1. Met Jesus a ereni néún kewe chón káé usun ewe fansoun sopolan me ifa an éúréúr ngeniir?

 FITU chék rán me mwen án Jesus we epwele máló, fémén me lein néún kewe chón káé ra ereni: “Kopwe pwäri ngenikem asisilen . . . ewe fansoun sopolan.” (Mat. 24:3) Eli ekkena chón káé ra ekieki ika ifa usun repwe tongeni silei ineet Jerusalem me ewe imwenfel epwe taló. Lón án Jesus pélúweni alór na, ese chék fósun talóón Jerusalem me ewe imwenfel, nge a pwal fósun “ewe fansoun sopolan,” ei sia nóm lón iei. Iei alon Jesus usun ewe fansoun sópwólóón: “Esap wor eman a silei ewe rän are ewe kulok ekei mettoch repwe fis lon, ekewe mwo chon läng, ika ewe Nöün Kot resap pwal silei, pwe ewe Sam chök.” Mwirin, a éúréúra meinisin néún kewe chón káé ar repwe “mamasa.”​—Mark. 13:32-37.

2. Pwata a lamot án ekkewe Chón Kraist lón fansoun ekkewe aposel repwe mammasa?

² A lamot ngeni ekkewe Chón Kraist chón Jus lón fansoun ekkewe aposel ar repwe mammasa pwe ar kúna manaw a lóngólóng wóón ena. Jesus a ereni ekkewe chón tapweló mwirin met repwe kakkatol pwe repwe esilla ineet Jerusalem me ewe imwenfel epwe taló. A apasa: “Lupwen oupwe küna pwe sounfiu ra pwelifeili Jerusalem, mürin oupwe silei pwe a arapoto fansoun an epwe tala.” Lón ena atun, a lamot ar repwe álleasochisi án Jesus éúréúr me poputá le “sütä won ekewe chuk.” (Luk. 21:20, 21) Chókkewe mi álleasochisi ena éúréúr ra kúna manaw atun ekkewe chón Rom ra ataieló Jerusalem.

3. Met sipwele káé lón ei lesen?

 ³ Iei, sia manaw lón ewe fansoun ekiseló chék epwele taló ei ótót mi ngaw. Ina popun a pwal lamot ach sipwe ammólnakich o mammasa. Lón ei lesen, sipwe káé ifa usun sipwe eáni ekiekéch atun sia kúkkúna met a fiffis wóón ei fénúfan, ifa usun sia tongeni áfánni pwisinkich, me ifa usun sia tongeni áeáéchú ei lusun fansoun.

4. Met popun sipwe mochen silei usun ekkewe mettóch mi fiffis wóón fénúfan mi apwénúetá án Paipel kewe oesini?

⁴ A wor popun mi múrinné ach sipwe mochen silei ifa usun ekkewe mettóch mi fiffis wóón ei fénúfan ra apwénúetá án Paipel kewe oesini. Áwewe chék, Jesus a erenikich usun ekkewe mettóch repwe fis pwe epwe álisikich le silei arapotoon sópwólóón án Satan ei ótót. (Mat. 24:3-14) Aposel Petrus a pesekich ach sipwe kakkatol pwénútáán ekkewe oesini pwe epwe apéchékkúla ach lúkú. (2 Pet. 1:19-21) Iei met a mak lepoputáán ewe sáingoon puk lón Paipel: “Iei ewe kapasen pwärätä seni Jesus Kraist, Kot a ngeni an epwe pwäri ngeni nöün kewe chon angang usun met epwe müttir fis.” (Pwär. 1:1) Ina popun, sia fókkun mochen silei usun ekkewe mettóch mi fiffis wóón ei fénúfan lón ei fansoun, me mochen silei ifa usun ra apwénúetá án Paipel kewe oesini. Me eli sia pwal mochen pwóróusfengen me chienach kewe usun ekkena mettóch.

5. Met a lamot sisap féri, me met sipwe féri? (Pwal ppii ekkewe sasing.)

⁵ Iwe nge, atun sipwe pwóróusfengen usun ekkewe oesini seni Paipel, a lamot ach sisap chék ásesser wóón met epwe fis. Pwata? Pún sise mochen apasa och mettóch epwe etipefeseni chón ewe mwichefel. Áwewe chék, eli sia rong án ekkewe sounemenemen mwúún fénúfan fós usun ar tongeni pwákini eú osukosuk me atoto kinamwe me núkúnúkéch. Sisap chék ásesser pwe alór na a apwénúetá ewe oesini lón 1 Tesalonika 5:3, nge a fen lamot ach sipwe silei ekkewe pwóróus mi kerán katowu. Atun sia alónga ach pwóróusfengen wóón ekkewe puk me pwóróus mi kawor seni án Jiowa we mwicheich, sia álisi chón ewe mwichefel ar repwe eáni “ekiek eu.”​—1 Kor. 1:10; 4:6.

