Eski ou’n lir byen bann Latour Veyer pour sa lannen? Vwar si ou kapab reponn sa bann kestyon swivan:

Ki legzanp Zeova in kite lo ki mannyer pour tret bann madanm?

Zeova pa fer lapreferans e i pa kontan bann zonm plis ki bann madanm. Bondye i ekout bann madanm e i enterese avek zot santiman ek bann problenm ki zot fer fas avek. I annan konfyans ki zot kapab fer bann travay ki in donn zot pour fer.—w24.01, paz 15-16.

Ki mannyer nou kapab aplik sa konsey dan Efezyen 5:7, ki dir: “Zot pa devret annan nanryen pour fer avek sa bann dimoun”?

Zapot Pol ti pe dir nou ki nou pa devret pas letan avek bann dimoun ki fer li pli difisil pour nou obei bann standar Zeova. Sa pa zis enkli bann dimoun ki nou pas letan avek an personn me osi bann dimoun lo rezo sosyal.—w24.03, paz 22-23.

Ki kalite fo zistwar ki nou bezwen fer atansyon?

Nou bezwen fer atansyon bann zistwar ki bann frer ek ser in anvoy nou ki pa’n ganny verifye pour konnen si i vre, bann email sorti kot bann dimoun ki nou pa konnen e bann zistwar sorti kot bann aposta ki fer krwar zot enterese pour konn laverite ki sorti dan Labib.—w24.04, paz 12.

Ki nou konnen e ki nou pa konnen konsernan lafason ki Zeova pou ziz Lerwa Salomon, bann dimoun ki ti mor dan lavil Sodonm ek Gomor e bann ki ti mor dan Deliz?

Nou pa konnen si Zeova in deside pour detrir zot pour touzour. Me nou konnen ki Zeova i annan tou bann lenformasyon e i pran pitye.—w24.05, paz 3-4.

Lefet ki Bondye i “sa Ros,” ki nou kapab asire? (Det. 32:4)

Nou kapab rod refiz avek Zeova. I fidel e i pa pou zanmen kit nou setadir ki i toultan gard son bann promes. Osi, i pa sanze setadir son personnalite ek son plan pa zanmen sanze.—w24.06, paz 26-28.

Kwa ki pou ed ou pour adapte dan en nouvo kongregasyon?

Depan lo Zeova parski i pou ed ou parey i ti ed son bann serviter dan lepase. Pa konpar sa kongregasyon ki ou ti ladan avan, avek sa enn nouvo. Reste okipe dan ou nouvo kongregasyon e fer zefor pour fer bann nouvo zanmi.—w24.07, paz 26-28.

Ki nou kapab aprann dan sa trwa legzanp ki dan Matye sapit 25?

Sa legzanp konsernan mouton ek kabri i montre ki nou bezwen annan lafwa e fidel. Sa legzanp konsernan bann vyerz ki ti pridan ek bann ki ti bet i montre ki nou bezwen pare e alert. Sa legzanp konsernan bann talan i montre ki kantite i enportan pour travay dir.—w24.09, paz 20-24.

Ki oter larantre tanp Salomon ti ete?

Dapre serten tradiksyon Labib, 2 Kronik 3:4, i dir ki larantre tanp Salomon ti “120 koude.” Sa ti pou vedir ki sa larantre ti apepre 53 met oter. Me i annan lezot tradiksyon ki dir ki sa larantre ti “20 koude,” ki vedir ki i ti nef met oter. I fer sans ki sa larantre ti mezir “20 koude” parski sa i al byen avek lepeser ki miray tanp ti ete.—w24.10, paz 31.

Ki i vedir ler Labib i dir ki en serviter kongregasyon i “devret annan en sel madanm”? (1 Tim. 3:12)

I vedir ki in marye avek zis en sel madanm e ki i pa devret pe komet imoralite seksyel. Osi, i pa devret donn en latansyon ki pa apropriye avek lezot madanm.—w24.11, paz 19.

Akoz nou kapab dir ki dan Zan 6:53 Zezi pa ti pe montre ki pou arive pandan Repa Senyer?

Zan 6:53 i dir ki i enportan pour nou manz laser Zezi e bwar son disan. Zezi ti dir sa bann parol ler i ti Galile lannen 32. I ti dir sa avek bann Zwif ki ti bezwen demontre lafwa dan li. Tandis ki Zezi ti entrodwir Repa Senyer enn an pli tar ler i ti Zerizalenm. Safwasi, Zezi ti koz avek bann ki pou dirize ansanm avek li dan lesyel.—w24.12, paz 10-11.