Ki nou kapab fer pour ed lezot

FRANÇOIS, en ansyen dan en pei ki pe devlope i rakonte: “Plizyer milye Temwen Zeova ti bezwen kit zot lakour akoz en kantite vyolans apre en eleksyon. I ti napa ase manze ek latizann e sa ki ti annan ti vreman ser. Labank ti fermen e masin tir larzan ti vid oubyen ti nepli fonksyonnen.”

Bann frer kot biro brans Temwen Zeova ti konmans anvoy larzan ek komodite de baz pour bann Temwen ki ti’n rasanble dan bann Lasal Rwayonm dan sa pei. Bann group rebel ti met bann baraz lo semen, me vi ki zot ti konnen Temwen Zeova pa pran okenn kote dan bann zafer politik, laplipar ditan zot ti les bann kanmiyon Betel pase.

François i dir: “Ler nou ti pe al kot en Lasal Rwayonm, bann dimoun ti tir koudfe lo nou kanmiyon. Me, bann bal ti pas drwat dan milye nou. Ler nou ti vwar en solda pe tay ver nou avek son fizi dan son lanmen, nou ti fer aryer en sel kou e retourn kot biro brans. Nou ti remersye Zeova ki nou ti ankor vivan. Son lannmen, sa 130 frer ek ser ki ti kot sa Lasal Rwayonm ti reisi ariv dan en landrwa an sekirite. Serten ti vin kot biro brans, kot nou ti pran swen avek zot bezwen spirityel ensi ki zot bezwen materyel ziska ki sa sityasyon ti amelyore.”

François i dir: “Pli tar, biro brans ti ganny en kantite let sorti kot bann frer ek ser partou dan pei ki ti pe eksprim zot lapresyasyon. Zot konfyans dan Zeova ti vin pli for ler zot ti vwar tou sa ki zot bann frer ek ser ti’n fer pour zot.”

Kan i annan bann dezas natirel ouswa dezas koze par zonm, nou pa dir bann frer ek ser ki dan bezwen “gard ou so, e manz byen.” (Zak 2:15, 16) Plito, nou esey rod fason pour pran swen avek zot bann bezwen fizik. Pareyman, apre ki zot ti’n ganny averti konsernan en lafamin dan premye syek, “bann disip ti deside pou anvoy en kontribisyon selon zot mwayen pour bann frer ki ti reste dan Zide.”​—Akt 11:28-30.

Konman serviter Zeova, nou vreman anvi ed sa bann ki dan bezwen materyel. Par kont, sa bann dimoun i osi annan en bezwen spirityel. (Mat. 5:3) Pour ed zot konsyan ki zot annan sa bezwen e pour satisfer li, Zezi ti donn lord son bann disip pour fer disip. (Mat. 28:19, 20) Endividyelman nou depans en kantite letan, lenerzi ek resours pour akonpli sa travay. Konman en lorganizasyon, nou servi bann kontribisyon pour donn led materyel, me, sa bann kontribisyon i prensipalman pour promot lentere Rwayonm e propaz sa bon nouvel. Dan sa fason, nou demontre nou lanmour pour Bondye ek nou prosen.​—Mat. 22:37-39.

Sa bann ki siport sa travay mondyal ki Temwen Zeova pe fer i kapab asire ki zot kontribisyon pe ganny byen servi. Eski ou kapab ed ou bann frer ek ser ki dan bezwen? Eski ou ti a voudre siport sa travay pour fer disip? Si wi, “pa refiz sa ki byen bann ki merite, ler i dan pouvwar ou lanmen pour fer li.”​—Prov. 3:27.

[Portre lo paz 8]

 [Bwat lo paz 9]

KI MANNYER SERTEN I KONTRIBYE ANVER SA TRAVAY MONDYAL

Parey dan letan Pol, bokou dimoun ozordi i “met dekote” en pti larzan pour met dan bwat kontribisyon “Travay Mondyal.” (1 Kor. 16:⁠2) Sak mwan, bann kongregasyon i anvoy sa bann kontribisyon kot biro brans Temwen Zeova ki okip sa pei. I osi posib pour ou anvoy bann donasyon direkteman kot en lasosyasyon ki Temwen Zeova i servi dan ou pei. Pour konn son ladres, silvouple pran kontak avek biro brans ki okip ou pei. Lo www.pr2711.com, ou kapab trouv ladres biro brans. I annan diferan kalite donasyon:

DONASYON

• Donasyon larzan, bizou ouswa lezot keksoz personnel ki annan valer.

