Zozye 5:1-15
5 Dek ki tou bann lerwa Amorit ki ti dan was* Zourden e tou lerwa bann Kananeen ki ti o bor lanmer ti tande ki Zeova ti’n fer sek Larivyer Zourden devan bann Izraelit ziska ki zot ti’n fini traverse, zot ti demoralize* e zot ti perdi kouraz akoz bann Izraelit.
2 Sa letan, Zeova ti dir Zozye: “Fer bann kouto* avek ros e sirkonsi* bann zonm Izrael ankor.”
3 Alor, Zozye ti fer bann kouto avek ros e sirkonsi bann zonm Izrael dan sa landrwa ki ti apel Gibeat-Aaralot.*
4 La rezon akoz Zozye ti sirkonsi zot: Tou bann zonm ki ti’n sorti Lezip, setadir bann zonm lager* ti’n mor dan dezer pandan zot vwayaz apre ki zot ti’n kit Lezip.
5 Tou zonm ki ti’n kit Lezip ti ganny sirkonsi, me tou bann ki ti ne dan dezer pandan sa vwayaz apre ki zot ti’n kit Lezip, pa ti ankor sirkonsi.
6 Bann Izraelit ti’n mars pour 40 an dan dezer ziska ki sa nasyon antye ti mor, setadir sa bann zonm lager ki ti kit Lezip e ki pa ti obei Zeova. Zeova ti fer serman avek zot ki i pa ti pou les zot vwar sa pei ki Zeova ti’n promet zot bann zanset pour donn nou, en pei kot dile ek dimyel i koule.
7 Alor zot bann garson ti ranplas zot. Zot menm zot ki Zozye ti sirkonsi parski zot pa ti ankor ganny sirkonsi pandan sa vwayaz.
8 Ler tou zonm ti’n ganny sirkonsi, bann Izraelit ti reste dan kan ziska ki zot ti’n geri.
9 Alor Zeova ti dir Zozye: “Ozordi mon’n tir* laont ki bann Ezipsyen ti’n met lo zot.” Sanmenm sa, sa landrwa ti ganny apele Gilgal* ziska ozordi.
10 Bann Izraelit ti kontinyen kanpe Gilgal e zot ti selebre Lapak* katorzyenm zour sa mwan, aswar, dan dezer Zeriko.
11 Lannmen apre Lapak, zot ti konmans manz manze ki sa pei ti prodwi, sa i dipen san lelven ek lagrenn griye.
12 Sa menm zour, ler zot ti manz manze ki sa pei ti prodwi, lamann ti aret tonbe. Bann Izraelit ti nepli ganny lamann. Sa lannen zot ti konmans manz manze ki pei Kanaan ti prodwi.
13 Ler Zozye ti ariv o bor Zeriko, i ti vwar en zonm pe debout devan li avek en lepe dan son lanmen. Zozye ti al kot li e demann li: “Eski ou dan nou kote oubyen dan kote nou bann lennmi?”
14 Sa zonm ti reponn: “Non, mon’n vini akoz mon prens* larme Zeova.” Alor Zozye ti tonm azenou lafas anba e dir li: “Mon senyer, ki ou annan pour dir ou serviter?”
15 Prens larme Zeova ti dir Zozye: “Tir ou sandalet dan ou lipye parski sa landrwa kot ou pe debout i sen.” Deswit, Zozye ti tir son sandalet.
Bann not
^ Literalman, “sa kote ki vir avek lanmer.”
^ Literalman, “zot leker ti fonn.”
^ Oubyen “bann kouto byen fite.”
^ Vwar Leksplikasyon bann mo.
^ Sa non i vedir, “Montanny Prepis.”
^ Oubyen “bann zonm ki ti annan laz pour antre dan larme.”
^ Literalman, “roul lwen.”
^ Sa non i vedir, “Roule, Roul lwen.”
^ Vwar Leksplikasyon bann mo.
^ Oubyen “sef.”
