ESKI ou vwar li difisil pour fer letid personnel tou le semenn? Oubyen eski parfwa ou vwar ki ou letid pa gou? Nou tou nou santi koumsa parfwa. Me mazin lezot keksoz ki nou fer regilyerman, par egzanp bennyen. I pran letan ek lenerzi pour nou bennyen me apre ki nou’n fer li, nou santi nou pli byen. Dan menm fason, nou letid Labib personnel i kapab fer nou santi nou pli byen. (Efe. 5:26) Annou vwar serten sizesyon ki kapab ed nou:

• Swazir en letan spesifik pour etidye. Letid personnel i parmi bann keksoz “ki pli enportan” ki en Kretyen i bezwen fer. (Fili. 1:10) Pour ou pa oubliye, petet ou kapab met ou progranm dan en landrwa kot ou pou fasilman vwar par egzanp lo fridz oubyen lo en bord. Ouswa ou kapab met en alarm lo ou telefonn ki pou fer ou rapel kan in ler pour ou fer ou letid.

• Reflesir lo kwa ki pou ed ou konsantre pli byen. Kwa ki pli fasil pour ou? Par egzanp, eski ou vwar li pli fasil pour konsantre si ou fer letid pour enn erdtan? Oubyen eski ou ti pou prefere etidye pour en pli ptigin letan me pli souvan? Ou ki konnen kwa ki pli bon pour ou. Alor gard sa antet ler ou pe plàn kan ki ou pou etidye. Si ler in ariv ler pour etidye, ou pa anvi, petet ou kapab esey fer letid pour zis dis minit. Menm si ou etidye pour zis dis minit, ou kapab aprann bokou plis keksoz ki si ou pa etidye ditou. Enn fwa ki ou’n konmanse, petet ou pou sitan kontan sa moman ki ou pou anvi kontinyen etidye.—Fili. 2:13.

• Swazir ou topik davans. Si ou espere ziska ler ou pe al etidye pour swazir sa topik ki ou pou etidye, sa i kapab vedir ki ou pa pe “servi byen [ou] letan.” (Efe. 5:16) Akoz ou pa gard en lalis bann lartik oubyen topik ki ou ti pou kontan etidye? Par egzanp, sak fwa ki ou annan en kestyon konsernan en keksoz ki ou pa vreman konpran, ekri sa kestyon dan lalis bann topik ki ou ti pou kontan etidye. A lafen ou letid, petet ou kapab azout lezot keksoz dan ou lalis bann topik ki ou ti pou kontan etidye.

• Fer bann sanzman ler i neseser. Sa ki pli enportan i ki ou fer letid personnel sak semenn. Pour ou kapab fer sa, i kapab ki ou pou bezwen sanz sa zour ek ler ki ou etidye, lakantite letan ki ou etidye oubyen sa topik ki ou pou etidye.

Si nou fer nou letid personnel regilyerman, sa pou anmenn en kantite byenfe. Nou pou vin pli pros avek Zeova, nou pou aprann pour fer bann bon desizyon e nou pou ganny plis kouraz.—Zoz. 1:8.