1. Sumala sa Colosas 2:4, 8, sa unsang paagi sulayan ni Satanas pagkontrolar ang atong panghunahuna?

GUSTO ni Satanas nga mobiya ta kang Jehova. Aron molampos siya, sulayan niya pag-impluwensiya o pagkontrolar ang atong panghunahuna. Maningkamot siya nga danihon o limbongan ta sa pagsunod kaniya pinaagi sa pagpukaw sa atong mga tinguha.​—Basaha ang Colosas 2:4, 8.

2-3. (a) Nganong angay natong hatagag pagtagad ang pasidaan sa Colosas 2:8? (b) Unsay atong hisgotan niining artikuloha?

² Nameligro ba gyod ta nga malimbongan ni Satanas? Oo! Hinumdomi nga ang pasidaan diha sa Colosas 2:8 wala isulat ni Pablo ngadto sa mga dili magtutuo. Gisulat niya kini ngadto sa mga Kristohanon nga gidihogan sa balaang espiritu. (Col. 1:2, 5) Ang maong mga Kristohanon nameligrong malimbongan, ug labaw na gyod ta karon. (1 Cor. 10:12) Ngano? Si Satanas gitambog dinhi sa yuta, ug naningkamot siya sa paglimbong sa maunongong mga alagad sa Diyos. (Pin. 12:9, 12, 17) Dugang pa, nagkinabuhi ta sa panahon diin ang mga daotan ug mga impostor “mosamot pa ka daotan.”​—2 Tim. 3:1, 13.

³ Niining artikuloha, atong hisgotan kon sa unsang paagi si Satanas naggamit ug “sayop nga mga pangatarongan” aron impluwensiyahan ang atong panghunahuna. Atong hisgotan ang tulo sa iyang “mga lit-ag,” o “malipatlipatong mga buhat.” (Efe. 6:11; footnote) Dayon, sa sunod nga artikulo, atong hisgotan kon sa unsang paagi mawala sa atong hunahuna ang bisan unsang negatibo nga epekto sa iyang mga taktika. Pero, ato unang hisgotan kon giunsa paglimbong ni Satanas ang mga  Israelinhon dihang nakasulod na sila sa Yutang Saad ug tan-awon kon unsay atong makat-onan niana.

4-6. Sumala sa Deuteronomio 11:10-15, unsang kausaban sa mga paagi sa pagpanguma ang kinahanglang makat-onan sa mga Israelinhon dihang nakasulod na sila sa Yutang Saad?

⁴ Gitental ni Satanas ang mga Israelinhon sa pagsimbag diyosdiyos. Sa unsang paagi? Aw, nahibalo siya nga nanginahanglan silag pagkaon, busa gipahimuslan niya kana. Dihang misulod ang mga Israelinhon sa Yutang Saad, kinahanglang usbon nila ang ilang mga paagi sa pagpanguma. Didto sa Ehipto, gigamit sa mga Israelinhon ang tubig sa Nilo aron matubigan ang ilang kaumahan. Pero walay dakong suba sa Yutang Saad, maong mag-agad sila sa ulan ug yamog aron motubo ang ilang mga tanom. (Basaha ang Deuteronomio 11:10-15; Isa. 18:4, 5) Busa, kinahanglang makakat-on ang mga Israelinhon ug bag-ong mga paagi sa pagpanguma. Dili to sayon kay kadaghanan niadtong makamaong manguma nangamatay na sa kamingawan.

⁵ Gipatin-aw ni Jehova sa iyang katawhan nga nausab na ang ilang kahimtang. Dayon, gidugang niya ang mosunod nga pasidaan, nga morag walay kalabotan sa pagpanguma: “Pagbantay nga ang inyong kasingkasing dili motipas ug mosimba sa laing mga diyos ug moyukbo kanila.” (Deut. 11:16, 17) Nganong nagpasidaan si Jehova batok sa pagsimbag mga diyosdiyos nga naghisgot man unta siya bahin sa bag-ong mga paagi sa pagpanguma?

