Kot ese lifilifil aramas me a mochen efeiéchú aramas meinisin.

Kot a pwonei ngeni Apraham, “chon ekewe mwü meinisin won fanüfan repwe küna feiöch reöm.”​—Keneses 12:3.

Met sia káé? Kot a fókkun tongekich me a mochen efeiéchú famili meinisin, mwán, fefin, me semirit, mi álleasochisi i.

Kot mi úméúméch me a efeiéchú chókkewe mi achocho le silei i.

Ewe mi Unusen Manaman a ngeni ewe soufós Moses tufichin féri manaman. Inaamwo nge Moses a chúen iótek me apasa: “Kopwe aiti ngeniei om akot pwe üpwe sileek o küküna ümöümöch me reöm.” (Ekistos 33:13) Kot a pwapwaiti án Moses na tingor, iwe a efeiéchú ren an alapaaló silean me an weweiti féfférún me napanapan kewe. Áwewe chék, Moses a káé pwe ewe Chón Fératá “eman Kot mi eäni ümöümöch me kirikiröch.”​—Ekistos 34:6, 7.

Met sia káé? Kot a mochen efeiéchúkich meinisin, mwán, fefin, me semirit ika pwe sipwe achocho le alapaaló ach silei i. A áiti ngenikich me lón ewe Paipel ifa usun sipwe fel ngeni, me i a pwal mochen fang ngenikich an chen me feiéch.

Sia tongeni pwapwaiti feiéch esemuch seni Kot ika sipwe káé usun Jesus me met a féri me asukula.

Tichikin pwóróusen manawen Jesus me met a asukula a nóm lón ewe Paipel. Kot a ngeni Jesus tufichin féri chómmóng manaman mi amwarar, ren choweán echikara ekkewe mi chuun, mi selingepúng, me mi pechemá. A pwal amanawasefáli ekkewe mi máló. Jesus a pwári ekkewe feiéch Kot epwe fang ngeni aramas lón mwachkkan. A áweweei ifa usun emén me emén kich sia tongeni pwapwaiti ekkena feiéch ren an apasa: “Iwe, iei manau esemüch: Ar repwe silei en, ewe eman chök Kot mi let, repwe pwal silei Jesus Kraist, ewe ka tinato.”​—Johannes 17:3.

Jesus a kirekiréch, chen, me tong. Mwán me fefin, sáráfé me chinnap, ra feiló ren pwe ra etiwa an ei etiwetiw: “Kaiö seniei, pun ngang üa lukpwetete o tipetekison, iwe, oupwe küna söön ngünümi.” (Mateus 11:29) Jesus a kirekiréch, fáiro, me súfél ngeni fefin inaamwo ika lón ena fansoun chómmóng ra kan kirikiringaw ngeniir.

Met sia káé? Jesus a pwári tong ngeni aramas, me a isetiw eú leenien áppirú usun féfférúch ngeni ekkewe ekkóch.

Ewe Paipel a áiti ngenikich pwe “fän itach mi wor eman chök Kot,” nge Jesus Kraist i néún Kot chón kúné mi tipetekison. (1 Korint 8:6) Jesus a affata pwe Kot a tekia seni me Kot a tiinaato i ngeni fénúfan.​—Johannes 11:41, 42; 14:28. *