Eski nou kapab konpran Bondye?

“I enposib pour konpran Bondye.”​—Philo sorti Alexandri en filozof dan premye syek.

“[Bondye] pa lwen avek sakenn parmi nou.”​—Sol sorti Tars pe adres bann filozof dan premye syek Atenn.

ANMEZIR ki ou lir sa de komanter, lekel ki pli byen eksprim ou pwennvi? Bokou dimoun in trouv rekonfor e santi zot atire par bann parol Sol sorti Tars ki ti osi apel zapot Pol. (Akt 17:26, 27) I annan lezot lasirans dan Labib ki parey sa enn. Par egzanp, dan en lapriyer ki Zezi ti fer ti annan sa lasirans ki bann ki swiv li i kapab konn Bondye e resevwar son benediksyon.​—Zan 17:3.

Par kont, bann filozof parey Philo ti annan en pwennvi diferan. Zot dir ki nou pa kapab konn Bondye akoz i konpletman enposib pour konpran li. Kote laverite i ete?

Labib i admet fransman ki i annan serten keksoz konsernan Bondye ki difisil pour imen konpran. Par egzanp, nou pa kapab mezire, kalkile oubyen konpran ki kantite letan Kreater in egziste, ni konpran grander son lentelizans ek lasazes. Zot senpleman depas tou konpreansyon imen. Par kont, sa bann laspe konsernan Bondye pa anpes nou konn li. Anfet, kan nou medit lo sa bann keksoz, sa i kapab ed nou “apros avek Bondye.” (Zak 4:8) Annou konsider serten legzanp bann keksoz ki paret enposib pour konpran. Apre nou pou vwar bann laspe Bondye ki nou vreman kapab konpran.

 Ki laspe ki enposib pour konpran?

LEGZISTANS ETERNEL BONDYE: Labib i dir nou ki Bondye in egziste “depi avan e pour touzour.” (Psonm 90:2) Andotmo, Bondye napa ni konmansman e i pou napa ni finisyon. Dapre pwennvi imen, “kantite lannen ki Bondye in egziste i depas tou konpreansyon.”​—Zob 36:26.

Ki mannyer ou benefisye: Bondye in promet ou lavi eternel si ou vreman aprann konn li. (Zan 17:3) Ki mannyer nou pou kapab met konfyans dan promes lavi eternel, si Bondye li menm pa’n viv pour touzour? Zis sa “Lerwa eternel” ki kapab akonpli en tel promes.​—1 Timote 1:17.

LESPRI BONDYE: Konsernan Bondye, Labib i dir “Personn pa kapab konpran son konprenezon” akoz son panse i pli siperyer ki sa ki pour nou. (Izai 40:28; 55:9) I apropriye ki Labib i demann sa kestyon pour fer nou reflesir: “Lekel ki’n konpran lespri Senyer pour kapab enstri li?”​—1 Korentyen 2:16, English Standard Version.

Ki mannyer ou benefisye: Bondye i kapab ekout plizyer milyon dimoun priye an menm tan. (Psonm 65:2) I menm remark sak sren ki tonm ater. Eski en zour lespri Bondye pou tro plen, ki sa pou anpes li remark ou e ekout ou bann lapriyer? Pa ditou, akoz son lespri napa limit. Deplis, ou “vo bokou plis ki en kantite sren!”​—Matye 10:29, 31.

FASON AZIR BONDYE: Labib i dir en ki zonm pa kapab “zanmen dekouver travay ki sa vre Bondye in fer depi o konmansman ziska lafen.” (Eklezyast 3:11) Alor, nou pa pou zanmen konn tou lo Bondye. Nou pa “kapab konpran” sa lasazes ki motiv Bondye pour azir. (Romen 11:33) Me, Bondye i anvi revel son fason azir avek bann ki anvi fer li plezir.​—Amos 3:7.

Ki mannyer ou benefisye: Si ou lir e etidye Labib, ou pa pou zanmen aret aprann bann nouvo keksoz lo Bondye ek son fason azir. Sa i vedir ki nou kapab vin pli pros avek nou Papa dan lesyel pour touzour.

