Lón ewe Paipel, ewe kapasen Krik mi afféú ngeni “mine a pwüng,” ewe napanap wenechar a kapachelong lón, “eú mettóch mi wenewenen pwúng,” are eú napanap mi fókkun múrinné.

Chón Kraist ra wesewesen aúcheani alon aposel Paulus ei: “Sia fokun mochen föri mine a pwüng fansoun meinisin.” Met a kapachelong lón?

Chómmóng aramas ra oriir lón kilaas iteiten lesossor me mwen repwe ló. Pwata? Pún ra mochen repwe fókkun núkúnúkéch. Nge a wor eú mettóch mi fókkun lamot seni án emén epwe foutéch are úféúféch. Pwúngún, napanapen manawen emén a tongeni alapaaló are angawaló meséchún me toréchún.

Án Kot we Kapas a wenechar le erá pwe kich sia páppáe ngeni ach sipwe féri minne a ngaw. Keneses 8:21 a erá: “Ekiekin leluken aramas a ngau seni lekisikisin.” Ina pwata ren ach sipwe wenechar a lamot sipwe fiffiu ngeni ach kewe pwisin apwangapwang. Ewe aposel Paulus a ffataffatéch le áweweei usun pwisin an maun ngeni tipis, a erá: “Pun seni lon letipei üa pwapwaiti än Kot allük. Nge üa küna pwal eu allük a angang lon inisi, eu allük mi fiu ngeni ewe allük letipei a tipeeu ngeni, o a fötekiniei fän ewe allükün tipis, ewe a angang lon inisi.”​—Rom 7:22, 23.

Áwewe chék, atun letipach a mochen féri minne a ngaw me a péchékkúl le páe ngeni an epwe tunosolá esap itá weween pwe sipwele chék féri met ewe letip a mochen. Mi chúen wor ach kefil. Atun sia filatá pwe sipwe péén senikich ekiek mi ngaw, sia tongeni chék wenechar inaamwo ika tunosolá a pwellikich.

Ren ach sipwe wenechar a lamot kapasen emmwen mi núkúchar usun féffér mi pwúng me mwáál. Iwe nge, a alólilen pún chómmóng aramas ra kon ekilapei kefilin pwisin fouten inisiir lap seni ewe kapasen emmwen usun féffér mi pwúng me mwáál. Mwirilóón, ra kúnetipingen pwe ar tunosolá a fis pokiten nónnómur. Ewe puk The (Honest) Truth About Dishonesty (Ewe [Pwúngún] Enlet Usun Tunosolá) a erá: “Sia chúri tori ewe aúkúkún sia chúen meefi pwe kich emén mi chék wenechar.” Nge mwo mi wor eú aúkúk mi núkúchar epwe álisikich pwe sipwe tongeni pwisin filatá fán itach ika ifa úkúkún are mi wor tunosolá epwe ketiw? Kilisou pwe mi wor.

Million aramas wóón unusen fénúfan ra fen kúna pwe ewe Paipel a unuséch le ataweei ena osupwang. A wor án ewe Paipel emmwen usun féffér mi pwúng me mwáál ese pwal wor eú epwe léllé ngeni. (Kölfel 19:7) A awora emmwen mi núkúchar wóón ekkeei sókkun mettóch, áwewe chék  ren kókkótun famili, angangen moni, liméchún manaw me ach riri ngeni Kot. Ese sissiwil. An kewe allúk me kapasen emmwen a weneiti meinisin mwú, einang me aramas. Ren ach nennelong lón Paipel, ekilonei wóón met a apasa me apwénúetá an kewe kapasen fén, sia tongeni asukula letipach pwe epwe wenechar me pwúng.

