A IFA ME AMWARAREN ENA FEIÉCH! Ewe Chón Férikich a fen pwonei ngenikich manaw esemuch ikeei ie wóón fénúfan. Iwe nge, a weires ngeni chómmóng ar repwe lúkú ena. Ekkóch repwe erá, ‘Aramas meinisin repwe chék fetál ngeni máló,’ are ‘Manaw me máló, ina kinikinin manawach.’ Nge, ekkóch ra meefi pwe a tufich manaw esemuch, nge esap wóón fénúfan. Ra lúkú pwe manaw esemuch epwe fis mwirin chék án emén máló me feitá láng. Nge met meefiom?

Me mwen óm kopwe pélúweni ena kapas eis, pwata kese ekieki met Paipel a pélúwen ngeni ekkeei úlúngát kapas eis: Met napanapen án Kot fératá aramas a pwári usun úkúkún ttamen an mochen ach sipwe manaw? Ifa án Kot kókkót me lepoputáán fán iten fénúfan me aramas? Ifa usun máló a tori aramas meinisin?

A mmen sókkóló amwararen fférún aramas me lein férien Kot kewe meinisin wóón fénúfan. Ifa usun? Ewe Paipel a erá pwe aramas chék ra ffér ‘lon püsin lapalapen’ Kot. (Keneses 1:26, 27) Nge met weween ena? Weween pwe a nóm ren aramas ekkewe napanap mi pwisin nóm ren Kot, áwewe chék ren tong me pwúngiéch.

Nge me lúkún ena, a nóm ren aramas ewe tufichin álefila lefilen minne mi éch me minne mi ngaw, me ewe mochen le silei Kot me ririéch ngeni. Ina popun sia tongeni aúcheani lingemwararen fán láng me akkamwararen masouen fénúfan, kapachelong ekkewe minen chúnga, me nikáttik. Lap seni meinisin, a nóm ren aramas ewe tufich mi kkóló aúchean ar repwe fel ngeni ewe Chón Férikich. Ekkena napanap ra wesewesen asókkafeseni aramas seni ekkewe ménúmanaw meinisin wóón fenufan.

Ina popun ekieki ei: Itá Kot epwe ngeni aramas ekkena napanap mi fókkun múrinné, kapachelong ekkewe chómmóng chómmóng tufich sia tongeni akkamúrinnééló me ákkámááraatá ika pwe a fen akkóta pwe sipwe manaw úkúkún fitu chék ier? Ren enletin Kot a ngenikich aramas ekkena napanap mi kkóló aúchean me ekkena tufich pwe sipwe tongeni pwapwaiti manawach ikeei ie wóón fénúfan tori feilfeiló chék.

Ekkóch ra erá pwe Kot ese tipeni án aramas repwe manaw wóón fénúfan tori feilfeiló chék. Ra lúkú pwe fénúfan a ffér pwe leenien aramas ren ekis chék fansoun me epwe eú leenien asóssót ika epwe fich ngeniir ar repwe feitá láng me nónnóm ren Kot  tori feilfeiló are resap. Nge ika a pwúng ena lúkú, iwe weween pwe ekkewe mettóch mi ngaw ei fénúfan a ur ren ra wesewesen pop seni Kot? Iwe epwe wesewesen ú ngeni napanapen Kot kewe. Ewe Paipel a erá ei usun I: “An kewe al meinisin ra pwüng. I eman Kot mi allükülük, esap wor an mwäl, a pwüng o wenechar.”​—Tuteronomi 32:4.

Ewe Paipel a affataéchú minne Kot a tipeni me lepoputáán fán iten ei fénúfan ren an apasa: “Ekewe läng än ewe Samol mi Lapalap echök, nge fanüfan a ngeni aramas.” (Kölfel 115:16) Ewer, Kot a féri fénúfan pwe epwe eú leeni mi ling, me imwen aramas tori feilfeiló. A amasoua fénúfan ren mettóch meinisin met mi lamot pwe sipwe pwapwaiti ewe sókkun manaw mi wor aúchean tori feilfeiló chék.​—Keneses 2:8, 9.

