Psonm 57:1-11
Pour direkter lanmizik. Dapre ler lanmizik “Pa anmenn maler.” En sanson David. Miktam.* Ler i ti pe sov Sail e kasyet dan kavern.
57 Demontre labonte anver mwan, O Bondye, demontre labonte anver mwan,Parski mon rod ou proteksyonE mon kasyet anba ou lezel ziska ki maler i pase.
2 Mon priy Bondye sa Enn Tre O,Sa vre Bondye ki rezourd mon problenm.
3 Depi dan lesyel, i pou ed mwan e sov mwan.
I pou fer sa enn ki pe atak mwan pa reisi. (Sela)
Bondye pou demontre son lanmour* e son fidelite anver mwan.
4 Mon’n ganny antoure avek bann lyon.Mon bezwen dormi parmi bann zonm ki anvi devor mwan,Bann ki zot ledan i parey lans ek flesE ki zot lalang i koupe parey lepe.
5 O Bondye, montre ki ou pli gran ki lesyel.Ki ou ganny glorifye partou lo later.
6 Zot in met en lasenn pour ki mon tonm dan pyez.Mon’n kourbe akoz problenm.
Zot in fouy en trou devan mwan,Me zot menm ki’n tonm ladan. (Sela)
7 Mon fidel,* O Bondye,Mon fidel.
Mon pou sante e zwe lanmizik.
8 Leve, mon laglwar.
Leve, lenstriman lakord e ou osi larp.
Mon pou lev granmaten.
9 O Zeova, mon pou loue ou parmi bann pep.Mon pou sante* pour loue ou parmi bann nasyon.
10 Parski ou lanmour fidel i gran i ariv ziska dan lesyelE ou fidelite i ariv ziska dan lesyel.
11 O Bondye, montre ki ou pli gran ki lesyel.Ki ou ganny glorifye partou lo later.
Bann not
^ Vwar Leksplikasyon bann mo.
^ Oubyen “lanmour fidel.”
^ Oubyen “Mon leker i ferm.”
^ Oubyen “zwe lanmizik.”
