1. Ifa usun Satan a sótun liapeni ach ekiek me ren Kolose 2:4, 8?

SATAN a mochen ach sipwe úkútiw le tongei Jiowa. Ren an epwe féri ena, a etipetipakich le siwili ach ekiek, usun itá a mochen liapeni ach ekiek pwe sipwe eáni an ekiek. A sótun otupukich ren an áeá ekkewe mettóch sia pwapwaiti.​—Álleani Kolose 2:4, 8.

2-3. (a) Pwata sipwe áfánni ewe kapasen éúréúr lón Kolose 2:8? (b) Met sipwe pwóróus wóón lón ei lesen?

² Án Satan otupukich epwe wesewesen atolongakich lón efeiengaw! Chemeni pwe án Paulus we kapasen éúréúr lón Kolose 2:8 ese mak fán iten chókkewe esap iir chón lúkú. Nge a mak ngeni ekkewe Chón Kraist mi fen kepit ren án Kot we manaman mi fel. (Kol. 1:2, 5) Ekkena Chón Kraist ra nóm lón efeiengaw, nge kich sia fen nóm lón ei fansoun mi kon efeiengaw lap seniir. (1 Kor. 10:12) Pwata? Satan a fen kóturutiw fénúfan me a nefótófót wóón an okkotupu néún Kot kewe chón angang mi tuppwél. (Pwär. 12:9, 12, 17) Pwal och, sia nóm lón ei fansoun ekkewe aramas mi ngaw me souleng otuputup ra “chök fokun ngauala.”​—2 Tim. 3:1, 13.

³ Lón ei lesen, sipwe pwóróus wóón ifa usun Satan a áeá “atuputupun tipachem tipachemen fanüfan mi aücheangau” le etipetipa ach ekiek. Sipwe pwóróus usun úlúngát an “angangen atuputup.” (Ef. 6:11) Mwirin lón en lesen mwirin ei, sipwe pwóróus wóón ifa usun sipwe ú ngeni etipetipaen Satan ngeni ekiekich ika sia esilla pwe sia poputá le eáni och ekiekin  fénúfan. Nge akkomw, sipwe pwóróus wóón met sia tongeni káé seni án Satan otupu ekkewe chón Israel mwirin ar tolong lón ewe Fénúen Pwon.

4-6. Ifa ewe mineféén napanapen atake a lamot ekkewe chón Israel repwe káé lupwen ra tolong lón ewe Fénúen Pwon me ren Tuteronomi 11:10-15?

⁴ Satan a mmen tipachem solá le otupu ekkewe chón Israel le fel ngeni ululun. Ifa usun? A silei pwe a lamot ngeniir mwéngé, iwe a áeá ena le otupuur pwe repwe féri letipan. Lupwen ekkewe chón Israel ra tolong lón ewe Fénúen Pwon, a lamot ar repwe siwili napanapen ar ffot masouen atake. Lón Isip, ra kan áeá ewe konik seni ewe chénúpupu Nil le atútúúi masouen ar kewe atake. Iwe nge, lón ewe Fénúen Pwon, ese wor chénúpupu ie repwe tongeni áeá le atútúúi masouen ar kewe atake, nge repwe chék lúkúlúkú púngún rán fitu maram iteiten ier, me pwal seni amurenipwin. (Álleani Tuteronomi 11:10-15; Ais. 18:4, 5) Ina minne, a lamot ngeni ekkewe chón Israel ar repwe káé eú mineféén napanapen atake. Ese mecheres ena pokiten lape ngeni ekkewe mi sipeéch lón pekin atake ra fen máló lón ewe fénúpéén.

⁵ Jiowa a ereni néún kewe aramas pwe a fen siwil nónnómur. Mwirin a ereniir ei kapasen éúréúr, nge eli atun sia kerán álleani sipwe ekieki pwe ese riri ngeni ewe mettóch atake. Iei met a apasa: “Oupwe afälikemi pwe ousap tupula o tokola ren ämi angang ngeni pwal ekoch kot o fel ngeniir.” (Tut. 11:16, 17) Pwata Jiowa a éúréúrer ar resap fel ngeni kot chofona, nge a fósun ar káé mineféén napanapen atake?

