BIOGRAFI

Pare pour servi Zeova nenport kote

Rakonte par Markus ek Janny Hartlief

Mon pa ti’n zanmen pres mon tousel oparavan. Mon ti telman per ki mon lipye ti tranble sak fwa mon ti sorti pour al prese. Sa ki pli pir ankor se ki dimoun dan sa teritwar pa ti oule ekoute. Serten ti vreman agresif e menm menase pour bat mwan. Premye mwan dan servis pionye, mon ti kapab plas zis en pti liv.​—Markus.

SA TI an 1949, plis ki 60 an pase, me mon zistwar i konmans en bann letan avan. Mon papa Hendrik ti travay konman en kordonnyen ek zardinyen Donderen, en pti vilaz dan nor Drenthe, Pei Ba. Mon ti ne laba an 1927 e mon ti katriyenm dan set zanfan. Nou lakaz ti o bor en semen dan en distrik dan lakanpanny. Laplipar nou bann vwazen ti fermye e mon ti kontan sa lavi. An 1947, kan mon ti annan 19 an, nou vwazen Theunis Been ti koz avek mwan lo laverite. Mon rapel ki mon pa ti kontan Theunis kan mon ti zwenn li pour premye fwa, me en pti pe letan apre Dezyenm Lager Mondyal, i ti vin en Temwen Zeova e mon ti remarke ki i ti’n vin pli amikal ki avan. Sa sanzman dan son personnalite ti enpresyonn mwan, alor mon ti ekout li kan i ti koz avek mwan lo promes Bondye konsernan en paradi lo later. Deswit mon ti aksepte laverite e nou ti vin de bon zanmi. *

Mon ti konmans prese an Me 1948, e son mwan answit, le 20 Zen, mon ti batize pandan lasanble distrik Utrecht. Le 1 Zanvye 1949, mon ti konmans fer pionye e mon ti ganny anvoye Borculo, dan les Pei Ba kot i ti annan en pti kongregasyon. Mon ti pou bezwen vwayaz 130 kilomet pour ariv laba, alor mon ti deside al lo mon bisiklet. Mon ti krwar i ti pou pran mwan apepre 6 erdtan, me akoz i ti annan gro lapli ek gro divan, mon ti pran 12 erdtan pour arive, menm si mon ti pran tren  letan i ti reste 90 kilomet pour mwan ale. Finalman, mon ti ariv kot mon destinasyon tar aswar. Mon ti ariv kot lakour sa fanmir Temwen ki mon ti pou reste avek pandan ki mon ti fer pionye dan sa rezyon.

Diran bann lannen zis apre lager, dimoun ti napa bokou keksoz. Mwan, mon ti annan zis en palto ek en kannson, sa palto ti tro gran e sa kannson ti tro kourt. Parey mon’n dir dan lentrodiksyon, i ti difisil pour mwan sa premye mwan Borculo, me Zeova ti beni mwan avek plizyer letid Labib. Apre nef mwan, mon ti ganny anvoye Amsterdam.

SORTI LAKANPANNY POUR AL DAN LAVIL

Mon ti’n grandi dan en landrwa agrikol, me la aprezan mon ti Amsterdam, sa pli gran lavil Pei Ba. Bokou dimoun ti ekoute laba. Diran premye mwan, mon ti plas plis piblikasyon ki sa nef mwan avan. Pa tro lontan apre, mon ti annan wit letid Labib. Apre ki mon ti ganny apwente serviter kongregasyon (ki konmela i apel kordinater konsey ansyen), mon ti ganny sa privilez pour donn mon premye diskour. Mon ti en pe per, alor mon ti vreman santi mwan soulaze kan mon ti ganny anvoye dan en lot kongregasyon zis avan dat ki mon ti’n ganny demande pour fer sa diskour. Mon pa ti konnen sa letan ki plitar mon ti pou fer plis ki 5,000 diskour!

