Пӗрле пурӑнма пуҫланӑ хыҫҫӑн мӑшӑрсем ҫӗнӗ йывӑрлӑхсемпе тӗл пулма пултараҫҫӗ. Ҫакӑ упӑшкипе арӑмӗ тӗрлӗрен шухӑшланӑран, пӗр япала ҫинех тата пурнӑҫ ҫине пӗрешкел пӑхманран пулма пултарать. Е йывӑрлӑхсем лару-тӑру сасартӑк улшӑннине пула тата ытти сӑлтавсене пула та сиксе тухаҫҫӗ.

Паллах, йывӑрлӑхсене татса пама пур чухне те ҫӑмӑл мар, анчах Библи пире вӗсене ҫӗнтерме хавхалантарать (Матфей 5:23, 24). Библири принципсемпе усӑ курни йывӑрлӑхсене татса пама питӗ лайӑх пулӑшать.

БИБЛИРЕ МӖН КАЛАНӐ? «Калаҫмалли вӑхӑт» та пур (Екклесиаст 3:1, 7). Йывӑрлӑха сӳтсе явма вӑхӑт уйӑрӑр. Хӑвӑр мӗн шухӑшланине тата хӑвӑра мӗн хумхантарнине мӑшӑра пӗр пытармасӑр каласа парӑр. Мӑшӑра яланах «чӑннине калӑр» (Эфес 4:25). Ӑшра питӗ хытӑ тарӑхсан та, хӑвӑра алра тытма тӑрӑшӑр. Йӑвашшӑн хуравлани пире тавлашса кӗрсе кайма памӗ (Ытарӑшсем 15:4; 26:20).

Мӗнпе те пулин килӗшмесен те, ырӑ кӑмӑллӑ пулӑр, мӑшӑру эсир ӑна юратнине тата хисепленине яланах курса тӑтӑр (Колоссӑ 4:6). Хирӗҫӳсене май килнӗ таран хӑвӑртрах татса пама тӑрӑшӑр, ним чӗнмесӗр ан ҫӳрӗр (Эфес 4:26).

УСӐЛЛӐ КАНАШСЕМ

• Йывӑрлӑха сӳтсе явма меллӗ вӑхӑт суйласа илӗр

• Мӑшӑр мӗн каланине итленӗ чухне ӑна пӳлес килсен те, хӑвӑра тытса чарма тӑрӑшӑр. Сире те калама черет ҫитӗ

БИБЛИРЕ МӖН КАЛАНӐ? «Пӗр-пӗрне тӑванла, чунтан юратӑр; пӗр-пӗрне хӑвӑртан асла хурса хисеплӗр» (Рим 12:10). Эсир мӑшӑра мӗнле итлени пысӑк пӗлтерӗшлӗ. Вӑл мӗнле шутланине ӑнланма тӑрӑшӑр, «хӗрхенекен кӑмӑллӑ... йӑваш ӑслӑ пулӑр» (1 Петр 3:8; Иаков 1:19). Итленӗ пек ҫеҫ ан тӑвӑр. Май пулсан ӗҫе пӑрахӑр та мӑшӑр мӗн каланине тимлӗн итлӗр е ҫак ыйтӑва каярахпа сӳтсе явма сӑпайлӑн сӗнӗр. Эсир иксӗрӗн те пӗр тӗллев пулнине тата хӑвӑр пӗр-пӗринпе ӑмӑртманнине асра тытатӑр пулсан, сире «чунупа ҫилленме ан васка» канаша тытса тӑма ҫӑмӑлрах пулӗ (Екклесиаст 7:9).

УСӐЛЛӐ КАНАШСЕМ

• Мӑшӑр мӗн калани килӗшмест пулсан та, унӑн сӑмахӗсене тимлӗр

• Мӑшӑрӑн туйӑмӗсене ӑнланма тӑрӑшӑр. Унӑн пит-куҫӗ тата алли мӗнле выляннине, вӑл мӗнле сасӑпа каланине сӑнӑр

БИБЛИРЕ МӖН КАЛАНӐ? «Кирек епле ӗҫӗн те тупӑшӗ пур, пушӑ сӑмах ҫапни вара сиен ҫеҫ кӳрет» (Ытарӑшсем 14:23). Йывӑрлӑха мӗнле татса памалли пирки калаҫса татӑлни ҫеҫ ҫителӗксӗр. Йышӑнӑва пурнӑҫа кӗртме тӑрӑшмалла. Ҫакна тума вара сахал мар вӑй хумалла пулӗ, анчах та каярахпа ҫакӑ пысӑк усӑ парӗ (Ытарӑшсем 10:4). Эсир пӗрле, килӗштерсе ӗҫлетӗр пулсан, сире «ырӑ пайта» пулӗ (Екклесиаст 4:9).

УСӐЛЛӐ КАНАШСЕМ

• Йывӑрлӑха татса парас тесе сирӗнтен кашни мӗн тӑвасси пирки калаҫса татӑлӑр

• Хӑвӑр мӗнле ҫитӗнӳсем тунине вӑхӑтӑн-вӑхӑтӑн пӑхса тухӑр