⁶ Jiowa a silei pwe ekkewe chón Israel repwe mochen káé ekkóch napanapen atake seni chón ekkewe fénú únúkkúr iir chón fel  ngeni kot chofona. Pwúngún pwe chókkana ra fókkun sipeéch lón pekin atake lap seni ekkewe chón Israel me iir ra tongeni káé seniir. Nge a tongeni wor efeiengawan. Ekkewe chón Kanaan iir chón atake, ra fel ngeni Paal me ar ekiek a lóngólóng wóón minne ra lúkú. Me rer pwe Paal i ewe chón nemeni láng me chón apúngatiw púngún út. Jiowa ese mochen pwe néún kewe aramas repwe tupuló ren ekkena sókkun lúkú mi chofona. Iwe nge, fán chómmóng, ekkewe chón Israel ra filatá le fel ngeni Paal. (Num. 25:3, 5; Souk. 2:13; 1 King 18:18) Iwe iei sipwe nengeni ifa usun Satan a liapeni ekiekin chón Israel.

7. Ifa usun ekkewe chón Israel ra kúna sóssótun ar lúkú lón ewe Fénúen Pwon?

⁷ Áeúin, Satan a sótuni chón Israel ren pwúkún mocheniir kewe ese wor ngawan, weween ar mochen pwe epwe púng rán lón fénúer we. Ese kan púng rán lón ewe Fénúen Pwon seni lesópwólóón April ngeni September iteiten ier. Manawer me rásin fénúer we a lóngólóng wóón púngún rán, mi kan poputá seni October. Satan a otupu chón Israel le lúkú pwe ren ar repwe wéúéch, mi lamot repwe pwal áppirú án chón órur kewe angangen fel ngeni ar kewe kot chofona. Aramasen chón ekkewe fénú únúkkún ekkewe chón Israel ra lúkú pwe mi lamot ar repwe féri och sókkun féfférún fel ngeni ar kewe kot pwe repwe pwapwa rer me apúngatiw ewe rán. Ekkewe chón Israel mi lúkúlúkúmmang ngeni Jiowa ra poputá le lúkú pwe mi lamot ar repwe pwal féri ena pún ina chék met epwe túmúnúúr an esap ttam ewe fansoun pwás. Iwe ra poputá le eáni ena féfférún fel ngeni ewe kot chofona itan Paal.

8. Ifa án Satan we oruuen otuputup? Áweweei.

⁸ Oruuan, Satan a sótuni ekkewe chón Israel wóón mocheniangaw. Ekkewe mwú mi fel ngeni kot chofona ra féri ekkewe féfférún lisowu mi fókkun limengaw. A kapachelong án ekkewe fefin me mwán fangóló inisiir fán iten lisowu lón ekkewe imwenfel. Rese chék etiwa sikefengenin mwán me mwán, me fefin me fefin, me pwal ekkóch féfférún lisowumwáál, nge ra pwal ekieki pwe ese wor ngawen ar féffér! (Tut. 23:17, 18; 1 King 14:24) Me rer, ar kewe kot ra pwapwa lupwen ra eáni ekkena sókkun féffér, iwe repwe efeiéchúúr me áresi fénúer kewe. Chómmóng chón Israel ra pwal sani án ekkena aramas féfférún fel me lisowumwáál, iwe ra tipetipeló le fel ngeni kot chofona. Nge ren enletin, Satan a fen liapeniir me ra fétek fán nemenian.

9. Ifa usun Satan a atopotopwaaló án ekkewe chón Israel ekiek usun Jiowa me ren Osea 2:16, 17?

⁹ Aúlúngátin, Satan a sótuni ekkewe chón Israel ren an atopotopwaaló ar ekiek usun Jiowa. Lón fansoun ewe soufós Jeremaia, Jiowa a apasa pwe ekkewe soufós chofona ra féri pwe néún kewe aramas repwe ménúki itan we pokiten “ewe anü Paal.” (Jer. 23:27) Néún Kot aramas ra úkútiw le néúnéú iten Jiowa we, me siwili ngeni ewe it Paal, weween “Masta” are “Chón Nemenem.” Minne ra féri a atopotopwaaló án ekkewe chón Israel ekiek usun sókkofesenin Jiowa me Paal me ámecheresaaló ar nofitifengenni féfférún fel ngeni Paal me fel ngeni Jiowa.​—Álleani Osea 2:16, 17.

