Non. Labib i montre ki nou devret fer lapriyer zis avek Bondye, o non Zezi. Zezi ti dir son bann disip: “La ki mannyer zot devre priye: Nou Papa ki dan lesyel! Nou demande ki ou non sen i ganny glorifye.” (Matye 6:9, Labib an Kreol Seselwa) I pa ti zanmen dir zot fer lapriyer avek bann sen, lanz oubyen en lot personnaz apard ki Bondye.

 Zezi ti dir avek son bann disip: “Mwan menm semen, laverite e lavi. Personn pa kapab ariv kot mon Papa san pas par mwan.” (Zan 14:6, Labib an Kreol Seselwa) Zis Zezi ki annan drwa pled pour nou.​—Ebre 7:25.

Eski mon kapab fer lapriyer avek Bondye ek bann sen an menm tan?

 En keksoz ki Bondye ti dir dan sa dis komannman i: “Mwan SENYER ou Bondye, mon en Bondye zalou.” (Egzod 20:5, Labib an Kreol Seselwa) Dan ki fason Bondye Zeova i “zalou”? Dan tradiksyon New American Bible i annan en not avek sa verse ki dir i “demande pour ganny en ladorasyon zis pour li tousel.” Bondye i dir ki zis li tousel ki devret ganny adore e lapriyer ki en form ladorasyon, i devret ganny fer zis avek li.​—Izai 48:11.

 Nou pe ofans Bondye si nou fer lapriyer avek okenn lezot personnaz, enkli bann sen oubyen lanz. Letan zapot Zan ti pe esey ador en lanz, sa lanz ti aret li e dir: “Non, pa fer sa! Mon en serviter parey ou ek ou bann frer ki gard temwannyaz Zezi. Ador Bondye.” (Revelasyon 19:10, Labib an Kreol Seselwa).