REN fite fite ier, chón esiita ewe Paipel ra erá pwe King Pelsasar, ewe puken Taniel a fós usun, ese fókkun uputiw wóón fénúfan. (Tan. 5:1) Ra eáni ena ekiek pokiten soukáé pisekin chón lóóm rese fókkun kúna och pisekin ánnet pwe i wesewesen emén. Iwe nge, a siwil ar ekiek lón ewe ier 1854. Pwata?

Lón ena ier, emén chón tupuni mwúún Britain itan J. G. Taylor a ló etittina lerásin eú telinimwen lóóm itan Ur, a nóm lón kinikinin Iraq lón ei fansoun. A kúna me lón eú imw tekia fitu leenien mak mi ffér seni pwúl rúáánú inis ttamer, nge a mak mesen makken lóóm wóór. A mak wóón eú me leir masouen eú iótek pwe néún ewe King Nabonidus we mwánichi, itan Pelsasar, epwe manawattam. A ffat ngeni meinisin, pwal mwo nge aramas mi esiita Paipel, pwe ena mettóch a ánnetatá pwe Pelsasar i wesewesen emén.

Iwe nge, ewe Paipel ese chék erá pwe Pelsasar i wesewesen emén, nge a pwal erá pwe i emén king. Iwe nge ekkóch ra chúen esiita alon Paipel na. Áwewe chék, ina epwe lón ewe ier 1875, emén scientist chón England itan William Talbot a makkeei pwe ekkóch ra erá pwe “Bel-sar-ussur [Pelsasar] me seman we itan Nabonidus ra kingeppék. Nge ese fókkun wor ákkáekis pisekin ánnet wóón pwúngún ena.”

Iwe nge, án aramas ánini wóón ena a kaúló lupwen a pwá makken wóón pwal ekkóch leenien mak mi ffér seni pwúl mi erá pwe semen Pelsasar we, King Nabonidus a kan ló towau seni fénúan we ren fite ier. Met a kan fis lupwen a ló ekis? Ewe puk itan Encyclopaedia Britannica a erá: “Lupwen Nabonidus a kan ló seni fénúan we, a ewisa ngeni Pelsasar an epwe wisen nemenem me a onómu fán nemenian lape ngeni néún kewe soufiu.” Ina popun sia tongeni apasa pwe Pelsasar me seman we ra nemenemppék lón Papilon lón ena fansoun. Ina minne Alan Millard ewe soukáéén pisekin chón lóóm me soukáéén fósun fénúfan, a erá pwe a fich “án ewe Puken Taniel epwe eita ngeni Pelsasar ‘king.’”

Iwe nge, me ren néún Kot kewe chón angang pwe ewe Paipel pwisin a ánneta pwúngún ewe puken Taniel me a ánneta pwe a feito seni Kot.​—2 Tim. 3:16.