Dimoun ki annan limilite i annan respe pour lezot. Zot pa arogan ni menm ekspekte ki lezot i tret zot konman bann dimoun spesyal. O kontrer, en dimoun ki annan limilite i annan en lentere senser dan lezot e i anvi aprann avek zot.

Par ler serten dimoun i krwar ki limilite i en febles me sa i pa vre. O kontrer, i en pwen for ki ed dimoun konn zot febles e aksepte ki zot annan limit.

• Limilite i fer annan bann bon lanmitye. Sa liv The Narcissism Epidemic i dir: “An zeneral, i pli fasil pour en dimoun ki annan limilite fer zanmi e zot vwar li fasil pour koz e asosye avek lezot.”

• Limilite pour ed ou zanfan dan lavenir. Si ou zanfan i aprann devlop limilite la konmela, i pou pli fasil pour li ganny en travay pli tar. Dr. Leonard Sax i ekri: “Si en zenn i annan en tro gran lopinyon lo li menm e i pa konn son limit, sa pa pou donn en bon lenpresyon lo li ler i fer en laplikasyon pour en travay. Sa zenn ki vreman anvi konnen kwa ki enportan pour sa dimoun ki pe entervyou li, tre probab i pou ganny sa travay.” *

Ed ou zanfan pour pa annan en tro gran lopinyon lo li menm.

PRENSIP LABIB: “Si en dimoun i krwar i enportan me i en nanryen ditou, i pe anbet son prop lekor.”​—Galat 6:3.

• Evite anbet ou zanfan. Petet ou krwar ou pe motiv ou zanfan si ou dir li, “Tou ou rev i kapab vin vre” e “Ou kapab vin sa ki ou anvi” me souvan sa i pa vreman arive. Ou zanfan pou pli reisi si zot annan bann lobzektif rezonnab e travay dir pour atenn zot lobzektif.

• Felisit ou zanfan lo bann keksoz spesifik ki i fer. Si tou sa ki ou zanfan i fer ou zis dir li ki in byen fer, sa pa pou ankouraz li pour annan limilite. Nou devret spesifik ler nou felisit nou zanfan.

• Vey lafason ou zanfan i servi rezo sosyal. Souvandfwa lo rezo sosyal, dimoun i kontan ponp zot lekor ek koz lo tou sa ki zot in akonpli me sa i lekontrer avek limilite.

• Ankouraz ou zanfan pour demann leskiz vitman. Ler ou zanfan i fer en keksoz mal, ed li konpran ki sa ki in fer i mal e pour aksepte son fot.

 Montre ou zanfan ki mannyer pour apresye keksoz.

PRENSIP LABIB: “Montre zot rekonesans.”​—Kolosyen 3:15.

• Apresye kreasyon. Zanfan i devret apresye lanatir e zot devret konpran ki nou bezwen sa bann keksoz pour viv. Nou bezwen ler pour nou respire, delo pour nou bwar e manze pour nou manze. Servi sa bann legzanp pour ankouraz ou zanfan apresye tou sa bann zoli keksoz ki nou Kreater in kree.

• Apresye abilite lezot. Ed ou zanfan konpran ki i annan serten keksoz ki lezot i kapab fer pli byen ki li e ki i pa devret zalou zot abilite. Plito, montre li ki mannyer i kapab aprann avek zot.

• Apresye sa ki lezot i fer. Ankouraz ou zanfan pour pa zis dir “mersi” me pour osi demontre lapresyasyon pour sa ki lezot i fer pour zot. Ler ou zanfan i annan sa leta lespri rekonesan, sa pou ed li kontinyen annan limilite.

Montre ou zanfan ki i bon pour fer bann bon keksoz pour ed lezot.

PRENSIP LABIB: “Avek limilite konsider lezot pli siperyer ki zot. Deplis, pa rod zis zot prop lentere, me lentere lezot osi.”​—Filipyen 2:3, 4.

• Montre ou zanfan pour fer louvraz kot lakour. Si ou dir ou zanfan ki i pa bezwen ede kot lakour, sa pou fer li krwar ki sa ki i anvi fer i pli enportan ki fer louvraz. Fer louvraz lakour i devret vin premye e apre i kapab al zwe. Montre sa zanfan ki ler i fer louvraz kot lakour, sa i benefisye lezot dan lakour, zot pou apresye e respekte li.

• Fer ou zanfan konnen ki i en privilez pour servi lezot. Ler ou zanfan i fer keksoz pour lezot, sa pou ed li devlope pour vin matir. Alor, ankouraz ou zanfan pour rode lekel ki bezwen led. Koz avek ou zanfan lo ki i kapab fer pour ed sa bann dimoun. Ler ou zanfan i ed lezot, felisit li e montre ki ou siport li.