⁶ Nahibalo si Jehova nga ang mga Israelinhon matental sa pagduol sa paganong mga tawo sa ilang palibot aron makakat-og mga paagi sa pagpanguma. Siyempre, ang ilang mga silingan mas daghag nahibaloan bahin sa pagpanguma nianang dapita, ug ang katawhan  sa Diyos mahimong makakat-og mapuslanong mga paagi. Pero may kapeligrohan. Ang panghunahuna sa mga mag-uuma sa Canaan naimpluwensiyahan sa ilang pagtuo kang Baal. Nagtuo sila nga si Baal ang tag-iya sa langit ug tigtaganag ulan. Dili gusto ni Jehova nga malimbongan ang iyang katawhan nianang bakak nga mga pagtuo. Pero daghang higayon nga ang mga Israelinhon mipili sa pagsimba kang Baal. (Num. 25:3, 5; Maghu. 2:13; 1 Hari 18:18) Karon matikdi kon sa unsang paagi nalit-agan ni Satanas ang mga Israelinhon.

7. Sa unsang paagi nasulayan ang pagtuo sa mga Israelinhon dihang misulod sila sa Yutang Saad?

⁷ Ang unang taktika nga gigamit ni Satanas mao ang pagpahimulos sa normal nga tinguha nga ang yuta matubigan pinaagig ulan. Dili kaayo mag-ulan sa Yutang Saad gikan sa hinapos sa Abril hangtod sa Septiyembre kada tuig. Aron mabuhi ang mga Israelinhon ug makabaton ug abundang abot, sila nagdepende sa ulan nga sagad magsugod sa Oktubre. Gipatuo ni Satanas ang mga Israelinhon nga aron maabunda ang ilang abot, kinahanglang sundon nila ang mga kostumbre sa paganong mga tawo sa ilang palibot. Ang maong mga tawo nagtuo nga magpaulan lang ang ilang mga diyos kon mohimo silag mga rituwal. Kadtong walay pagtuo kang Jehova naghunahuna nga kini lang ang paagi nga malikayan ang taas nga hulaw, busa naghimo silag paganong mga rituwal sa pagsimba sa bakak nga diyos, si Baal.

8. Unsa ang ikaduhang taktika nga gigamit ni Satanas? Ipatin-aw.

⁸ Si Satanas migamit ug ikaduhang taktika sa mga Israelinhon. Iyang gipukaw ang imoral nga tinguha. Ang paganong mga nasod nagsimba sa ilang mga diyos pinaagi sa paghimog luod kaayong imoral nga mga buhat. Apil niining imoral nga paagi sa pagsimba ang pagpamampam sa mga babaye ug lalaki diha sa templo. Ang homoseksuwalidad ug ubang klase sa seksuwal nga imoralidad wala lang tugoti kondili nahimo nang normal! (Deut. 23:17, 18; 1 Hari 14:24) Nagtuo ang mga pagano nga kini nga mga rituwal mag-aghat sa ilang mga diyos sa paghimo sa yuta nga tambok. Daghang Israelinhon ang nadani sa imoral nga mga rituwal sa mga pagano ug sa pagsimba sa bakak nga mga diyos. Ang tinuod, nalit-agan sila ni Satanas.

9. Sumala sa Oseas 2:16, 17, unsay gihimo ni Satanas aron malimtan sa mga Israelinhon si Jehova?

⁹ Si Satanas migamit ug ikatulong taktika. Iyang gipahinabo nga malimtan sa mga Israelinhon si Jehova. Sa panahon ni propetang Jeremias, miingon si Jehova nga gipahinabo sa bakak nga mga propeta nga malimtan sa Iyang katawhan ang Iyang ngalan “tungod kang Baal.” (Jer. 23:27) Dayag nga mihunong ang katawhan sa Diyos sa paggamit sa ngalan ni Jehova ug giilisan kini sa ngalang Baal, nga nagkahulogang “Tag-iya” o “Agalon.” Tungod niini, dili na mailhan sa mga Israelinhon ang kalainan ni Jehova ug ni Baal ug sayon na para nila nga sagolon ang mga rituwal sa pagsimba kang Baal ug ang pagsimba kang Jehova.​—Basaha ang Oseas 2:16, 17 ug footnote.

