YOMARA ek son de frer ki apel Marcelo ek Hiver i reste dan en pti vilaz Guatemala. Yomara ti konmans etidye Labib avek Temwen Zeova e pli tar son de frer osi ti konmans etidye Labib. Me i ti annan en problenm. Yomara ek son de frer ti aveg e zot pa ti konn lir bray. Alor sa frer ki ti fer zot letid ti bezwen lir bann paragraf ek bann verse avek zot.

I ti osi difisil pour zot asiste bann renyon dan kongregasyon. Pour asiste renyon, zot ti pou bezwen vwayaz pour 40 minit ziska kot sa Lasal Rwayonm ki ti pli pre avek kot zot ti reste me zot pa ti kapab vwayaz zot tousel. Alor, bann frer ek ser dan kongregasyon ti fer laranzman pour ed zot asiste tou bann renyon. Ler Yomara ek son de frer ti konmans fer bann prezantasyon dan renyon lasemenn, bann frer ti ed zot pour rapel zot prezantasyon parker.

An Me 2019, bann renyon ti konmans ganny fer dan zot vilaz. Sa letan, en koup ki ti pe servi konman pionye ordiner ti vin reste dan zot vilaz. Sa koup ti vreman anvi montre Yomara ek son de frer ki mannyer pour lir e ekri bray menm si zot zot pa ti konn lir e ekri bray. Zot ti al dan en bibliotek pour aprann konsernan bray ek bann metod pour ansenny en dimoun pour lir bray.

Apre detrwa mwan, Yomara ek son de frer ti kapab lir bray e sa ti fer li posib pour zot annan en lanmitye pli pros avek Zeova. a Aprezan Yomara, Marcelo ek Hiver pe servi konman pionye ordiner. Marcelo i en serviter kongregasyon. Tou le semenn, zot okipe dan servis Zeova. Zot sitan devoue dan servis Zeova ki sa i ankouraz lezot osi pour demontre menm devouman.

Yomara ek son de frer i rekonesan pour sipor ki bann frer ek ser dan kongregasyon in donn zot. Yomara i dir: “Depi premye fwa ler nou ti zwenn Temwen Zeova, zot ti demontre vre lanmour Kretyen anver nou.” Marcelo i dir: “Nou annan bann bon zanmi dan kongregasyon kot nou ete e nou form parti en fanmir enternasyonal ki kontan kanmarad e ki ini.” Yomara ek son de frer pe esper sa zour pour zot vwar ler later i vin en paradi.​—Ps. 37:10, 11; Iza. 35:5.