“Adtong bata pa ko, kada adlaw kong dagmalan sa akong kuya ug sultihan pod ko niyag sakit kaayo nga mga pulong. Mao pod nay gihimo sa akong ugangan nga babaye pagminyo nako. Mora kog gihimong ulipon sa akong mga ugangan. Nakahunahuna pa gani kong magpakamatay.”—Madhu, a India.

 “Ang pagmaltratar sa mga babaye kaylap kaayo sa tibuok kalibotan,” nag-ingon ang World Health Organization. Gibanabana nga halos usa sa tulo ka babaye ang nakaeksperyensiya ug pisikal o seksuwal nga pag-abuso.

 Kon nahitabo na nimo, mobati tingali ka nga dili luwas bisag asa ka moadto kay basig naay moabuso nimo. Tungod sa pag-abuso ngadto sa mga babaye, mobati tingali ka nga ang kadaghanan sa mga tawo naghunahuna nga ‘Walay pulos ang mga babaye.’ Pero mao pod ba nay hunahuna sa Diyos?

 Teksto: Gilalang sa Diyos ang “lalaki ug babaye.”—Genesis 1:27.

 Kahulogan: Gibuhat sa Diyos ang lalaki ug babaye. Para niya, parehas silang angayng pakitaan ug pagtahod. Gidahom niya nga “higugmaon sa matag [bana] ang iyang asawa sama sa iyang kaugalingon,” dili kay sultihan ug sakit nga mga pulong o dagmalan aron lang kontrolahon ang iyang asawa. (Efeso 5:33; Colosas 3:19) Klaro nga gusto sa Diyos nga ang mga babaye trataron sa maayong paagi.

 “Adtong bata pa ko, gimolestiya ko sa akong mga paryente. Pagka-17 nako, giingnan ko sa akong amo nga tangtangon ko niya sa trabaho kon dili ko makigsekso niya. Pagminyo nako, gidaogdaog ko sa akong bana, ug mao pod nay gihimo sa akong mga ginikanan ug silingan. Pero sa ngadtongadto, nakakat-on ko bahin kang Jehova, b ang Maglalalang. Iyang gitahod ang mga babaye. Nagpasalig ni nako nga gimahal ko niya ug iya kong gipabilhan.”—Maria, Argentina.

 Teksto: “Naay higala nga mounong labaw pa sa igsoon.”—Proverbio 18:24.

 Kahulogan: Ang tinuod nga higala motabang gyod nimo. Puwede nimong isulti ang imong gibati sa imong kasaligang higala.

 “Sulod sa 20 ka tuig, wala gyod koy gisultihan nga gimolestiya ko. Tungod ani wala ko magmalipayon, sige kog kabalaka, ug na-depress ko. Pero dihang ako na ning gisulti sa akong higala nga andam maminaw, nahupayan gyod ko.”—Elif, Türkiye.

 Teksto: “Itugyan [sa Diyos] ang tanan ninyong kabalaka, kay gimahal mo niya.”—1 Pedro 5:7.

 Kahulogan: Dihang moampo ka, paminawon gyod ka sa Diyos. (Salmo 55:22; 65:2) Kay gimahal ka sa Diyos, iyang ipabati nimo nga gipabilhan gyod ka.

 “Ang pagkat-on bahin kang Jehova nakatabang nako nga maulian gikan sa grabeng emosyonal nga kasakit. Karon, masulti na nako ang tanan nakong gibati ngadto sa Diyos. Mora siyag higala nga makasabot gyod nako.”—Ana, Belize.

 Teksto: “Hatagan [ni Jehova ug] hustisya ang mga wala nay amahan ug ang mga dinaogdaog, aron ang mga tawo sa yuta dili na makapahadlok kanila.”—Salmo 10:18.

 Kahulogan: Hapit nang wad-on sa Diyos ang tanang inhustisya, apil ang pag-abuso ug dili maayong pagtratar ngadto sa mga babaye.

 “Nahupayan kaayo ko sa pagkahibalo nga hapit nang wad-on ni Jehova ang dili maayong pagtratar ngadto sa mga babaye. Nakahatag ni nakog kalinaw sa hunahuna.”—Roberta, Mexico.

 Aron mahibalog dugang bahin sa paglaom nga naa sa Bibliya, kon nganong makasalig ka sa mga saad niini, ug kon sa unsang paagi ang mga Saksi ni Jehova nagtabang sa uban karon gamit ang Bibliya, puwede kang magpaduaw.

 I-download ang ma-print nga bersiyon niini nga artikulo.