JONATHAN, a uputiw lón Merika nge inan me seman iir chón Korea. Nge me le kúkkúnún aramas ra lifilifil ngeni pún i átin Korea. Iwe, lupwen a wattetá, a kútta ewe leeni, ikewe ie itá esap wor lifilifil aramas ie pokiten mesemeser are sókkólóón ar lewo. A wiliti emén tokter lón ewe sóópw ennefenin Alaska lón Merika, ikewe mesemesan a léllé ngeni mesen lap ngeni néún kana patient. A áneánei pwe amwo itá lón ena leeni asechikichikin ennefenin fénúfan, epwe tongeni ngase seni riáfféún lifilifil aramas.

Nge a ta met Jonathan a áneánei lupwen a álisi emén néún patient fefin 25 ierin. Lupwen ena fefin a neló seni an peló ren och fansoun, a nengeni mesan Jonathan, iwe a otteki, a pwáló pwe neminna a fen káit seni le kúkkúnún an epwe oputa chón Korea. Minne a fis ngeni Jonathan a ámeteki letipan me áchema ngeni pwe esap tongeni sú seni lifilifil aramas inaamwo ika a fen achocho le mwékút ngeni pwal eú leeni me sótuni an esap sókko seniir.

Met Jonathan a kúna a menlapei met a kan fiffis nge mi eletipechou, pwe lifilifil aramas a fiffis ekis meinisin  wóón fénúfan. Usun itá pwe ikewe a wor aramas ie, epwe chék wor lifilifil aramas.

Inaamwo ika a chéúfetál lifilifil nge lap ngeni aramas repwe mwittir erá pwe ra oput ena napanap. Ekkeei mettóch ra ú fengen. Pún epwe ifa usun och napanap chómmóng aramas ra erá pwe ra oput nge mi chék fen chéúfetál? A ffat pwe chómmóng mi oput lifilifil rese fen esilla pwe lón letiper ra lifilifil. Ifa usun kopwe pélúweni ena kapas eis?

Ese lifilifil ika sia esilla are sise esilla pwe lón letipach sia lifilifil, nge pwúngún pwe a weires ach sipwe esilla ika a wor och ekiekin lifilifil lón letipach. Ewe Paipel a erá pwe “letipen aramas a fokun atuputup lap seni mettoch meinisin.” (Jeremaia 17:9) Ina minne, neman sia otupu pwisin kich pwe kich sia etiwa sókkópaten aramas. Are eli sipwe ekieki pwe mi wor popun mi pwúng ach sipwe ekiekingaw usun ekkóch kúmiin aramas.

Ren ach sipwe weweiti weiresin ach sipwe esilla ika mi nóm rech och ekiekin lifilifil, kopwe anchangei pwe itá a fis ngonuk ei: Ka feffetál áláemén wóón efóch al lón eú pwinin mi rochokkich. Rúúemén alúwél kese kúkkúner ra feffetál ngonuk. Me reom usun iir mi péchékkúl, me emén leir usun a kamwéch och mettóch.

Ka fen mwittir ekieki pwe ekkewe alúwél iir mi efeiengaw ngonuk? Pwúngún, eli ren met a fis lón manawom me lóóm epwe ámmeef ngonuk lamoten túmúnúéch, nge ekkena mettóch ra fis itá ina wesewesen popun kopwe ekieki pwe ekkena rúúemén alúwél iir mi efeiengaw? Pwal iei eú kapas eis epwe álisuk le etittinok: Ka ekieki ika iir chón menni fénú? Óm pélúweni ei kapas eis epwe tongeni pwáraaló och napanapom. Eli epwe pwáló pwe ka fen poputá le eáni ewe napanap lifilifil.

Ika sia wenechar ngeni pwisin kich, sipwe apwúngú pwe lón alóllóólun letipen kich meinisin a nóm rech ena ekiekin lifilifil, eli ren ekkóch ena ekiek epwe watte, nge ekkóch ekisi chék. Pwal mwo nge ewe Paipel a affata eú sókkun lifilifil mi kon chéú, a erá: “Aramas ra nenengeni lapalapen mesen eman.” (1 Samuel 16:7) Pokiten kich meinisin sia páe ngeni ach sipwe lifilifil aramas me fán chómmóng a watte efeiengawan, mei wor ach ápilúkúlúk pwe sipwe tongeni pworacho ngeni are fen amóeló lifilifil lón manawach? Epwe wor eú fansoun lupwen esap chúen wor ewe napanap lifilifil aramas wóón unusen fénúfan?