Zeremi 41:1-18
41 Dan setyenm mwan, Ismael garson Netanya garson Elisama, ki ti kapab vin lerwa* e ki ti enn bann dimoun enportan pour lerwa ti al Mizpa ansanm avek dis lezot zonm kot Gedalya garson Aikam. Ler zot ti Mizpa pe manze ansanm,
2 Ismael garson Netanya ek sa dis zonm ki ti avek li ti leve e touy Gedalya garson Aikam garson Safann avek zot lepe. Alor, i ti touy sa dimoun ki lerwa Babilonn ti’n fer ansarz sa pei.
3 Ismael ti osi touy tou bann Zwif ki ti Mizpa avek Gedalya e osi bann solda Kaldeen ki ti laba.
4 Son lannmen apre ki Gedalya ti’n ganny touye, avan ki okenn dimoun ti konnen ki’n arive,
5 80 zonm ki ti sorti Sekenm, Silo ek Samari ti vini. Zot ti’n raz zot labarb, zot lenz ti’n desire, zot ti’n koup koup zot lekor e zot ti annan bann lofrann lagrenn* ek lansan blan* dan zot lanmen ki zot ti pe anmenn kot lakaz Zeova.
6 Alor Ismael garson Netanya ti sorti Mizpa pour al zwenn zot. I ti pe plere anmezir ki i ti pe marse. Ler i ti zwenn zot, i ti dir zot: “Vin kot Gedalya garson Aikam.”
7 Me ler zot ti antre dan lavil, Ismael garson Netanya ek son bann zonm ti touy zot e zet zot dan basen delo.*
8 Me i ti annan dis zonm parmi zot ki ti dir Ismael: “Pa bezwen touy nou, parski nou annan dible, lorz,* delwil ek dimyel ki nou’n kasyet dan lakanpanny.” Alor i pa ti touy zot ansanm avek zot bann frer.
9 Ismael ti zet lekor tou sa bann zonm ki i ti’n touye dan en gran basen delo, sa basen ki Lerwa Asa ti fer akoz Baasa lerwa Izrael. Sanmenm sa sa basen ki Ismael garson Netanya ti ranpli avek lekor sa bann zonm ki i ti’n touye.
10 Ismael ti pran tou larestan dimoun ki ti Mizpa konman prizonnyen e sa ti enkli bann fiy lerwa ek tou dimoun ki ti ankor Mizpa, ki Nebouzaradann sef gard ti’n met dan prizon kot Gedalya garson Aikam. Ismael garson Netanya ti pran zot konman prizonnyen e i ti al kot bann Amonnit.
11 Ler Zoanann garson Karea ek tou bann sef larme ki ti avek li ti tann tou sa bann move keksoz ki Ismael garson Netanya ti’n fer,
12 zot ti pran tou bann zonm e zot ti ale pour al lager avek Ismael garson Netanya. Zot ti zwenn li Gibeonn o bor sa gran delo.*
13 Tou dimoun ki ti avek Ismael ti kontan ler zot ti vwar Zoanann garson Karea ek tou bann sef larme ki ti avek li.
14 Apre, tou dimoun ki Ismael ti’n pran Mizpa konman prizonnyen ti retournen e zot ti al avek Zoanann garson Karea.
15 Me Ismael garson Netanya ek wit son bann zonm ti sove devan Zoanann e zot ti al kot bann Amonnit.
16 Zoanann garson Karea ek tou bann sef larme ki ti avek li ti pran larestan dimoun ki ti sorti Mizpa, sa bann dimoun ki zot ti sove dan lanmen Ismael garson Netanya apre ki i ti’n touy Gedalya garson Aikam. Zot ti pran bann zonm, bann solda, bann madanm, bann zanfan ek bann zofisye kot pale, ki ti Gibeonn e retourn avek zot.
17 Alor zot ti ale e zot ti al dan en landrwa reste Kimam ki ti o bor Betleenm parski zot ti anvi al Lezip
18 akoz bann Kaldeen. Anfet, zot ti per bann Kaldeen vi ki Ismael garson Netanya ti’n touy Gedalya garson Aikam ki lerwa Babilonn ti’n fer ansarz sa pei.
Bann not
^ Oubyen “desandans sa rwayonm.”
^ Vwar Leksplikasyon bann mo.
^ Vwar Leksplikasyon bann mo.
^ Oubyen “sitern.” Vwar Leksplikasyon bann mo.
^ Lorz i en plant parey dible ki ganny servi pour fer lafarin.
^ Oubyen posibleman, “gran basen.”
