Mae fideos ein cynadleddau rhanbarthol yn cyffwrdd ein calonnau ac yn ein helpu ni i ddeall yr hyn mae’r Beibl yn ei ddysgu yn well. Mae gan Gynhadledd Ranbarthol 2020 “Llawenha Bob Amser!” 114 fideo, gan gynnwys y 43 anerchiad gan aelodau’r Corff Llywodraethol a’u helpwyr. A ydych chi erioed wedi meddwl faint o ymdrech a chost sydd ynghlwm wrth gynhyrchu’r fideos hyn?

 Defnyddiodd bron i 900 o’n brodyr a’n chwiorydd o bedwar ban byd eu hamser a’u sgiliau i helpu i gynhyrchu’r rhaglen hon. Rhwng pawb, fe wnaethon nhw dreulio bron i 100,000 o oriau ar y prosiect dros gyfnod o ddwy flynedd. Roedd hyn yn cynnwys y 70,000 o oriau oedd eu hangen i gwblhau’r ddrama Feiblaidd 76 munud Nehemeia: Llawenydd Jehofa Yw Dy Nerth.

 Fel gallwch chi ei ddychmygu, roedd ’na gostau sylweddol ynghlwm wrth edrych ar ôl costau byw y gwirfoddolwyr hunanaberthol, yn ogystal â’r cymorth technegol, yr offer, a’r cyfleusterau angenrheidiol ar gyfer gorffen y gwaith.

 “Mae Pwyllgor Addysgu’r Corff Llywodraethol yn awyddus iawn i gael amrywiaeth o ddiwylliannau a lleoliadau yn ein fideos. Mae hyn yn helpu i adlewyrchu natur ryngwladol ein brawdoliaeth,” meddai Jared Gossman, sy’n gweithio gyda Gwasanaethau Sain a Fideo. “I gyrraedd y nod hwn, gweithiodd 24 tîm mewn 11 o wahanol wledydd gyda’i gilydd ar y prosiect hwn. Mae ymdrech fyd-eang o’r fath yn gofyn am dipyn go lew o adnoddau, cynllunio, a chydlynu.”

 Mae angen offer a setiau arbenigol er mwyn cynhyrchu llawer o’n fideos. Er enghraifft, cafodd y setiau ar gyfer Nehemeia: Llawenydd Jehofa Yw Dy Nerth eu hadeiladu yn stiwdio Mount Ebo ger Patterson, Efrog Newydd, UDA. Er mwyn gwneud y gorau o gyfraniadau gwerthfawr a rhoi gwedd hanesyddol gywir i’r fideo, adeiladodd y brodyr ddarnau set ysgafn wedi’u dylunio i efelychu waliau Jerwsalem gynt. Cafodd pob darn ei greu allan o ffrâm bren chwe metr (20 tr) o uchder, wedi ei orchuddio â sbwng wedi ei beintio i edrych fel carreg. Gallai’r “waliau” hyn gael eu symud ar gyfer gwahanol olygfeydd, felly roedd angen llai o setiau. Er hynny, roedd angen bron $100,000 (UD) i adeiladu setiau ar gyfer y ddrama yn unig. a

 Mae gwybod y manylion hyn yn cynyddu ein gwerthfawrogiad am raglen cynhadledd ranbarthol eleni. Rydyn ni’n sicr bydd yr ymdrech ynghlwm wrth gynhyrchu’r rhaglen hon yn dod â bloedd o fawl i Jehofa o bedwar ban byd. Diolch am eich cyfraniadau hael i’r gwaith byd-eang drwy donate.pr2711.com a ffyrdd eraill.