YOMARA me mongean kewe Marcelo me Hiver ra nóm lón eú kúkkún sóópw lón ewe fénú itan Guatemala. Yomara a poputá le káé ewe Paipel ren ekkewe Chón Pwáraatá, me mwirin mongean kewe ra pwal káé. Nge mi wor eú osukosuk. Ekkeei úlúmén mommongeang iir mi chuun me rese sile álleaan ewe braille, ewe esin mak fán iten chón mesechun. Ina popun, ewe mi wisen káé ngeniir a kan álleani ewe lesen me ekkewe wokisin fán iter.

A pwal áweires ngeniir ar repwe fiti ekkewe mwich. Rese tongeni pwisin ló ngeni ewe Leenien Mwich mi kkan ngeniir, ina epwe úkúkún 40 minich ar sái. Nge chón ewe mwichefel ra akkóta ar repwe álisiir le fiti ekkewe mwich. Me atun ra poputá le eáni ar kinikin lón ekkewe mwich lón weekday, pwiich kewe ra álisiir ar repwe amwéchúlúkú ar kewe kinikin.

Lón May 2019, a poputá le fiffis mwich lón sópwur we. Lón ena atun eú pean pwúpwúlú iir regular pioneer ra mwékút ngeni sópwur we. Ra nefótófót le álisi ekkeei mommongeang ar repwe sile állea me mak lón braille, inaamwo ika ei pean pwúpwúlú resaamwo silei ei mettóch braille. Ra ló ngeni ewe library pwe repwe káé usun braille me ifa usun repwe asukula ekkewe mi chuun.

Lón chék fitu maram, ekkeei mommongeang ra tongeni állea braille, me ina met a álisiir le feffeitá lón pekin ngún. a Iei Yomara, Marcelo me Hiver ra regular pioneer. Marcelo a wiseni ewe wis chónálillisin mwichefel. Iteiten wiik ra chék nefótófót lón ar angang ngeni Jiowa. Ar mwasangasang me tinikken a amwékútú ekkewe ekkóch le alapaaló ar angang ngeni Jiowa.

Ekkeei mommongeang ra kilisou ren ewe álillis me tong chón ar we mwichefel ra pwár ngeniir. Yomara a apasa: “Seni chék lepoputáán ar chuurikem, ekkewe Chón Pwáraatá ra pwári ngenikem ewe tong enlet lefilen Chón Kraist.” Marcelo a apasa: “Chiechiem kewe lón ám we mwichefel ra fókkun múrinné, me aua chóni ewe mwicheichen pwipwi wóón unusen fénúfan iir mi pacheéchfengen lón tong.” Yomara me mongean kewe ra mwétéresiti ewe rán ar repwe kúna án ei fénúfan wiliti eú paratis.​—Kölf. 37:10, 11; Ais. 35:5.