10. Unsang mga taktika ang gigamit ni Satanas karon?

¹⁰ Si Satanas naggamit ug susamang mga taktika karon. Iyang gilit-agan ang mga tawo pinaagi sa pagpahimulos sa natural nga tinguha, pagpakaylap sa seksuwal nga imoralidad, ug pagpahinabo nga malimtan si Jehova. Unahon nato paghisgot kanang ikatulong taktika.

11. Sa unsang paagi gipahinabo ni Satanas nga malimtan sa mga tawo si Jehova?

¹¹ Gipahinabo ni Satanas nga malimtan si Jehova. Human sa kamatayon sa mga apostoles  ni Jesus, ang pipila nga nag-angkong Kristohanon nagsugod pagpakaylap ug bakak nga mga pagtulon-an. (Buh. 20:29, 30; 2 Tes. 2:3) Ang maong mga apostata nagsugod sa paghimog mga paagi aron dili mailhan ang bugtong matuod nga Diyos. Pananglitan, wala na sila mogamit sa ngalan sa Diyos diha sa ilang Bibliya ug migamit silag mga ekspresyon sama sa “Ginoo.” Kay ilang gitangtang ang ngalan sa Diyos ug gipulihag “Ginoo,” lisod na para sa magbabasa sa Bibliya nga makita ang kalainan ni Jehova sa ubang “ginoo” nga gihisgotan sa Kasulatan. (1 Cor. 8:5) Si Jehova ug Jesus pareho nilang gitawag ug “Ginoo,” maong lisod nang masabtan nga lahi si Jehova ug si Jesus. (Juan 17:3) Kini nga kalibog maoy usa sa mga hinungdan nga namugna ang doktrina sa Trinidad, nga wala itudlo sa Pulong sa Diyos. Ingong resulta, daghan ang nagtuo nga ang Diyos misteryoso ug imposibleng mailhan. Bakak gayod kana!​—Buh. 17:27.

12. Unsay gipasiugda sa bakak nga relihiyon? Unsay resulta niini, ingon sa gipatin-aw sa Roma 1:28-31?

¹² Pukawon ni Satanas ang imoral nga tinguha. Sa karaang Israel, gigamit ni Satanas ang bakak nga relihiyon sa pagpakaylap sa imoralidad. Mao gihapon nay iyang ginahimo karon. Gikonsentir sa bakak nga relihiyon ang imoral nga mga buhat ug gipasiugda pa gani kini. Busa, daghan nga nag-angkong nag-alagad sa Diyos mihunong na sa pagsunod sa iyang klaro nga sukdanan sa moral. Gisulti ni apostol Pablo diha sa iyang sulat sa mga taga-Roma ang resulta. (Basaha ang Roma 1:28-31.) Apil sa “mga butang nga dili angay” ang tanang matang sa seksuwal nga imoralidad, nga naglakip sa homoseksuwalidad. (Roma 1:24-27, 32; Pin. 2:20) Importante gyod nga atong sundon ang klarong mga pagtulon-an sa Bibliya!

13. Unsa ang laing taktika nga gigamit ni Satanas?

¹³ Pahimuslan ni Satanas ang atong natural nga mga tinguha. Naa tay natural nga tinguha nga mokat-on ug praktikal nga kahanas nga makatabang aron matagan-an nato ang kaugalingon ug ang atong pamilya. (1 Tim. 5:8) Sagad, makat-onan nato kana pinaagi sa pag-eskuyla ug sa pagkugi sa pagtuon. Pero kinahanglan tang magbantay. Sa sistema sa edukasyon sa daghang nasod, dili lang praktikal nga kahanas ang ginatudlo kondili tawhanong kaalam usab. Ang mga estudyante ginatudloan nga kuwestiyonon kon duna bay Diyos ug dili tahoron ang Bibliya. Sila sultihan nga ang tanang intelihenteng tawo nagtuo nga  ang kinabuhi nagsugod pinaagig ebolusyon. (Roma 1:21-23) Kana nga mga pagtulon-an supak sa “kaalam sa Diyos.”​—1 Cor. 1:19-21; 3:18-20.