“Ekewe läng än ewe Samol mi Lapalap echök, nge fanüfan a ngeni aramas.”​—Kölfel 115:16

A pwal ffat alon Paipel usun minne Kot a tipeni fán iten aramas. A ereni ewe áeúin pean pwúpwúlú: “Fanüfan epwe masou remi o nom fän nemeniemi . . . me mönün won unusen fanüfan.” (Keneses 1:28) A ifa me feiéchúúr ren ar repwe wisen túmúnú me awatteeló ewe Paratis wóón unusen fénúfan! Pwúngún, ewe feiéch itá epwe tori Atam me Efa me mwirimwirin kewe, ina ar repwe manaw esemuch wóón fénúfan nge esap lón láng.

Iwe nge, pwata sia kan máló? Ewe Paipel a affata pwe emén lein néún Kot kewe chónláng, a ffat mwirin och fansoun pwe i ewe chón ú ngeni mi iteni Satan ewe Tefil, a sótun atai án Kot kókkót lón ewe tánipiin Eten. Ifa usun?

Satan a etipetipa popuch kewe, Atam me Efa ar repwe fiti lón an ú ngeni Kot. Atun Satan a mwakenetá pwe Kot a amwéchú och mettóch mi múrinné seniir, weween ar pwúúng le pwisin apwúngaló met mi éch me met mi ngaw, ra fitaaló Satan. Met mwirilóón? Ló, ló, ló, ra máló usun met Kot a fen ereniir. A péút seniir ar feiéch le manaw tori feilfeiló chék lón Paratis wóón fénúfan.​—Keneses 2:17; 3:1-6; 5:5.

Án Atam me Efa ú ngeni Kot, a kkúú aramas meinisin tori lón ach ei fansoun. Án Kot we kapas a erá: “Ren eman mwän [Atam] tipis a tolong lon fanüfan, nge an tipis a atoto mäla. Iei popun mäla a tori aramas meinisin.” (Rom 5:12) Sia kan máló pokiten sia álemwiri tipis me máló seni popuch kewe, nge esap pokiten eú kókkót mi monomon Kot a fen aotaló nge mi weires ach sipwe weweiti.

Ewe angangen ú ngeni Kot lón Eten ese eppeti minne Kot a tipeni fán iten aramas meinisin me fénúfan. Án Kot tong mi unuséch me an pwúng a amwékútú le awora alen ngaseló seni ach álemwiri fétekin tipis me máló. Ewe aposel Paulus a áweweei: “Liwinin tipis mäla, nge än Kot lifang manau esemüch lon Kraist Jesus ach Samol.” (Rom 6:23) Fán tong, Kot a “fangala Nöün Aleman [Jesus Kraist], pwe meinisin mi lükü i resap pöütmwälila, pwe repwe eäni manau esemüch.” (Johannes 3:16) Pokiten án Jesus tipemecheres le fangóló manawan pwe epwe eú asorun méén kepich, a méénisefáli meinisin met mi péútúló pokiten Atam. a

Ekiseló epwe pwénútá án Kot pwon fán iten ewe paratis wóón fénúfan. Ka tongeni kúna ena feiéch mi fókkun amwarar ika kopwe apwénúetá án Jesus ei kapasen fén: “Oupwe tolong lon ewe asam mi pwangekükün! Pun a pwangemong ewe asam o chömong ewe al mi ale ngeni feiengau esemüch, nge chokewe mi fetal won ra chomong. Nge a pwangekükün ewe asam o chökükün ewe al mi ale ngeni manau esemuch. Mi wor ekoch chök aramas mi fetal won ei al ngeni manau.” (Mateus 7:13, 14) Ewer, manawom lón mwachkkan a lóngólóng wóón óm kewe kefil iei. Iwe met kopwe féri?