10. Ikkefa ekkewe minen otuputup Satan a áeá lón ei fansoun?

¹⁰ Satan a pwal áeá ekkena esin minen otuputup lón ei fansoun. A sótuni aramas ren  pwúkún mocheniir, apéchékkúla féfférún lisowumwáál, me atopotopwaaló án aramas ekiek usun Jiowa. Sipwe akkomw pwóróus wóón ewe sáingoon minen otuputup.

11. Ifa usun Satan a atopotopwaaló án aramas ekiek usun Jiowa?

¹¹ Satan a atopotopwaaló án aramas ekiek usun Jiowa. Mwirin málóón néún Jesus kewe aposel, ekkóch mi erá pwe iir Chón Kraist ra poputá le achéúfetálei afalafal chofona. (Föf. 20:29, 30; 2 Tes. 2:3) Ekkena chón rikiló ra poputá le atopotopwaaló pwóróusen ewe chék Kot mi enlet. Áwewe chék, ra úkútiw le néúnéú iten Kot we mi pin lón kapiin néúr kewe Paipel nge ra néúnéú ekkewe itelap áwewe chék ren “Samol.” Pokiten ra télú iten Kot we me siwili ngeni “Samol,” iwe a weiresiló án emén chón állea Paipel esilla sókkofesenin Jiowa me ekkewe ekkóch “samol” mi mak lón Paipel. (1 Kor. 8:5) Ra néúnéú ena esin itelap “Samol,” fán iten Jiowa me fán iten Jesus. Iwe a weiresiló án aramas weweiti pwe Jiowa me Néún we ra sókkofesen. (Joh. 17:3) Ena mettóch mi orukoruk a álisatá poputáán ewe afalafal usun úlúmén Kot lón emén, eú lúkú ese pop seni Paipel. Iwe pokiten ena, chómmóng ra lúkú pwe Kot emén mi monomonoló me ese tufich ach sipwe silefichi. A ifa me chofonaan ena pwóróus!​—Föf. 17:27.

12. Met lamalam chofona a apéchékkúla me met mwirilóón me ren Rom 1:28-31?

¹² Satan a sótuni aramas ren mocheniangaw. Lón fansoun ekkewe chón Israel lóóm, Satan a áeá lamalam chofona le apéchékkúla féfférún lisowumwáál. A pwal féri ena lón ei fansoun. Lamalam chofona a mutatá me pwal mwo nge apéchékkúla féffér mi limengaw. Ina minne, chómmóng aramas mi apasa pwe ra angang ngeni Kot ra úkútiw le álleasochisi án Kot kewe allúk mi ffat usun met mi pwúng me met mi mwáál. Ewe aposel Paulus a áweweei lón néún we taropwe ngeni ekkewe chón Rom usun mwirilóón ena mettóch. (Álleani Rom 1:28-31.) Sókkun féfférún lisowumwáál meinisin kapachelong féfférún sikepwach lefilen mwán me mwán, me fefin me fefin, iir “sokun föför esap pwüng.” (Rom 1:24-27, 32; Pwär. 2:20) A ifa me watteen lamoten ach sipwe fitipachei áitien Paipel kewe mi fataffatéch!

13. Ifa pwal eú án Satan minen otuputup?

¹³ Satan a sótuni aramas ren pwúkún  mocheniir kewe ese wor ngawan. A pwúkún nóm rech ewe mochen ach sipwe atufichi manawach me chón ach famili. Iwe sia kan mochen káé och sókkun angang epwe álisikich le féri ena. (1 Tim. 5:8) Fán chómmóng, sia tongeni káé ena sókkun angang ren ach fiti sukul me tinikken le káé. Nge mi lamot sipwe túmúnúéch. Lón chómmóng fénú, ekkewe chón sukul rese chék káé eú pekin angang nge ra pwal káé tipachemen fénúfan. Ra káit ar repwe tipemwaramwareiti pwe a wor Kot me ésúfélúngawa ewe Paipel. Ra káé pwe meinisin mi tipachem ra lúkú pwe manaw a fisitá seni man. (Rom 1:21-23) Ekkena sókkun afalafal ra ú ngeni “än Kot tipachem.”​—1 Kor. 1:19-21; 3:18-20.