6. Met sia tongeni káé seni 2 Petrus 3:11-13?

⁶ Álleani 2 Petrus 3:11-13. Aposel Petrus a álisikich le ekieki pwata a lamot ach sipwe etittina án Paipel kewe oesini. A pesekich ach sipwe ekipwichi warotoon ránin Jiowa we. Pwata? Esap pokiten sia sótun kútta ineet “ewe rän are ewe kulok” Jiowa epwe awaraato ewe Armaketon, nge pokiten sia mochen áeáéchú ei lusun fansoun le “manaueni eu manau mi pin mi nonom fän nemenien Kot.” (Mat. 24:36; Luk. 12:40) A pwal wewe ngeni ach mochen eáni féffér mi pwúng me nochchei pwe mettóch meinisin sia féri fán iten Jiowa, sia féri pokiten sia fókkun tongei. Ren ach sipwe féri ena, a lamot ach sipwe áfánni pwisinkich.

7. Ifa usun sipwe pwári pwe sia áfánni pwisinkich? (Lukas 21:34)

⁷ Jesus a ereni néún kewe chón káé ar resap chék áfánni met a fiffis wóón ei fénúfan, nge repwe pwal áfánni pwisin iir. A ffat ena ren ei éúréúr mi mak lón Lukas 21:34. (Álleani.) Jesus a erá: “Oupwe afälikemi.” Emén mi áfánni pwisin i, a kan mwittir esilla ekkewe feiengaw epwe atai an riri ngeni Jiowa, me a achocho le ttin seni. An féri ena, a álisi an  epwe chék nóm lón án Kot tong.​—SalF. 22:3; Jut. 20, 21.

8. Ifa án aposel Paulus we éúréúr ngeni ekkewe Chón Kraist?

⁸ Ewe aposel Paulus a éúréúra ekkewe Chón Kraist ar repwe áfánni pwisin iir. Áwewe chék, iei met a ereni ekkewe Chón Kraist lón Efisos: “Oupwe afälikemi lon mine oua föri. Ousap föri föförün chon tiparoch, nge oupwe föri föförün chon tipachem.” (Ef. 5:15, 16) Satan a kan achocho le atai ach riri ngeni Jiowa, ina popun ewe Paipel a éúréúrakich ach sipwe “achocho le kütta met letipen ach Samol” pwe sipwe tongeni túmúnú pwisinkich seni meinisin án Satan kewe ssár.​—Ef. 5:17.

9. Ifa usun sipwe esilla letipen Jiowa fán itach?

⁹ Ewe Paipel ese erenikich usun meinisin met a tongeni atai ach riri ngeni Jiowa. Fán chómmóng, a lamot ach sipwe pwisin eáni kefil wóón ekkewe mettóch ese pwal affat lón ewe Paipel. Ren ach sipwe eáni kefil mi múrinné, a lamot ach sipwe esilla are ekieki “letipen ach Samol.” Sa tongeni féri ena ren ach kákkáé án Kot we Kapas iteitan me ekilonei. Lapólóón ach weweiti letipen Jiowa me achocho le eáni “ekiekin Kraist,” epwe pwal ina lapólóón ach eáni féfférún “chon tipachem,” pwal mwo nge atun ese wor allúk mi tichiki met sipwe féri. (1 Kor. 2:14-16) Fán ekkóch, a mecheres ach sipwe esilla ekkewe mettóch sipwe ttin senikich, nge fán ekkóch ese mecheres.

10. Ikkefa ekkóch ekkewe mettóch mi efeiengaw mi lamot sipwe ttiisenikich?

¹⁰ Ikkeei ekkóch ekkewe mettóch mi efeiengaw a lamot sipwe ttiisenikich, féfférún sikepwach, únnúmmóng sakaw, mwéngémmong, kapas mi ámmetek, minen kunou me apwapwa mi uren akkachofesá, sasingin me kachitoon kapasingaw, me pwal ekkóch mettóch usun ekkena. (Kölf. 101:3) Ewe Tefil, ewe chón oputakich, a kan kúkkútta alen an epwe atai ach riri ngeni Jiowa. (1 Pet. 5:8) Ika sise túmúnúéch, Satan epwe fótukalong lón ekiekich me letipach lólówó, tunosolá, tipemmóng, koput, lamalamtekia, me tipekoum. (Kal. 5:19-21) Lepoputáán, eli sia ekieki pwe rese kon efeiengaw ekkena féffér. Nge ika sise mwittir otursenikich, repwe sópwósópwóló le mámmááritá lón letipach usun efóch irá mi poison me a tongeni efisi osukosuk.​—Jas. 1:14, 15.