Ver Me 1950, mon ti ganny anvoye Haarlem. Apre sa, mon ti ganny demande pour vin sirveyan rezyonal. Pour trwa zour, apenn si mon ti kapab dormi. Mon ti dir Robert Winkler, enn bann frer ki ti pe servi kot biro brans ki mon pa ti santi mwan kalifye, me i ti dir mwan: “Zis ranpli bann papye. Ou pou aprann.” En pti pe letan apre sa, mon ti ganny en formasyon pour en mwan e mon ti konmans servi konman sirveyan rezyonal. Pandan en vizit ki mon ti fer dan en kongregasyon, mon ti zwenn Janny Taatgen, en zenn pionye byen amikal ki ti kontan Zeova en kantite e ki ti annan en leta lespri sakrifis. Nou ti marye an 1955. Me avan ki mon kontiny mon zistwar, Janny pou eksplike ki mannyer i ti vin en pionye, e nou servis ansanm apre ki nou ti’n marye.

NOU SERVIS KONMAN EN KOUP MARYE

Janny: Mon manman ti vin en Temwen an 1945 ler mon ti annan 11 an. Deswit apre, i ti vwar sa lenportans pour etidye Labib avek son trwa zanfan, me mon papa ti opoz laverite, alor i ti ansenny nou letan ki i pa ti kot lakour.

Premye renyon mon ti asiste ti en lasanble distrik The Hague an 1950. En semenn plitar, mon ti asiste mon premye renyon kot Lasal Rwayonm Assen, (Drenthe). Mon papa ti vreman ankoler e i ti pous mwan. Mon manman ti dir mwan, “Ou konnen kote ou kapab reste.” Mon ti konnen ki i ti pe refer avek mon bann frer ek ser spirityel. Mon ti premyerman reste avek en fanmir Temwen  ki pa ti reste tro lwen, me mon papa ti pe kontinyen fer keksoz difisil pour mwan, alor mon ti al dan kongregasyon Deventer (Overijssel) ki ti apepre 95 kilomet pli lwen. Me, mon ti ankor anba laz, alor mon papa ti ganny problenm avek lotorite akoz i ti’n met mwan deor. An rezilta sa, i ti dir mwan ki mon ti kapab retourn dan lakour. Menm si mon papa pa ti zanmen aksepte laverite, finalman i ti les mwan asiste tou renyon e al prese.

En pti pe letan apre ki mon ti’n retourn dan lakour, mon manman ti tonm gravman malad e mon ti bezwen okip lakour. Malgre sa, mon ti kontinyen progrese spirityelman e mon ti batize an 1951 a laz 17 an. An 1952, apre ki Manmi ti’n rekipere, mon ti fer pionye asistan pour de mwan ansanm avek trwa lezot ser. Nou ti reste lo en bato e nou ti pres dan de lavil Drenthe. An 1953, mon ti vin en pionye ordiner. Enn an plitar, en zenn sirveyan rezyonal ti vizit mon kongregasyon e sa ti Markus. Nou ti marye an Me 1955 akoz nou ti santi ki konman en koup nou ti pou servi Zeova pli byen.​—Ekle. 4:9-12.

Markus: Apre nou maryaz, nou ti ganny anvoye konman pionye Veendam, (Groningen). Nou ti reste dan en pti lasanm ki ti apepre 2 par 3 met. Kantmenm sa, Janny ti aranz sa lasanm byen konfortab. Tou le swar, nou ti bezwen deplas nou latab ek de pti sez pour fer desann nou lili ki ti dan miray.

Apre sis mwan, nou ti ganny envite pour servi konman sirveyan rezyonal Belzik. An 1955, i ti annan zis apepre 4,000 proklanmater dan sa pei. Konmela i annan sis fwa plis. Laba Flanders, dan nor Belzik, dimoun i koz menm langaz ki bann zabitan Pei Ba. Me, zot aksan i diferan, alor o konmansman nou ti bezwen esey abitye avek zot aksan.