14. Unsay gidasig sa tawhanong kaalam?

¹⁴ Ang tawhanong kaalam nagbalewala o nagsupak sa matarong nga mga sukdanan ni Jehova. Kini wala magdasig nga ugmaron ang bunga sa espiritu kondili nagdasig sa paghimo sa “mga buhat sa unod.” (Gal. 5:19-23) Kini nag-aghat sa mga tawo nga mahimong garboso, ug ingong resulta sila nahimong “mahigugmaon sa kaugalingon.” (2 Tim. 3:2-4) Kini nga mga kinaiya kaatbang sa lumo, mapaubsanong hiyas nga gusto sa Diyos nga batonan sa iyang mga alagad. (2 Sam. 22:28) Ang pipila ka Kristohanon nga mieskuyla sa unibersidad nagsugod sa paghunahuna sama sa mga tawo sa kalibotan imbes sama sa Diyos. Atong hisgotan ang usa ka pananglitan sa posibleng mahitabo kon balewalaon kini nga kapeligrohan.

15-16. Unsay imong nakat-onan sa eksperyensiya sa usa ka sister?

¹⁵ Usa ka sister nga kapig 15 ka tuig na sa bug-os panahong pag-alagad miingon: “Ingong bawtismadong Saksi, akong nabasa ug nadungog nga delikado ang pag-eskuyla sa unibersidad, pero ako tong gibalewala. Nagtuo ko nga dili mapadapat kanako ang maong tambag.” Ingong resulta, unsang mga problema ang iyang giatubang? Miadmitir siya: “Tungod kay dako kaayong panahon ug paningkamot ang gikinahanglan sa pagtuon sa akong kurso, dili na kaayo ko makaampog dugay kang Jehova. Tungod sa kakapoy, dili na kaayo ko ganahang makighisgot bahin sa Bibliya ug mangandam sa tigom. Maayo na lang kay dihang nakaamgo ko nga nakadaot sa akong  relasyon kang Jehova ang pagpokus sa taas nga edukasyon, nakahunahuna ko sa paghunong. Ug mao nay akong gihimo.”

¹⁶ Unsay epekto sa taas nga edukasyon diha sa panghunahuna sa sister? Siya miingon: “Maulaw kong moadmitir nga ang akong gipili nga edukasyon nagtudlo nako nga magsigeg bantay sa sayop sa uban, ilabina sa mga igsoon, magdahom ug sobra kanila, ug magpalain. Milabay pa ang taas nga panahon una nausab ang akong panghunahuna. Ang akong eksperyensiya nagtudlo nako nga delikado gyod nga balewalaon ang mga pasidaan nga gihatag sa atong langitnong Amahan pinaagi sa iyang organisasyon. Mas nakaila si Jehova nako kay sa akong pagkaila sa kaugalingon. Kon naminaw lang unta ko niya!”

17. (a) Unsay angay natong determinasyon? (b) Unsay atong hisgotan sa sunod nga artikulo?

¹⁷ Magmadeterminado nga dili ka malit-agan “pinaagi sa pilosopiya ug sayop nga mga pangatarongan” sa kalibotan ni Satanas. Padayon sa pagbantay batok sa mga taktika ni Satanas. (1 Cor. 3:18; 2 Cor. 2:11) Ayawg tugoti nga molampos siya sa pag-impluwensiya nimo nga kalimtan si Jehova. Sunda ang taas nga sukdanan ni Jehova maylabot sa moral. Ug ayawg tugoti si Satanas sa paglimbong nimo nga balewalaon ang tambag ni Jehova. Pero komosta kon namatikdan nimo nga naapektohan na ka sa panghunahuna niining kalibotana? Ipakita sa sunod nga artikulo kon sa unsang paagi ang Pulong sa Diyos makatabang nato sa pagpukan bisan sa “lig-ong naparilan,” o nakagamot pag-ayo, nga mga panghunahuna ug batasan.​—2 Cor. 10:4, 5.