Ang pagkamapihigon dili daling mawala. Sama kinig virus nga nagkinahanglag panahon ug paningkamot aron kini mawala. Unsay imong mahimo aron mawala ang imong pagkamapihigon?

“Isul-ob ang gugma, kay kini ang hingpit nga bugkos sa panaghiusa.”​—COLOSAS 3:14.

Unsay gipasabot niini? Ang pagbuhat ug maayo ngadto sa uban makapasuod sa mga tawo. Kon pirme kang magpakitag gugma sa uban, mamenosan ang imong pagkamapihigon. Samtang magkadako ang imong gugma, anam-anam nga mawala ang imong pagdumot o negatibong pagbati sa uban.

Paghunahunag mga paagi nga makapakita kag gugma sa mga tawo nga dili nimo ganahan. Dili kinahanglang espesyal kaayo ang imong himoon. Sulayi ang usa o pipila sa mosunod:

• Magpakitag maayong pamatasan sa maong mga tawo pinaagi sa pag-abli sa pultahan para nila o sa pagtindog aron silay makalingkod sa bus o tren.

• Pakig-estorya nila bisan pag dili kaayo sila makasulti sa imong pinulongan.

• Magpailob kon wala ka kasabot sa ilang ginahimo.

• Magpakitag simpatiya kon mosulti sila sa ilang problema.