Par egzanp, Sally a en madanm ki reste Leta-z-ini ti perdi laplipar son bann keksoz apre en siklonn. Sally i dir: “Mon ti santi ki mon pa kapab fer fas avek okenn problenm ankor. Pour en pe letan mon’n santi konmsi mon nepli kapab.”

En lot problenm ki bokou dimoun i fer fas avek i ler en dimoun ki nou kontan i mor. Janice, en madanm ki reste Lostrali i dir: “Ler mon de garson ti mor, mon ti bezwen kontiny mon lavi malgre tou keksoz ti’n boulverse. Mon ti sipliy Bondye: ‘Silvouple, mon’n ganny ase! Zis les mwan mor. Mon pa anvi kontinyen viv.’”

Daniel li ti dezespere ler son madanm ti tronp li. I dir: “Ler mon madanm ti dir mwan ki in tronp mwan, i ti konmsi en kouto ti’n pik mwan kot mon leker. I ti konmsi mon pe ganny pike plizyer fwa e mon ti santi sa douler pour plizyer mwan.”

Sa Latour Veyer pou koz lo akoz i vo lapenn kontinyen viv ler

• dezas natirel i arive

• en dimoun ki nou kontan i mor

• ou konzwen i tronp ou

• ou annan en maladi grav

• lavi i tro difisil

Premyerman, annou vwar ki mannyer nou kapab kontinyen viv apre ki en dezas natirel in arive.