Janny: I ti demann en vre leta lespri sakrifis pour fer travay rezyonal. Nou ti vizit bann kongregasyon lo nou bisiklet e reste avek nou bann frer ek ser. Vi ki nou ti napa en lakour kot nou ti kapab reste apre ki nou ti’n vizit en kongregasyon, nou ti reste laba ziska Lendi e al dan lot kongregasyon Mardi bomaten. Me nou ti touzour konsider nou servis konman en benediksyon sorti kot Zeova.

Markus: O konmansman, nou pa ti konn okenn frer ek ser dan kongregasyon, me zot ti vreman zantiy e demontre lospitalite anver nou. (Ebr. 13:2, not.) Pandan plizyer lannen, plizyer fwa nou ti vizit tou bann kongregasyon Belzik ki koz Dutch. Nou’n resevwar en kantite benediksyon akoz sa. Par egzanp, nou ti arive konn tou bann frer ek ser dan rezyon ki ti koz Dutch e nou kontan zot en kantite. Nou’n vwar bokou zenn grandi fizikman e progrese pour vin matir spirityelman e dedye zot lavi avek Zeova par met lentere Rwayonm premye dan zot lavi. I vreman en gran lazwa pour vwar en kantite parmi  zot pe servi Zeova fidelman dan servis a plen tan. (3 Zan 4) Sa lesanz “lankourazman” in fer li fasil pour nou kontinyen dan nou servis avek tou nou leker.​—Rom. 1:12.

EN GRAN DEFI E EN VRE BENEDIKSYON

Markus: Depi ki nou’n marye, nou’n toultan anvi asiste Lekol Gilead. Tou le zour, nou ti aprann Angle pour omwen enn erdtan. Me, i pa ti fasil pour aprann Angle dan liv, alor nou ti deside pour al Langleter dan nou vakans pour pratik sa langaz dan predikasyon. A lafen, an 1963, nou ti resevwar en lanvlop sorti kot biro prensipal Brooklyn. Ladan i ti annan de let, enn pour mwan e enn pour Janny. Dan mon let, i ti annan lenvitasyon pour asiste en formasyon dis mwan Gilead. Sa kour ti met plis lanfaz lo form bann frer e donn zot bann lenstriksyon konsernan lorganizasyon. Alor, parmi sa 100 etidyan ki ti ganny envite, 82 ti bann frer.

Janny: Dan sa let ki mon ti resevwar sa zour, mon ti ganny demande pour priye pour vwar si mon pare pour reste Belzik letan ki Markus i al Gilead. Fransman, mon ti vreman dezapwente o konmansman. I ti paret konmsi Zeova pa ti’n beni zefor ki mon ti’n fer pour fer plis. Kantmenm sa, mon ti rapel mon lekor bi Lekol Gilead, setadir, i’n ganny fer pour ed sa bann ki asiste pour akonplir sa travay predikasyon dan lemonn antye. Alor, mon ti dakor pour reste deryer e servi konman pionye spesyal Ghent, en lavil Belzik ansanm avek Anna ek Maria Colpaert, de pionye spesyal eksperyanse.

Markus: Lefet ki mon ti bezwen amelyor mon Angle, mon ti ganny envite pour al Brooklyn senk mwan avan ki lekol ti konmanse. Mon ti travay dan departman Eksportasyon ek departman Servis. Lefet ki mon ti servi kot biro prensipal pour ede dan eksportasyon bann piblikasyon Lazi, Lerop ek Sid Lanmerik, sa ti fer mwan pli konsyan lasosyasyon mondyal nou bann frer ek ser. Mon sirtou rapel Frer Alexander Macmillan, ki ti en sirveyan pandan lepok Frer Russell. I ti byen aze sa lepok e i ti en pe sourd, me i ti fidelman asiste tou renyon kongregasyon. Sa ti annan en gran lefe lo mwan e montre mwan ki nou pa devret pran alalezer nou lasosyasyon avek nou bann frer ek ser.​—Ebr. 10:24, 25.