• Anvoy en let ki endike ki sa larzan ouswa keksoz i en donasyon.

BANN DONASYON KONDISYONNEL

• Donn larzan avek en kondisyon ki si ou bezwen, ou kapab repran.

• Anvoy en let ki endike ki sa donasyon i kondisyonnel.

CHARITABLE PLANNING

Apard larzan ek keksoz ki annan valer, i annan lezot metod pour fer bann donasyon pour lentere Rwayonm dan lemonn antye. Zot ganny endike pli ba. Nenport metod ki ou servi, silvouple premyerman kontakte biro brans Temwen Zeova pour vwar ki metod ki kapab ganny servi dan ou pei. Vi ki rekomandasyon ek lalwa pour taks i varye, i vreman enportan pour demann en zofisye taks ouswa en avoka konsernan sa pli bon fason pour fer kontribisyon.

Lasirans: En donasyon kot ou spesifye ki en lasosyasyon ki Temwen Zeova i servi ki benefisyer sa lasirans lavi ouswa pansyon.

Kont labank: Nou kapab fer laranzman pour ki ler nou mor, sa larzan ki lo nou kont labank, depozit ouswa okenn lezot reveni i ganny donnen avek en lasosyasyon ki Temwen Zeova i servi dapre regilasyon labank dan sa pei.

Stocks ek Bonds: Bann stocks ek bonds (lenvestisman) i kapab ganny donnen avek en lasosyasyon ki Temwen Zeova i servi, swa direkteman ouswa atraver en Transfer on Death agreement.

Propriyete: Later oubyen lakaz ki kapab ganny revann i kapab ganny donnen avek en lasosyasyon ki Temwen Zeova i servi swa direkteman, ouswa donn sa propriyete me gard son drwa zwisans ziska son lanmor.

Gratwite: Bann gratwite, larzan sekirite sosyal oubyen pansyon i kapab ganny donnen tou le-z-an diran zot lavi avek en lasosyasyon ki Temwen Zeova i servi dapre laranzman sa donater ouswa dimoun ki sa donater in swazir. Sa donater i kapab resevwar en rediksyon taks sak lannen dapre lakantite ki i pe donnen.

Testaman ouswa Trusts: Par fer en testaman legal, en propriyete ouswa larzan i kapab ganny donnen avek en lasosyasyon ki Temwen Zeova i servi ouswa sa lasosyasyon i kapab benefisye avek bann reveni en trust. Sa laranzman i kapab donn serten lavantaz lo kote taks.

Sa bann diferan fason pour fer donasyon i apel an Angle “charitable planning,” sa i montre ki en dimoun ki anvi fer en donasyon i devret planifye davans konsernan kalite donasyon ki i anvi fer. Si en dimoun i oule fer en donasyon, i annan en brosir avek tit Charitable Planning to Benefit Kingdom Service Worldwide ki’n ganny prepare an Angle ek Espanyol. Sa brosir ti ganny ekrir pour donn lenformasyon lo diferan fason ki bann donasyon i kapab ganny fer la konmela oubyen pli tar ler sa dimoun i mor, par egzanp par fer en testaman. Lenformasyon dan sa brosir i kapab pa totalman aplikab pour ou sityasyon akoz taks ouswa lezot lalwa dan ou pei. Alor, apre ki ou’n lir sa brosir, ou devret diskit avek ou avoka ouswa en zofisye taks. An servan sa metod pour fer donasyon, bokou in kapab ede siport nou bann aktivite relizye e imaniter dan lemonn e pa pey sa kantite taks. Si i disponib dan ou pei, ou kapab demann en kopi avek sekreter kongregasyon.

Pour plis lenformasyon ou kapab kontakte Charitable Planning Office, swa par telefonn ouswa ekri sa ladres pli ba oubyen ou kapab kontakte biro brans ki ou pe okip sa pei.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive

Patterson, New York 12563-​9204

U.S.A.

Telefonn: (1) (845) 306-​0707