Bondye i oule ki bann dimoun i viv ere lo later. I ti kree later ek tou sa ki annan lo la parski i kontan bann imen. Byento, i pou pran aksyon e bann dimoun dan tou pei pou ganny en pli bon lavenir. I pou tir tou sa ki fer limanite soufer.​—Lir Zeremi 29:11.

 Napa okenn gouvernman ki’n nobou tir vyolans, maladi ek lanmor. Me i annan en bon nouvel. Tre byento Bondye pou retir tou bann gouvernman imen e ranplas zot avek son gouvernman. Bann sitwayen sa gouvernman pou viv anpe e an bonn sante.​—Lir Izai 25:8; 33:24; Danyel 2:44.

 Soufrans pou vreman fini ler Bondye pou retir bann move dimoun lo later. (Zefanya 2:3) Kan ki sa pou arive? Parol Bondye ti predir bann kondisyon ki konmela pe afekte limanite. Sa ki pe arive lo later i montre ki Bondye i pros pour pran aksyon.​—Lir 2 Timote 3:1-5.

 Nou devret aprann lo Bondye atraver son Parol Labib. Labib i parey en let sorti kot en bon papa. Labib i ed nou viv en pli bon lavi la konmela e i montre nou konman pour viv pour touzour lo later a lavenir. I vre, petet serten pa pou kontan ki ou pe aprann plis lo Labib. Me pa les sa gat ou sans pour ganny en lavenir merveye.​—Lir Proverb 29:25; Revelasyon 14:6, 7.