Sa ki ou kapab konnen

Zis akoz nou pa kapab konpran tou lo Bondye, sa pa vedir ki nou pa kapab konn li ditou. Dan Labib i annan en kantite lenformasyon ki ed nou konn Bondye pli byen. Annou vwar serten legzanp:

NON BONDYE: Labib i dir nou ki Bondye in donn son lekor en non. I dir: “Mwan, mon Zeova. Sa i mon non.” Non Bondye i aparet 7,000 fwa dan Labib, plis ki tou lezot non.​—Izai 42:8.

Ki mannyer ou benefisye: Dan son model lapriyer Zezi ti dir: “Nou Papa ki dan lesyel ki ou non sen i ganny glorifye.” (Matye 6:9) Eski ou kapab servi non Bondye dan ou lapriyer? Zeova i pare pour sov tou dimoun ki demontre en respe apropriye pour son non.​—Romen 10:13.

LANDRWA KOT BONDYE I RESTE: Labib i dir nou ki i annan en lemonn spirityel, kot bann lanz ki annan en lekor spirityel i egziste e enn ki fizik kot later ek liniver i ete. (Zan 8:23; 1 Korentyen 15:44) Sa mo “lesyel” dan Labib i souvan refer avek sa lemonn spirityel. Kreater i “reste” dan sa lemonn spirityel, setadir “lesyel.”​—1 Lerwa 8:43.

Ki mannyer ou benefisye: Aprezan ou kapab ganny en portre pli kler lo Bondye. I pa zis  en lafors ki partou e dan tou keksoz. Zeova i en Personnaz reel ki reste dan en vre landrwa. Toudmenm, “napa nanryen ki kasyet devan Bondye.”​—Ebre 4:13.

PERSONNALITE BONDYE: Labib i dir en ki Zeova i annan bann kalite atiran. “Bondye i lanmour.” (1 Zan 4:8) I pa zanmen koz manti. (Tit 1:2) I pa fer lapliferans, i pran pitye, annan konpasyon e pa ankoler vitman. (Egzod 34:6; Akt 10:34) I kapab sirprann en kantite dimoun ki Kreater i anvi annan en “bon lanmitye” avek bann ki annan respe pour li.​—Psonm 25:14.

Ki mannyer ou benefisye: Ou kapab vin zanmi avek Zeova. (Zak 2:23) Alor, anmezir ki ou konn plis lo personnalite Zeova, ou pou kapab pli byen konpran bann resi Labib.

“ROD LI”

Labib i donn en portre pli kler lo Zeova. I vreman fasil pour konpran. Anfet, Kreater i anvi ki nou konn li. I fer sa promes dan Labib: “Si ou rod li, i pou les ou vwar li.” (1 Kronik 28:9) Akoz ou pa aprann konn Bondye par lir e medit lo bann resi Labib? Si ou fer sa, Labib i promet ki Bondye “i ava apros avek [ou].”​—Zak 4:8.

Ou kapab demande, ‘Vi ki mon pa kapab konpran tou keksoz lo Kreater, ki mannyer mon kapab vin son zanmi?’ Par egzanp: Eski pli bon zanmi en sirizyen i bezwen annan degre dan domenn medikal? Pa ditou! Son zanmi i kapab annan en travay konpletman diferan. Kantmenm sa, i posib pour zot zanmi avek kanmarad. Sa ki pli enportan i ki zanmi sa sirizyen i konn personnalite sa sirizyen, sa ki i kontan e sa ki i pa kontan. Pareyman, ou kapab aprann atraver Labib ki kalite personnaz Zeova i ete e se egzakteman sanmenm ki ou bezwen konnen pour kapab devlop en bon lanmitye avek li.

Labib pa donn nou bann lenformasyon anler anler lo Kreater, me i donn nou zis sa ki nou bezwen pour konn Bondye. Eski ou ti a kontan konn plis lo Zeova? Bann Temwen Zeova i ofer ou en letid Labib gratwit regilyerman. Nou envit ou pour kontakte Temwen Zeova dan landrwa kot ou reste oubyen al lo nou sit Enternet, www.pr2711.com.

[Ekstre lo paz 10]

Nou pa kapab mezire, kalkile oubyen konpran ki kantite letan Kreater in egziste, ni konpran grander son lentelizans ek lasazes

[Portre lo paz 11]

Si ou lir e etidye Labib, ou pa pou zanmen aret aprann bann nouvo keksoz lo Bondye ek son fason azir