LO KOUVERTIR | ESKI NOU BEZWEN BONDYE?

Akoz nou bezwen Bondye?

Bann eksper lasante mantal i dir ki bann dimoun i bezwen bann valer spirityel pour kapab vreman ere. Nou vwar sa akoz dimoun i anvi fer en keksoz ki fer sans pour zot oubyen servi en dimoun ki pli enportan ki zot. Pour satisfer sa bezwen, serten i pas zot letan lwazir dan lanatir oubyen fer bann keksoz ki annan pour fer avek lar, lanmizik ek lezot ankor. Me avek letan laplipar zot pa vreman satisfe avek sa bann keksoz.

Lefet ki imen in ne avek en bezwen spirityel, sa i pa sirprenan pour bann ki lir Labib. Bann premye sapit dan liv Zenez i endike ki apre ki Bondye ti’n kre sa premye koup imen, i ti koz avek zot regilyerman e sa ti permet zot annan en relasyon spesyal avek li. (Zenez 3:8-10) Bondye pa’n kre imen pour viv san li. Zot annan sa bezwen pour kominik avek zot Kreater. Labib i koz lo sa bezwen plizyer fwa.

Par egzanp, Zezi ti dir: “Ere bann ki konsyan zot bezwen spirityel.” (Matye 5:3, NW) Atraver sa parol, nou kapab dir ki satisfer nou bezwen spirityel ki nou’n ne avek i en laspe esansyel pour nou viv en lavi ere e satisfezan. Ki mannyer nou kapab fer sa? Zezi ti donn larepons sa kestyon ler i ti dir: “Zonm pa viv zis lo dipen tousel me lo tou parol ki sorti dan labous Bondye.” (Matye 4:4) Dan ki fason tou parol, setadir, bann panse ek lenstriksyon Bondye dan Labib i fer li posib pour nou viv en lavi ere ki annan en bi? Annou vwar trwa fason enportan.

Nou bezwen bon gidans

Ozordi i annan en kantite eksper ek spesyalis ki pare pour donn konsey lo relasyon, lanmour, lavi fanmir, lazwa, ki mannyer pour rezourd bann problenm e menm konsernan bi lavi li menm. Me lekel ki dan sa pli bon pozisyon pour donn bann gidans pratik e rezonnab dan tou sa bann domenn apard Zeova, Kreater limanite?

 Pour donn en legzanp: Ler ou aste en nouvo lekipman, tel ki en kamera oubyen en konpiter, ou ekspekte ki i annan en liv lenstriksyon avek pour eksplike konman pour pli byen servi li. Labib i kapab ganny konpare avek sa liv lenstriksyon. I en gid ki Bondye, sa enn ki’n donn nou lavi in donn nou. Sa ‘liv lenstriksyon’ i eksplike ki imen i devret pe fer e ki mannyer zot devret servi sa gid pour ki zot kapab ganny en pli bon rezilta.

Parey nenport ki liv lenstriksyon ki’n ganny byen ekrir, Labib i averti son bann lekter konsernan bann pratik ki kapab gat nou lavi. Bann konsey oubyen solisyon pli fasil ki lezot i donnen i kapab paret atiran, me pa i fer plis sans pour krwar ki nou pou ganny sa pli bon rezilta e evit problenm si nou swiv gidans nou Kreater?

Menm si Zeova i donn gidans ek lenstriksyon, i pa fors nou pour aksepte zot. O kontrer, akoz i kontan nou e i anvi ed nou, i dir nou: “Mwan Zeova, mon ou Bondye, sa Enn ki pe ansenny ou pour ou prop byenfe, sa Enn ki pe fer ou mars dan sa semen ki ou devret marse. Si selman ou byen atantif anver mon bann komannman! Alor ou lape pou vin zis parey en larivyer e ou ladrwatir parey bann laroul dan lanmer.” (Izai 48:17, 18) An bref, si nou pran aker bann gidans Bondye, nou pou viv byen. Andotmo, pour viv byen e pour ere nou bezwen Bondye.

