Ka fen mwo ekieki ika epwe chék iei usun manawach, pwe sipwe chék kunou, angang, pwúpwúlú, famili me chinnapeló? (Hiop 14:1, 2) Paipel a apasa pwe pwal mwo nge ekkewe aramas mi kon tipachem ra pwal eáni ena ekiek.​—Álleani Än Salomon Afalafal 2:11.

Mi wor popun sia manaw? Akkomw, sipwe eis, Ifa usun manaw a poputá? Mwirin án aramas silei amwararen napanapen tupwuach me kifetin inisich meinisin, chómmóng ra mirititi pwe a wor emén Chón Férikich mi tipachem. (Álleani Kölfel 139:14.) Ika ina, iwe a wor popun a férikichetá! Ach silei ena popun epwe pwári pwe esap iei chék úkúkún nónnómun manawach.

Kot a efeiéchú ewe áeúin pean aramas me a ngeniir eú angang mi kon apwapwa. A tipeni pwe iir repwe chóchchómmóngóló, féri pwe ei fénúfan epwe wiliti eú paratis me manaw wóón feilfeiló chék.​—Álleani Keneses 1:28, 31.

Iwe nge a wor met a ekis eppeti minne Kot a tipeni, ina án ekkewe aramas ú ngeni an nemenem. Nge Kot ese fangetá wóóch me met a tipeni. Paipel a alúkúlúkúkich pwe Kot a kan akkangang pwe epwe amanawa aramas mi tuppwél me apwénúetá minne a tipeni fán iten fénúfan! Kot a mochen óm kopwe eáni ewe manaw a fen tipeni! (Álleani Kölfel 37:29.) Me lón Paipel ka tongeni silei ifa usun kopwe pwisin kúna feiéch seni minne Kot a tipeni.