A pwal wor álillis me lúkún ach silei ewe enlet seni Paipel pwe sipwe win lón ewe maun le ú ngeni tunosolá. A pwal lamot ach sipwe iótek ngeni Kot ren an álillis me túmún. Pún sia nónnóm lón ei ótót a fókkun ngaw mi etipetipakich ach sipwe pwal eáni manaw mi limengaw. (Filipi 4:6, 7) Ach féri ena, epwe wor ach pwora le úppós fán iten minne mi pwúng me wenechar lón mettóch meinisin.

Hitoshi ewe sia fósun me lepoputáán a kúna feiéch pokiten a silleló pwe i emén chón angang mi wenechar. Iei a angang ngeni emén mi aúcheani napanapan we wenechar. Iei alon Hitoshi: “Ua kilisou pwe ua kúnékún angang mi ámecheresiei le amwéchú eú miritin letip mi liméch.”

Ekkóch ra pwal kúna pwúngún ena pwóróus. Ekieki pwóróusen ekkewe ekkóch ra kúna feiéch seni ar apwénúetá án Paipel ei kapasen emmwen “föri mine a pwüng fansoun meinisin.”

• Mwelien Letip mi Liméch

  Iei alon Cheryl seni Ireland: “Ua towu me sukul atun a 13 ieri pwe upwe fiti chón solá. Iwe, 95 persentin nei moni a feito seni angangen tunosolá. Ekiseló mwirin, ua pwúpwúlú me ám me pwúlúwei we aua poputá le káé Paipel ren Chón Pwáraatá Jiowa. Aua káé pwe Jiowa * Kot a oput angangen tunosolá, iwe aua filatá pwe aupwele siwili manawem. Lón 1990 aua fangóló manawem ngeni Jiowa me wiliti Chón Pwáraatá Jiowa ren ám papataiseló.”​—Än Salomon Fos 6:16-19.

  “Me lóóm, imwei a uren mettóch mi solá, nge iei ese chúen wor ena esin. Ina pwata ua eáni miritin letip mi liméch. Atun ua ekieki ekkewe fitu fansoun ua tunosolá, ua kilisou ngeni Jiowa ren watteen an úméúméch. Ua pwal fókkun kinamwe le annut lepwin pokiten ua silei pwe iei Jiowa a pwapwaitiei.”

  Iei alon Sonny seni Hong Kong: “Atun nei we pos a silei pwe use etiwa ewe liffangen emichimich seni emén customer, iwe a ereniei ei: ‘Óm Kot a féri pwe kopwe emén aupwe eáni lúkúlúk wóón! En wesan eú feiéch ngeni ach kompeni.’ Ai wenechar lón mettóch meinisin a atufichiei pwe upwe eáni mwelien letip mi liméch mwen mesen Jiowa Kot. A pwal atufichiei le álisi ai famili me ekkewe ekkóch ar repwe pwal ina usun.”

• Kinamween Ekiek

  Iei alon Tom seni Merika: “Ngang emén mi watte wisei lón eú bank. Lón ei angang, a kon lamot an epwe win lap seni an epwe wenechar. Iei ewe ekiek mi chéúfetál, ‘Met ngawan an epwe ekis tunosolá pwe epwe win me álisatá monien ewe mwú?’ Nge ren ai wenechar, a kinamwe ekieki. Ua filatá pwe upwe chék wenechar me mmólnetá ngeni ese lifilifil met epwe fis. Nei kewe pos ra silei pwe usap chofona ngeniir are usap chofona fán iter.”

• Asúfél

  Iei alon Kaori seni Japan: “Nei we supervisor a peseei pwe upwe chofona usun ekkewe mettóch mi péútúló lón ám leenien angang, nge use tipeeú. Atun a pwá ekkewe ra solá, néúm we pos a kilisou ngeniei pokiten ai wenechar. A lamot pwora pwe sipwe wenechar lón ei fénúfan mi tunosolá. Mwirilóón, ekkewe ekkóch repwe lúkúlúk wóóch me súfélitikich.”

Mwelien letip mi liméch, kinamween ekiek me asúfél, ekkeei feiéch ra áiti ngenikich wesewesen échún wenechar. Ika met?