Daghang tawo—bisan ang pipila nga nag-angkong Kristohanon—ang naghunahuna nga kinaraan na ang moral nga mga sukdanan sa Bibliya bahin sa sekso ug kaminyoon. Aron mopahiuyon sa modernong panahon, giusab sa pipila ka relihiyon ang ilang gitudlo maylabot sa kon unsay husto ug sayop nga panggawi. Importante pa ba ang mga sukdanan sa Bibliya bahin sa husto ug sayop? Oo. Ipatin-aw niining artikuloha kon ngano.

 Ang tawo gilalang nga nagkinahanglag giya sa iyang Maglalalang. Ang Bibliya nag-ingon: “Dili iya sa tawong naglakaw bisan ang pagtultol sa iyang lakang.” (Jeremias 10:23) Bisag gilalang ta ni Jehova a nga Diyos uban ang katakos sa paghimog mga desisyon, wala ta niya hatagig awtoridad o katakos sa paghukom kon unsay husto ug sayop. Busa, gusto niya nga mosalig ta kaniya.—Proverbio 3:5.

 Makita nato sa Bibliya ang moral nga giya sa Diyos. Tagda ang duha ka rason kon nganong importante kaayo kini nga mga sukdanan.

•   Gilalang ta sa Diyos. (Salmo 100:3) Ingong atong Maglalalang, si Jehova nga Diyos nahibalo gyod kon unsay atong gikinahanglan aron mahimong malipayon ug himsog sa pisikal, mental, ug emosyonal. Nahibalo sab siya kon unsay atong maeksperyensiyahan kon atong balewalaon ang iyang moral nga giya. (Galacia 6:7) Dugang pa, gusto ni Jehova ang kinamaayohan para kanato. Tungod niana, ang Bibliya nag-ingon nga ang Diyos mao “ang Usa nga nagtudlo kanimo aron makabaton kag kaayohan, ang Usa nga naggiya kanimo sa dalan nga angay nimong laktan.”—Isaias 48:17.

•   Puwede tang malimbongan sa atong mga tinguha. Daghan ang naghunahuna nga mahibaloan nila kon unsay husto o sayop pinaagi sa pagsunod sa ilang kasingkasing—sa ato pa, sa ilang mga tinguha ug pagbati. Pero ang Bibliya nag-ingon nga “ang kasingkasing labaw nga malimbongon kay sa bisan unsang butang, ug kini desperado.” (Jeremias 17:9) Kon ang atong kasingkasing wala magiyahi sa kaalam sa Diyos, magpalihok ni nato sa pagbuhat sa mga butang nga atong basolan sa ulahi.—Proverbio 28:26; Ecclesiastes 10:2.

 Dili! Ang Bibliya nagtudlo sa kamatuoran bahin sa Diyos ug sa mga panggawi nga gusto niya nga atong ipakita. (1 Corinto 6:9-11; Galacia 5:19-23) Kabubut-on niya nga ang mga tawo mahibalo niini nga kamatuoran. (1 Timoteo 2:3, 4) Busa, kinahanglang itudlo sa Kristohanong mga ministro kon unsay giingon sa Pulong sa Diyos.—Tito 1:7-9.

 Daghang tawo nga dili gustong maminaw sa moral nga mga sukdanan sa Bibliya ang mangitag relihiyosong mga magtutudlo nga ‘mosulti nila sa gusto nilang madungog.’ (2 Timoteo 4:3, footnote) Bisan pa niana, ang Pulong sa Diyos naghatag niining seryosong pasidaan: “Alaot kadtong mga nag-ingon nga ang maayo daotan ug ang daotan maayo.” (Isaias 5:20) Klaro nga silotan sa Diyos ang mga lider sa relihiyon nga dili magtudlo sa mga tawo kon unsay iyang giingon nga husto ug sayop.

 Wala. Kadtong gustong mapalipay ang Diyos nagsunod sa ehemplo ug mga pagtulon-an ni Jesu-Kristo. Gitudloan niya ang iyang mga sumusunod nga dili hukman ang uban, kondili magpakitag gugma ug pagtahod sa tanan.—Mateo 5:43, 44; 7:1.

 Gitudloan ni Jesus ang iyang mga sumusunod nga ipadapat ang moral nga mga sukdanan sa Diyos diha sa ilang personal nga kinabuhi. Pero gitudloan sab niya sila nga dawaton ang kamatuoran nga ang uban mopili tingali sa pagsunod sa lahi nga mga pagtulon-an. (Mateo 10:14) Wala awtorisahi ni Jesus ang iyang mga sumusunod nga gamiton ang politika o ang bisan unsang paagi aron pugson ang uban sa pagsunod sa mga sukdanan sa Diyos.—Juan 17:14, 16; 18:36.

 Kadtong naningkamot sa pagsunod sa mga sukdanan sa Diyos sa husto ug sayop makatagamtam ug mga kaayohan karon ug sa umaabot. (Salmo 19:8, 11) Apil niini ang mosunod:

•   Mas dakong kalipay.—Proverbio 29:6.

•   Suod nga relasyon sa Diyos.—Proverbio 3:32.

•   Tabang sa Diyos panahon sa kalisdanan.—Proverbio 11:8.

•   Paglaom nga mabuhi sa walay kataposan sa yuta.—Salmo 37:29.