Anchangei án emén sam fóffós ngeni néún át fisu ierin. A ereni: “Lóóm, lóóm, lóóm, Kot a fératá fénúfan me meinisin masouan kewe, a féri ewe akkar, maram me ekkewe fúú.” Ewe át a kamwo ekis ekieki, mwirin a eis, “Nge mwa Papa, ié a féri Kot?”

Ewe sam a apasa, “Ese wor emén a féri Kot. A fen chék nónnóm seni lóóm lóóm.” Lón ena atun, ena át a menemenéch ren met seman we a erá. Iwe nge, lupwen a wattetá, ena kapas eis a chúen nónnóm lón ekiekin. A weires an epwe weweiti ika ifa usun emén esap wor poputáán. Pún, pwal mwo nge unuselapen láng me fénúfan mi wor poputáán. Iwe a ekieki, ‘Ia Kot a feito me ie?’

Ifa pélúwen ena kapas eis me ren ewe Paipel? Pélúwan a chék pwal usun met ewe sam lón ei kapas áwewe a erá. Moses a makkeei: “Ai Samol . . . mwen ekewe chuk resamwo fis, pwal mwen kosamwo föri unusen fanüfan en chök Kot seni fansoun esepop tori fansoun esemuch.” (Kölfel 90:1, 2) Pwal ina chék met ewe soufós Aisea a apasa: “Ousap silei usun? Are ousap rong usun? Ewe Samol mi Lapalap eman Kot mi nonom tori feilfeilachök, a föri unusen fanüfan.” (Aisea 40:28) Lón pwal néún Jutas we taropwe, a fós usun án Kot nónnóm “mwen fansoun meinisin.”​—Jutas 25, Testament Mi Fö.

Ekkena wokisin ra pwáraatá pwe Kot i “ewe King mi nonom tori feilfeilachök,” usun met ewe aposel Paulus a áweweei. (1 Timoty 1:17) Weween ese wor poputáán Kot, mi chék nónnóm seni me lóóm, lóóm, lóóm. Me i epwe chék pwal nónnóm tori feilfeiló. (Pwärätä 1:8) Iwe, ina usun napanapen Ewe mi Unusen Manaman.

Pwata a weires ach sipwe weweiti ei mettóch? Pokiten a chék aúkúk ttamen manawach, iwe ach ekiek usun ewe mettóch fansoun a sókko seni án Jiowa ekiek. Pokiten Kot mi chék nónnóm seni fansoun ese pop tori feilfeiló, iwe eú rán me engeréú ier me ren, ra chék wewefengen. (2 Petrus 3:8) Ren chék áwewe, úkúkún ttamen manawen emén lifichifichimas mi watte a chék 50 rán, iwe i mi tongeni weweiti pwe úkúkún ttamen manawach aramas a tongeni tori 70 are 80 ier? Aapw! Nge ewe Paipel a áweweei pwe kich aramas sia usun chék lifichifichimas ika sipwe alélléfengenikich me ewe Chón Férikich mi Lapalap. Pwal mwo nge ach tufichin ekiek, ese akkarap ngeni án Kot ekiek. (Aisea 40:22; 55:8, 9) Iwe, esap eú minen ámáirú ngenikich an epwe wor napanapen Jiowa sise tufichin unusen weweiti.

Inaamwo ika a weires ach sipwe weweiti pwe Kot ese wor poputáán me epwe pwal nónnóm tori feilfeiló chék, nge sia pwal tongeni kúna pwe mi fen pwúng. Ika mi pwal wor emén a féri Kot, iwe epwe itá ina i ewe Chón Fératá. Nge, usun met ewe Paipel a apasa, Jiowa i ewe a “föri mettoch meinisin.” (Pwärätä 4:11) Pwal och, sia silei pwe mi wor ewe atun esaamwo wor unuselapen láng me fénúfan. (Keneses 1:1, 2) Iwe, ia a feito me ie? Mi lamot ewe Emén a fératá epwe akkomw nónnóm. A pwal akkomw nónnóm me mwen ekkewe ménúmanaw mi mirit, áwewe chék ren Néún we áláemén me ekkewe chónláng. (Hiop 38:4, 7; Kolose 1:15) A ffat pwe a wor ewe atun Kot a nónnóm nge i chék áláemén. Iwe, esap tufich án emén epwe féri Kot, pún ese pwal wor emén me lúkún i lón ena atun.

Woren kich aramas me pwal woren unuselapen láng me fénúfan ra pwáraatá pwe mi wor emén Kot mi nónnóm seni fansoun ese pop tori feilfeiló chék. Mi lamot epwe chék nónnóm seni lóóm lóóm ena Emén a isetiw mwékútúkútún unuselapen láng me fénúfan, me anúkúcharatiw ekkewe allúk mi nemeniir. I chék a tongeni fang manaw ngeni ménúmanaw meinisin.​—Hiop 33:4.