Nou bezwen solisyon pour nou problenm dan lavi

Serten i santi ki zot pa bezwen Bondye akoz zot vwar en kantite keksoz dan lavi ki zot pa konpran e sa i fer ki i difisil pour zot krwar ki i annan en Bondye lanmour. Par egzanp, zot kapab demande: ‘Akoz bann bon dimoun i bezwen soufer?’ ‘Akoz serten pti baba inosan i ne diformen?’ ‘Akoz lavi i sitan enzis?’ I vre, sa i bann kestyon serye e si nou ganny larepons satisfezan pour zot, i kapab annan en gro lefe lo nou lavi. Me dan plas taye pour blanm Bondye pour sa bann problenm, annou vwar ki mannyer Parol Bondye, Labib, i kapab ed nou konpran sa size.

Dan Zenez sapit trwa, nou trouv sa resi kot Satan ti fer krwar ki i ti en serpan e i ti esey fer sa premye koup imen dezobeir komannman Zeova pour pa manz fri lo pye konnesans bon e move. Satan ti dir Ev: “Sirman, zot pa pou mor. Akoz Bondye i konnen, ki sa zour menm ki zot pou manz sa fri, zot lizye pou sirman ouver e sirman zot pou vin parey Bondye, zot pou konn sa ki bon ek sa ki move.”​—Zenez 2:16, 17; 3:4, 5.

Atraver sa parol, Satan pa ti pe zis akiz Bondye konman en manter, me i ti pe osi dir ki lafason ki Bondye i dirize i enzis. Dyab ti pe dir ki si bann imen ti ekout li, keksoz ti pou mars pli byen pour zot. Sa bann problenm pa ti pou kapab ganny rezourd vitman. Zeova ti deside les letan pase pour ki tou dimoun i kapab vwar si sa lakizasyon ki ti’n ganny fer kont li ti vre oubyen fo. Annefe,  Bondye ti pe donn Satan ek bann ki ti lo son kote sa loportinite pour prouve si imen i kapab viv byen san Bondye.

Ki larepons ou ti pou donnen pour lakizasyon Satan? Eski imen i kapab viv byen e diriz zot lekor byen san Bondye? Tou sa soufrans, lenzistis, maladi ek lanmor, ensi ki tou bann krim, standar moral ki pe degrade, lager, zenosid ek lezot atrosite ki’n ravaz limanite pour plizyer syek i san dout montre ki zefor zonm pour diriz zot prop lekor san Bondye pa’n abouti dan nanryen. Dan plas ansenny nou ki Bondye i responsab pour problenm limanite, Labib i montre son rezon prensipal: “Zonm in domin zonm e sa in fer ditor zot menm.”​—Eklezyast 8:9.

Anliny avek sa, pa i kler ki nou bezwen tourn ver Bondye, pa zis pour ganny larepons bann kestyon ki pe trouble imen, me osi pour ganny solisyon! Ki Bondye pou fer?

Nou bezwen led Bondye

Pour bokou letan dimoun in anvi ganny libere avek maladi, lavyeyes ek lanmor. Zot in depans en kantite letan, zefor ek resours pour ki zot pa malad, vyeyi e mor, me sa pa’n abouti dan nanryen. Serten in esey reste zenn par bwar diferan kalite latizann, fer bokou legzersis oubyen rod en landrwa kot swadizan dimoun i viv pli lontan (Shangri-la). Tou sa bann ekspektasyon in tonm dan delo.

Bondye i anvi ki imen i viv byen e ere. Sa ti son plan depi o konmansman kan i ti kre imen e i pa’n zanmen oubliy son plan. (Zenez 1:27, 28; Izai 45:18) Zeova i asir nou ki napa nanryen ki pou kapab anpes li akonpli son plan. (Izai 55:10, 11) Labib i koz lo promes ki Bondye in fer pour refer later vin en Paradi parey sa ki sa premye koup in perdi. Dan dernyen liv Labib nou vwar sa parol: “I [Zeova] pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.” (Revelasyon 21:4) Ki mannyer Bondye pou fer later vin en paradi e ki mannyer nou kapab benefisye avek sa promes?

