPIRITUWAL NGA PANGINAHANGLAN.

“Malipayon kadtong mahunahunaon sa ilang espirituwal nga panginahanglan.”​—MATEO 5:3.

PAGKAT-OG DUGANG BAHIN SA DIYOS.

‘Pangitaa ang Diyos. Ila siyang makaplagan. Siya dili layo sa matag usa kanato.’​—BUHAT 17:27.

BASAHA UG PALANDONGA ANG MENSAHE SA BIBLIYA.

“Ang iyang kalipay anaa sa balaod ni Jehova, * ug ginapamalandong niya ang Iyang balaod adlaw ug gabii. . . . Ang tanan niyang ginahimo magmalamposon.”​—SALMO 1:2, 3, footnote.