LESON 3
Eski sa bon nouvel dan Labib i vreman sorti kot Bondye?
1. Lekel Loter Labib?
Se dan Labib ki nou trouv sa bon nouvel ki bann dimoun pou viv pour touzour lo later. (Psonm 37:29, NWT) Bondye ti servi apepre 40 zonm pour ekri sa 66 pti liv ki dan Labib. Moiz ti ekri sa senk premye liv apepre 3,500 an pase. Zapot Zan ti ekri sa dernyen liv preski 1,900 an pase. Nide lekel ki sa bann dimoun ti ekri dan Labib? Bondye ti servi son lespri sen pour pas son mesaz avek sa bann ekriven. (2 Samyel 23:2) Sa ki zot ti ekri ti bann panse Bondye, pa zot prop panse. Pour sa rezon, Zeova ki Loter Labib.—Lir 2 Timote 3:16; 2 Pyer 1:20, 21.
Get sa video Lekel loter Labib?
2. Akoz nou kapab asire ki sa ki Labib i dir i laverite?
Nou konnen ki Labib i sorti kot Bondye akoz i predir lavenir dan en fason presi e egzakt. Napa okenn imen ki kapab fer sa. (Zozye 23:14) Zis Bondye Tou Pwisan ki kapab vreman predir lavenir limanite.—Lir Izai 42:9; 46:10.
Si en liv i sorti kot Bondye, i pou bezwen inik e sa i leka. I annan plizyer bilyon kopi Labib dan plizyer santenn langaz ki’n ganny distribye. Menm si i’n ganny ekrir plizyer lannen pase, i annakor avek lasyans. Deplis, sa 40 ekriven pa’n kontredir kanmarad. a An plis ki sa, sa ki Labib i dir lo lanmour i selman kapab sorti kot sa vre Bondye e i ankor annan sa pwisans pour sanz lavi dimoun pour lemeyer. Tousala i konvenk plizyer milyon dimoun ki Labib i Parol Bondye.—Lir 1 Tesalonisyen 2:13.
Get sa video Ki mannyer nou kapab asire ki Labib i vre?
3. Labib i koz lo kwa?
Labib i koz prensipalman lo sa plan ki Bondye i annan pour limanite. I eksplike ki mannyer bann imen ti perdi sa privilez pour viv dan Paradi lo later o konmansman listwar imen e ki mannyer later pou revin en Paradi.—Lir Revelasyon 21:4, 5.
Dan Parol Bondye i annan bann lalwa, prensip ek konsey. I osi rakont tou sa ki Bondye in fer pour bann imen e sa i ed nou pour pli byen konpran son personnalite. Alor, Labib i kapab ed ou konn Bondye e vin son zanmi.—Lir Psonm 19:7, 11; Zak 2:23; 4:8.
4. Ki mannyer ou kapab konpran Labib?
Sa pti liv pou ed ou konpran Labib akoz i servi menm metod ki Zezi. Zezi ti abitye refer avek diferan verse dan Labib e eksplik zot, pour ki bann dimoun i “konpran byen sinifikasyon Lekritir.”—Lir Lik 24:27, 45.
Napa en keksoz ki pli ekstraordiner ki sa bon nouvel sorti kot Bondye, pa i vre? Pourtan, bokou dimoun pa fatig zot ouswa pa aksepte sa ki Labib i dir lo sa bon nouvel. Me ou, pa dekouraze. Ou lespwar pour ganny lavi eternel i tou depan lo si ou aprann konn Bondye.—Lir Zan 17:3.
a Vwar sa pti liv A Book for All People.