14. Met tipachemen aramas a apéchékkúla?

¹⁴ Tipachemen aramas a aúcheangawaaló pwal mwo nge ú ngeni án Kot kewe allúk mi pwúng. Ese apéchékkúla uwaan án Kot we manaman mi fel nge a fen apéchékkúla “ekewe angangen fituk.” (Kal. 5:19-23) A apéchékkúla aramas le lamalamtekia, iwe pokiten ena, aramas ra “ekieki chök püsin ir.” (2 Tim. 3:2-4) Ekkena napanap ra ú ngeni ekkewe napanap tipetekison me mosonoson, minne Kot a mochen pwe néún kewe aramas repwe napanapeni. (2 Sam. 22:28) Ekkóch Chón Kraist mi fiti sukul tekia ra poputá le eáni án ei fénúfan ekiek lap seni án Kot ekiek. Sipwe nengeni eú pwóróus ren met a tongeni fis.

15-16. Met ka káé seni pwóróusen emén Chón Kraist fépwúl?

¹⁵ Iei alon emén Chón Kraist fépwúl mi fen angang ngeni Jiowa full-time lap seni 15 ier: “Pokiten ngang emén Chón Pwáraatá mi fen  papatais, ua fen álleani me rong ekkewe afalafal usun efeiengawen án emén fiti university, nge ua tunaló ekkena sókkun kapasen éúréúr. Me rei ese weneitiei.” Ikkefa ekkewe sóssót a kúna? A erá: “Ua awora watteen ai fansoun me péchékkúl lón ai káé lón sukul, iwe ese chúen wor ai fansoun le fóffós ngeni Jiowa usun met ua kan féri me lóóm. Ua pwal mélúlú le fóffós ngeni aramas usun ewe Paipel, me ammólnaéchú ekkewe mwich. Nge kilisou pwe ua mirititi pwe sukul tekia a fen nemenieiló me a poputá le atai ai riri ngeni Jiowa, iwe ua silei pwe mi lamot ai upwe úkútiw le fiti ena sukul. Iwe ina met ua féri.”

¹⁶ Ifa usun a tipetipeló ekiekin neminna ren minne a káé seni sukul tekia? A erá: “Ua sáw le apasa pwe ai fiti sukul tekia a áiti ngeniei ai upwe nefótófót wóón apwangapwangen ekkewe ekkóch nge ákkáeúin pwiich kewe, kútta seniir met rese tufichin féri, me áimueiló seniir. A ttam ai achocho le úkú seni ena sókkun ekiek. Minne a fis ngeniei, a áiti ngeniei úkúkún efeiengawen ach tunaló ekkewe kapasen éúréúr seni Semach we lón láng me an we mwicheich. Jiowa a silefichiei lap seniei. A chék solap pwe ika ua aúseling ngeni seni chék lepoputáán, iwe usap tolong lón chómmóng osukosuk!”

17. (a) Met sipwe tipeppós le féri? (b) Met sipwe káé lón en lesen mwirin ei?

¹⁷ Kopwe tipeppós óm kosap mut ngeni Satan an epwe liapenuk ren “atuputupun tipachemen fanüfan mi aücheangau” lón an ei ótót. Kosap fókkun mut ngeni an epwe liapenuk. (1 Kor. 3:18; 2 Kor. 2:11) Kosap mut ngeni an epwe atopotopwaaló óm ekiek usun Jiowa. Álleasochisi án Jiowa kewe allúk mi tekia usun met mi pwúng me met mi mwáál. Me kosap mut ngeni Satan an epwe otupuk le tunaló án Jiowa emmwen. Nge met kopwe féri ika ka fen esilla pwe ka fen poputá le tipetipeló ren ekiekin fénúfan? En lesen mwirin ei epwe áiti ngenikich ifa usun án Kot we Kapas a tongeni álisikich le amóeló pwal mwo nge ekkewe ekiek me féffér mi fen té warer lón manawach.​—2 Kor. 10:4, 5.