Iei makkeien emén sense itan David Cunningham lón eú puk usun lamalam: “Aua chúen tipefesen ika aua tongeni erá pwe mi wor eú wesewesen iten Kot, nge ika pwe mi wor, iwe epwe ifa ena it?”

Kot a apasa: “Ngang ewe Samol mi Lapalap [“Jiowa,” NW], iei chök itei.” (Aisea 42:8) * Jiowa ina eú it lón fósun Ipru mi wewe ngeni “A Efisi An Epwe Wiliti.”

Jiowa a mochen ach sipwe néúnéú itan we. Iei met ewe Paipel a apasa. “Ousipwe kilisou ngeni ewe Samol mi Lapalap o köri pwe epwe alisikich. Ousipwe asilefeili lein chon ekewe mwü meinisin mine a föri o aronga ngeniir pwe itan a tekia.”​—Aisea 12:4.

Jesus a néúnéú iten Kot we. Iei met a ereni Jiowa lón an we iótek: “Ngang üa asile ngeniir [néún Jesus kewe chón káé] itom, nge üpwe sopwela ai föri iei usun.” Pwata Jesus a pwári ewe it mi pin ngeni néún kewe chón káé? A pwal erá, “pwe ewe chen ka [Kot] eäni ngeniei epwe nonom lor, pwal ngang üpwe nonom lor.”​—Johannes 17:26.

Iei makkeien emén soukáé lón pekin lamalam itan Walter Lowrie: “Emén ese silei Kot ren itan, a wewe ngeni pwe ese wesewesen sissilei Kot. Ese tongeni tongei Kot ika a chék silei pwe Kot och chék manaman nge esap wesewesen emén.”

Emén mwán itan Victor a kan fiti fál iteiten wiik nge ese meefi pwe a wesewesen silei Kot. Iei alon: “Atun ua káé pwe Jiowa ina iten Kot, iwe ina met a atufichi ai upwe silei i. Ua meefi pwe iei ua kerán chuuri Eménnewe ua kan rongorong usun. Ua silei Kot pwe i wesewesen Emén me ua silei pwe ua tongeni ámááraatá eú chiechi lefilem.”

Jiowa a arap ngeni chókkewe mi néúnéú itan. A pwonei ngeni chókkewe mi “chechemeni itan” pwe epwe “ümöümöch ngeniir, usun eman sam a ümöümöch ngeni nöün mwan mi angang ngeni.” (Malakai 3:16, 17) Kot a pwal efeiéchú chókkewe mi kéri itan. Iei met Paipel a erá: “Iteiten aramas mi köri iten ewe Samol [“Jiowa,” NW] epwe küna manau.”​—Rom 10:13.