Janny: Nou de Markus nou ti ekrir kanmarad plizyer fwa dan en semenn. Nou ti mank kanmarad en kantite! Kantmenm sa, Markus ti byen kontan sa formasyon ki i ti pe gannyen Gilead e mwan mon ti ganny bokou lazwa dan minister. Letan ki Markus ti retournen sorti Leta-z-ini, mon ti pe kondwir 17 letid Labib! I ti en gran defi pour nou separe pour 15 mwan, me mon ti vwar ki Zeova ti beni nou pour bann sakrifis ki nou ti fer. Zour ki Markus ti retournen, avyon ti tarde pour plizyer erdtan, alor, letan ki i ti finalman arive, nou ti plere dan lebra kanmarad. Depi sa, nou enseparab.

REKONESAN POUR TOU PRIVILEZ

Markus: Ler mon ti retournen sorti Gilead an Desanm 1964, nou ti ganny anvoye Betel. Menm si sa letan nou pa ti konnen, nou pa ti pou permanan dan Betel. Zis trwa mwan plitar, mon ti ganny demande pour fer sirveyan distrik Flanders. Kan  Aalzen ek Els Wiegersma ti ganny anvoye konman misyonner Belzik, e Aalzen konman sirveyan distrik, nou nou ti retourn Betel kot mon ti pe travay avan, dan Departman Servis. Depi 1968 ziska 1980, nou’n sanz servis plizyer fwa, swa dan Betel, swa dan servis rezyonal. Finalman, depi 1980 ziska 2005, mon ti servi ankor konman sirveyan distrik.

Menm si detanzantan nou servis ti sanze, nou pa ti zanmen oubliye ki nou ti’n dedye nou lavi pour servi Zeova avek tou nou leker. Nou’n vreman apresye sak privilez ki nou ti gannyen, e nou annan konfyans ki nenport sanzman ki arive, tousala i annan pour fer avek lentere Rwayonm.

Janny: Mon’n sirtou kontan pour al avek Markus Brooklyn an 1977 e Patterson an 1997 kan i ti ganny lezot formasyon konman manm Komite Brans.

ZEOVA I KONN NOU BEZWEN

Markus: An 1982, Janny ti fer en loperasyon e apre rekipere. Trwa-z-an plitar, kongregasyon Louvain ti ofer nou en apartman par lao Lasal Rwayonm. Pour premye fwa dan 30 an, nou ti annan en pti landrwa pour nou menm. Dan Mardi, ler nou ti met pare pour al vizit en lot kongregasyon, mon ti bezwen monte desann 54 mars peron plizyer fwa pour al sers nou bagaz! Granmersi, an 2002, en laranzman ti ganny fer pour ki nou annan en apartman ki anba. Apre ki mon ti’n ganny 78 an, nou ti ganny anvoye pour servi konman pionye spesyal dan lavil Lokeren. Nou vreman kontan ki nou kapab servi Zeova dan sa fason e ki nou ankor pe prese tou le zour.

Janny: An tou, nou’n pas plis ki 120 an dan servis a plen tan! Nou’n personnelman eksperyans laverite dan promes Zeova ki i ‘pa pou zanmen abandonn nou’ e ki si nou servi li fidelman, nou pa pou ‘mank nanryen.’​—Ebr. 13:5; Det. 2:7.

Markus: Kan nou ti zenn, nou ti dedye nou lavi avek Zeova. Nou pa ti rod bann gran keksoz. Nou’n pare pour aksepte okenn kalite servis akoz nou konvenki ki pa kot nou pe servi, ni nou abilite ki enportan, me plito sa Enn ki nou pe servi.

[Not anba lo paz]

[Portre lo paz 27]

[Portre lo paz 28]

Markus (kote drwat) pe pres lo semen pros avek Amsterdam an 1950

[Portre lo paz 28]

Janny (lwen kote drwat) pe fer pionye asistan an 1952

[Portre lo paz 29]

Zour nou maryaz an 1955

[Portre lo paz 30]

[Portre lo paz 31]

“Nou konvenki ki pa kot nou pe servi, ni nou abilite ki enportan, me plito sa Enn ki nou pe servi”