11. Ifa eú mettóch mi efeiengaw mi weires ach sipwe esilla nge a lamot sipwe túmúnúkich seni, me pwata?

¹¹ Eú mettóch mi efeiengaw nge mi weires ach sipwe esilla, ina chiechi mi ngaw. Nengeni ei kapas áwewe. Oua angangfengen me emén esap i Chón Pwáraatá Jiowa. Iwe, ka mochen án chienom na chón angang epwe eáni ekiek mi pwúng usun Chón Pwáraatá Jiowa, ina popun ka achocho le eáni kirekiréch me ka álilliséch. Eli fán ekkóch ka pwal etiwa an etiwetiw pwe oupwe mwéngéfengen leolowas. Iwe, ese pwen imwo, nge ka kan fiffiti le ló mwéngéén leolowas. Fán ekkóch, chienom na chón angang a kan fós usun ekkewe mettóch mi limengaw lepoputáán kese sani, nge ló, ló, ló, ka eérenaaló le rorrong, iwe kese chúen oput. Iwe sárin ámi angang lón eú rán, a etiwok ámi oupwe ún sakaw, iwe ka fiti. Ekis me ekis, ka poputá le eáni an ekiek. Epwe ifa ttaman me mwirin óm kopwele poputá le áppirú? Ewer, kich aramas mi kirekiréch ngeni meinisin me súfélitiir, nge a lamot sipwe chemeni pwe a watte etipetipaen chókkewe sia kan awora watteen ach fansoun ngeniir. (1 Kor. 15:33) Ika sia áfánni pwisinkich usun met Jesus  a pese ngenikich, sipwe ttiisenikich ekkewe sókkun chiechi rese álleasochisi án Jiowa allúk. (2 Kor. 6:15) Iwe, sipwe kúna ewe feiengaw me sipwe riki seni.

12. Met néún Jesus kewe chón káé ra féri atun ra witiwiti warotoon ewe sópwólóón?

¹² Jesus a mochen an epwe wor met néún kewe chón káé repwe féri atun ra witiwiti warotoon ewe sópwólóón, ina popun a ewisa ngeniir ar angang. A allúkú ngeniir ar repwe afalafala ewe pwóróus allim “lon Jerusalem, lon unusen Jutea me Samaria tori lon unusen fanüfan.” (Föf. 1:6-8) A ifa me watteen wiser na ra angei! Ra alamotaéchú ar fansoun ren ar achocho úkúkún ar tufich le afalafal ngeni aramas.

13. Pwata a lamot ach sipwe alamotaéchú ach fansoun? (Kolose 4:5)

¹³ Álleani Kolose 4:5. Ren ach sipwe áfánni pwisinkich, a lamot sipwe ekiekifichi ifa usun sia áeá ach fansoun. Mettóch mi weiweitá, a tongeni fis ngenikich meinisin. (SalAf. 9:11, NW) A tongeni weiweitá málóóch.

14-15. Ifa usun sia tongeni alamotaéchú ach fansoun? (Ipru 6:11, 12) (Pwal ppii ewe sasing.)

¹⁴ Sia tongeni alamotaéchú ach fansoun ren ach féri letipen Jiowa me apéchékkúla ach riri ngeni i. (Joh. 14:21) A lamot ach sipwe ‘apposakich, sisap mwöküt seni ach souläng.  Sipwe alapalafochei ach achocho lon ewe angangen ach Samol.’ (1 Kor. 15:58) Iwe, atun epwe war ewe sópwólóón, ese lifilifil ika sópwólóón manawach are sópwólóón ei ótót mi ngaw, esap wor ach niamam.​—Mat. 24:13; Rom 14:8.

¹⁵ Lón ei fansoun, Jesus a sópweló le emmweni néún kewe chón káé lón ar afalafala usun Mwúún Kot we wóón unusen fénúfan. Jesus a fen apwénúetá met a pwonei. A asukulakich me ren án Jiowa we mwicheich ren ifa usun sipwe afalafala ewe pwóróus allim, me a pwal awora ngenikich meinisin met mi lamot ren ach sipwe apwénúetá ena angang. (Mat. 28:18-20) Sia féri met Jesus a mochen ach sipwe féri ren ach angang weires le afalafala me asukula aramas, me pwal ren ach mammasafichi atun sia witi án Jiowa epwe asopwaló ei ótót. Ika sia apwénúetá Ipru 6:11, 12, iwe sipwe akkamwéchú ach ápilúkúlúk “tori sopolan.”​—Álleani.

16. Met sipwe tipeppós le féri?

¹⁶ Jiowa a fen filaaló ránin me kulókun an epwe asopwaló án Satan ei ótót. Atun epwe war ena fansoun, epwe fókkun apwénúetá meinisin ekkewe oesini a fen makkeetiw lón an we Kapas. Nge fán ekkóch, eli sipwe ekieki pwe a mmang warotoon ewe sópwólóón. Iwe nge, ránin Jiowa we “esap mang.” (Ap. 2:3) Iwe, amwo sipwe tipeppós le witiwiti Jiowa me ‘ösüküsükü Kot ach we Chon Amanau.’​—Mik. 7:7.