Zezi Kri, Garson Bondye ti ansenny son bann disip pour priye ki lavolonte Bondye i ganny fer. Bokou i konn oubyen repet sa lapriyer ki serten i apel li Lapriyer Notreper. Sa lapriyer i dir: “Nou Papa ki dan lesyel. Ki ou non sen i ganny glorifye; Ki ou Renny i ganny etabli; Ki ou lavolonte i ganny akonpli lo later parey dan lesyel.” (Matye 6:9, 10) Wi, Rwayonm Bondye i sa sel mwayen ki Zeova pou servi pour retir move konsekans bann gouvernman imen e anmenn sa nouvo lemonn drwat ki i’n promet. * (Danyel 2:44; 2 Pyer 3:13) Ki nou bezwen fer pour benefisye avek promes Bondye?

Zezi ti fer resorti en pa enportan e senp ki nou  bezwen pran: “Ou’n donn li pouvwar lo tou dimoun pour donn lavi eternel tou bann ki ou’n donn li. Savedir ki zot konn ou konman sel vre Bondye, ek Zezi-Kri ki ou’n anvoye.” (Zan 17:2, 3) Wi, avek led Bondye i posib pour ganny lavi eternel dan sa nouvo lemonn ki’n ganny promet. Sa lespwar i kapab donn ou en lot rezon pour reponn wi pour sa kestyon, Eski nou bezwen Bondye?

I lemoman pour rod Bondye

De mil an pase kot Lareopaz oubyen Montanny Mars, Atenn, zapot Pol ti dir sa lo Bondye avek bann Atenyen ki ti krwar nenport kwa: “Se limenm ki donn tou dimoun, lavi, respirasyon ek tou keksoz. Parski, ‘Atraver li nou ganny lavi, nou kapab mouvmante e nou egziste.’ Sanmenm sa ki dayer serten parmi zot poet in dir: ‘Parski nou osi nou son bann zanfan.’”​—Akt 17:25, 28.

Sa ki Pol ti fer resorti avek bann Atenyen i ankor leka ozordi. Nou Kreater i donn nou ler pour respire, manze pour manze, delo pour nou bwar. Nou zis pa ti pou kapab viv san sa bann bon keksoz ki Zeova in donnen pour soutenir nou. Me akoz Bondye i kontinyen donn tou dimoun sa bann keksoz, ki swa zot pran li kont oubyen non? Pol ti dir ki i fer sa pour ki “zonm i rod li, e esey antre an kontak avek li, e ki an tatan zot a trouv li. An realite i pa lwen avek sakenn parmi nou.”​—Akt 17:27.

Eski ou ti a kontan konn Bondye pli byen, setadir, konn plis lo son plan ek son konsey pour nou kapab viv byen la konmela e pour touzour? Si wi, ou ganny ankouraze pour koz avek sa dimoun ki’n donn ou sa magazin oubyen kontakte bann dimoun ki pibliy sa magazin. Zot pou kontan pour ed ou.

[Not anba lo paz]

[Portre lo paz 7]

Bondye i anvi ki imen i ere la konmela e pour touzour

[Portre lo paz 4]

Parey en liv lenstriksyon, Labib i gid nou dan lavi

[Ekstre lo paz 5]

“Mwan Zeova, mon ou Bondye, sa Enn ki pe ansenny ou pour ou prop byenfe, sa Enn ki pe fer ou mars dan sa semen ki ou devret marse. Si selman ou byen atantif anver mon bann komannman! Alor ou lape pou vin zis parey en larivyer e ou ladrwatir parey bann laroul dan lanmer.”​—Izai 48:17, 18

[Portre lo paz 6]

Dan Labib nou kapab ganny gidans ek led ki nou bezwen