LESEN 01

Ifa Usun ewe Paipel A Tongeni Álisuk?

PLAY

Kich meinisin sia mochen sileéchú pélúwen ekkewe kapas eis usun manaw, riáfféú, máló, me met epwe fis lón mwachkkan. Sia pwal aúreki manawach rán me rán, áwewe chék ren ifa usun sipwe atufichi manawach are ifa usun epwe wor pwapwa lón ach famili. Chómmóng aramas ra kúna pwe ewe Paipel ese chék álisiir le kúna pélúwen ekkewe kapas eis mi aúchea lón manawach, nge a pwal awora ngeniir emmwen mi álilliséch fán iten manawer iteiten rán. Óm lúkú nge ewe Paipel a tongeni álisi meinisin?

1. Ikkefa ekkóch kapas eis ra pélú me ren ewe Paipel?

A pélú me ren ewe Paipel ekkeei kapas eis mi lamot: Ifa usun manaw a poputá? Met popun sia manaw wóón fénúfan? Pwata aramas ra kúna riáfféú? Met a fis ngeni emén lupwen a máló? Ika meinisin ra mochen an epwe wor kinamwe, nge pwata chék a fiffis chómmóng maun? Met epwe fis ngeni fénúfan lón mwachkkan? Ewe Paipel a pesekich ach sipwe kútta pélúwen ekkena esin kapas eis, me chómmóng aramas ra fen kúna pwe ewe Paipel a fen pélúwenéchú ekkena kapas eis.

2. Ifa usun ewe Paipel a tongeni álisikich le eáni pwapwa lón manawach iteiten rán?

Ewe Paipel a awora ngenikich emmwen mi álilliséch. Áwewe chék, a áiti ngeni ekkewe famili ifa usun repwe enletin pwapwa. A erenikich met sipwe féri atun sia aúrek, me a áiti ngenikich ifa usun sipwe pwapwa lón ach angang. Kopwe káé met ewe Paipel a apasa usun ekkena mettóch me pwal ekkóch pwóróus atun sia káéfengen ei puk. Eli kopwe tipeeú ngeni pwe “kapasen lon ekewe Toropwe mi Pin meinisin . . . ra aüchea.”—2 Timoty 3:16.

Ei puk esap siwilin ewe Paipel. Nge a peseok óm kopwe pwisin etittina met ewe Paipel a apasa. Ina popun, aua peseok óm kopwe álleani ekkewe wokisin mi makketiw lón ekkeei lesen me apépé ngeni met ka kákkáé.

KÚTTAFICHI

Káé ifa usun ewe Paipel a fen álisi aramas, ifa usun kopwe sanaaló le ákkállea, me pwata a múrinné óm kopwe kútta álillis ren óm kopwe weweiti.

3. Ewe Paipel a tongeni emmwenikich

Ewe Paipel a usun saramaramen ttinen efóch tengki. Ewe Paipel a tongeni emmwenikich le kefiléch me álisikich le kúna met epwe fis lón fansoun mwach.

Álleani Kölfel 119:105, me mwirin pwóróusfengen wóón ekkeei kapas eis:

Met meefien ewe mi wisen makkeei ena wokisin usun ewe Paipel?
Met meefiom usun ewe Paipel?

4. Ewe Paipel a tongeni pélúweni ach kewe kapas eis

Emén fefin a kúna pwe ewe Paipel a fen pélúweni ekkewe kapas eis a kan ekkekiekiir ren fite ier. Fichi ei VIDEO, me mwirin pwóróusfengen wóón ekkeei kapas eis.

VIDEO: Kopwe Chék Ápilúkúlúk! (1:48)

Lón ewe video, ikkefa ekkewe kapas eis ewe fefin a eáni?
Ifa usun an kákkáé ewe Paipel a álisi?

Ewe Paipel a pesekich ach sipwe kan tittingor are kakkapas eis. Álleani Lukas 11:9, me mwirin pwóróusfengen wóón ei kapas eis:

Mi wor óm kapas eis ka mochen an epwe pélú me ren ewe Paipel?

5. Ka tongeni sassanaaló óm ákkálleani ewe Paipel

Chómmóng aramas ra sani le ákkálleani ewe Paipel, me ra kúna álillisin. Fichi ei VIDEO, me mwirin pwóróusfengen wóón ekkeei kapas eis.

VIDEO: Állea Paipel (2:05)

Met meefien ekkeei sáráfé lón ei video usun ar ákkállea?
Pwata a sókkóló meefier iei usun ar ákkálleani ewe Paipel?

Ewe Paipel a erá pwe a tongeni awora ngenikich emmwen mi oururukich, me ngenikich ápilúkúlúk. Álleani Rom 15:4, me mwirin pwóróusfengen wóón ei kapas eis:

Ka sani án Paipel kewe pwon usun ourur me ápilúkúlúk?

6. Ekkóch ra tongeni álisikich le weweiti ewe Paipel

Me lúkún án aramas pwisin álleani ewe Paipel, ra kúna pwe a álilliséch ar pwóróus ngeni ekkewe ekkóch usun. Álleani Föför 8:26-31, me mwirin pwóróusfengen wóón ei kapas eis:

Ifa usun sia tongeni weweiti ewe Paipel?—Ppii wokisin 30 me 31.

A lamot ngeni ewe re Itiopia álillis ren an epwe weweiti ekkewe Wokisin. Lón ei fansoun, chómmóng ra kúna álillisin ar pwóróus ngeni aramas usun ewe Paipel

EKKÓCH RA ERÁ: “Ach kákkáé ewe Paipel a chék asolapaaló fansoun.”