LO KOUVERTIR | RWAYONM BONDYE—AKOZ I ENPORTAN POUR OU?

Akoz nou devret enterese avek Rwayonm Bondye?

Plizyer milyon dimoun dan lemonn i met zot konfyans dan Rwayonm Bondye. Zot swiv legzanp Zezi ki ti ansenny son bann disip pour priye: “Ki ou rwayonm i vini. Ki ou lavolonte i ganny fer lo later.”​—Matye 6:10, King James Version.

Menm si bokou dimoun i vreman enterese avek Rwayonm Bondye, laplipar larelizyon pa sitan enterese avek sa Rwayonm. Konsernan Rwayonm Bondye, Herbert Wells ti remarke ki Zezi ti donn “en gran lenportans . . . sa lansennyman lo sa Rwayonm lesyel” e pourtan pour “laplipar larelizyon Kretyen . . . sa lansennyman pa sitan enportan.”

Konpare avek sa bann larelizyon Kretyen, Rwayonm Bondye i vreman enportan pour Temwen Zeova. Par egzanp, nou piblikasyon prensipal, ki ou pe lir, i ganny pibliye dan 220 diferan langaz. Preski 46 milyon kopi Latour Veyer i ganny pibliye tou le mwan e sa i fer ki i sa piblikasyon ki ganny distribye plis dan lemonn antye. Ki son mesaz prensipal? Remark son tit antye: Latour Veyer pe anons Rwayonm Zeova. *

Akoz Temwen Zeova i fer sa kantite zefor pour anons Rwayonm Bondye? En rezon i akoz nou krwar ki Rwayonm Bondye i sa mesaz prensipal ki ganny trouve dan sa liv pli enportan, Labib. Deplis, nou konvenki ki Rwayonm Bondye i sa sel solisyon pour sa bann problenm ki imen pe fer fas avek ozordi.

Temwen Zeova i diriz latansyon lo Rwayonm Bondye par fer bokou zefor pour swiv legzanp Zezi. Ler i ti lo later, Rwayonm Bondye ti sa keksoz pli enportan dan son lavi ek minister. (Lik 4:43) Akoz sa Rwayonm ti sitan enportan pour Zezi? Akoz sa i enportan pour ou? Nou envit ou pour egzamin larepons ki Labib i donnen dan sa bann lartik swivan.

[Not anba lo paz]