ˈˈTANBHOSÜ ˗wɔn ˗kun ˈˈgbɩɩ˗ ꞊dedewo Izraɛdhömɛn ˗nu ˗bha wɔkɔ ˈgü. Biblö ˗yö mɛn ˗nu ˈwo kun ˈˈtan bho ˗ni ˈgü waa mɛn ˗nu ˈwo kun ˈˈtan ˗bho ˗a ˈka ˗pë ˗nu zë ˗ni ˈgü bhë ˗an ˗wɔn ꞊blɛɛ ˗gɛnɲan ˈka ꞊va. ˗Wo ˗nu ˈwo ˗bɛnzësü ˈka Biblö ˈgü, ˗an ꞊vadhɛ ˗kun ˈˈtan ˈka. ˗A ˈwɔnzuan ˈnën ˗tɔ Psaumes, Chant de Salomon waa Lamentations ˈsëëdhɛ be ˗nu. ˈSëëdhɛ ˗be do ˈö ˈˈtʋ̈ŋ ˈwo Biblö ˗bɛnzë ˗a ˈka ˗a ꞊blɛɛ bhë, ˗ya ˗pö Biblö ˗ya ˗zɔn ˈˈpuu ˈka ꞊dhɛ Izraɛdhömɛn ˗nu ˗wo ˈˈtan ˗bho ˈwɔn ꞊vadhɛ ˈgü wo ˗bha tosɛta ˈgü.

ˈPë ˈˈtan ˈdhö˗ ˈka Izraɛdhömɛn ˗nu ˗bha ˗tosɛta ˈgü.  Izraɛdhömɛn ˗nu ˗wo ˈˈtan ˗bho ˈö ˗kɔ ˈwo˗ ˈka wo ˗de ˈgü, ˈwo˗ ꞊blɛɛ. (Is. 30:29) Dhebɔ ˗nu ˗wo ꞊bhaŋ ˈnën ˈsɛɛn˗ ˗nu ˗zë ˈwo ˗tan bho zuʋ̈gblüdhi ˈka, ˈwo ˈˈtan ˗kë ˗gblüdë ˗dɛɛ ˗ya ˈˈtʋ̈ŋ ˈka ɛɛnˈˈ kö ˗gblü ˗ya dhi ˈˈsodha ˗nu ˗gɔ, ɛɛnˈˈ ˈzü ˗Zlan ˗dhɔkë ˈwlaan˗ ˗nu ˗ta. (Juges 11:34; 1 Sam. 18:​6, 7; 1 Rois 1:​39, 40) Mɛn ˈbha ˗wɔn ˗ya kë ˗wëë ˗ya bɔ ˗an ˗ta, Izraɛdhömɛn ˗nu ˗wo ˈˈtan ˗bho. (2 Chron. 35:25) ˈYaa za ˈgü ꞊dhɛ ˈˈtan ˗nu ˗dhɔ ˗yö ˗kun Izraɛdhömɛn ˗nu kë ˗ni ˈgü ꞊dedewo.

ˈˈTan ˗nu ˗dhɔ ˗kun Izraɛdhö ˗gblüdë ˗nu kë ˗ni ˈgü. ˈˈTʋ ˗to ˈˈtan ˗nu ˗bha ˗sü ˗dhɔ ˗kun Izraɛdhö ˗gblüdë ˗nu kë ˗ni ˈgü ꞊dedewo. ˗A ˈwɔnzuan ˈnën ˗tɔ ˗gblüdë Saidhö ˗yö Davi ˗dhɛ ö ˗gɔ ˈkɔɔ kö ˗yö ˈˈtan bho ö ˗bha ˈka. (1 Sam. 16:​18, 23) ˈDhɛ Davi ˗de ˈpö ˈö ˗kë ˗gblüdë ˈka, ˗yö ˈˈtan ˗bho ˗a ˈka pë ˗nu ˗yökë ˈö ˈˈtan ˗sɛŋbɔ ˗nu ˗bɛnzë, ˈö mɛn ˗nu ˗ya kö ˗wo ˈˈtan bho Zoova ˗dhɔkëgükɔ ˈgü. (2 Chron. 7:6; Amos 6:5) ˗Gblüdë Sadhomɔn ˗yö gɔɔn˗ ˗nu waa dhebɔ ˗nu ˗sü ˈˈtanbhomɛn ˗nu ˈka ö ˗gɔ ˈkɔɔ.—Eccl. 2:8.

ˈˈTanbhosü ˈö kun ˗Zlan ˗dhɔkëdhɛ ˈgü. Pë ˈbha ˈö˗ ˗wɔn kun ˈˈgbɩɩ˗ Izraɛdhömɛn ˗nu ˗gɔ ˈyö ˗tɔ ˗wo ˗bɔ ˈpö ˈˈtan ˗nu ˗ta ˈwo Zoova ˗dhɔkë. ˗A ˗wɔn ˈgü, mɛn 4.000 ˈnën ˈwo kun ˈˈtan bho ˗ni ˈgü ˗Zlan ˗dhɔkëgükɔ ˈgü Zedhizadhɛmö. (1 Chron. 23:5) ˗Wo pë ˗nu ˈwo ˗kë ꞊dhɛ ˈˈtruu gɔn ˗nu, ˈˈtruu ˈnën ˗nu, ˗an ˗piö ˈö ˈwo ˈˈföŋ ˈˈpɛn ˗nu zë. (2 Chron. 5:12) ˈˈKɛɛ trʋʋbhomɛn ˈˈgbɩɩ˗ ˗nu ˈwo ˈˈdhʋ̈, ˗wo do ˈwaa ˈnën ˈwo Zoova ˗dhɔkë ˈˈtanbhosü ˈka. Izraɛdhömɛn ꞊vadhɛ ˗wo ˈˈtan ˗nu ˗bho kö ˗wo ˈdho ˗ni ˈgü ˈwlaan˗ ˗ta Zedhizadhɛmö. ˗A ˈˈtan ˗nu ˈwo ˈˈdhʋ̈ ˗wo ˗kun ˗an ˗dhɛ ˗ni ˈgü ˗dho ˈˈdhuŋ ˗sü ˈˈtan. (Ps. 120–134) Zuifö ˗nu ˗bha ˈsëëdhɛ ˗be do ˗ya ˗pö ꞊dhɛ Izraɛdhömɛn ˗nu ˗wo Psaume ˗nu a ˗bho Pakö ˗bhöpë ˗bhö ˈˈtʋ̈ŋ ˈka.

ˈˈTan ˗wɔn ˗yö ꞊kun ˈˈgbɩɩ˗ ˗kplawo ˗Zlan ˗dhɔkëmɛn ˈwo ꞊dɛɛ ˗an gɔ. (Zak. 5:13) ˈˈTanbhosü ˗yö kwa bha ˗Zlan ˗dhɔkë ˗kɔ do ˈka. (Efɛ. 5:19) ˈˈTan ˗bho Zoova ˈˈpiʋ̈ ˗sü ˗yö kwaa kwa ꞊dhegblü ˗nu kwa ˗kɔ ˗kë ˈwɔn do ˗bha. (Kodh. 3:16) ˈKwa ˈˈtan bho ɛɛnˈˈ ˈkwa kwa ˈˈtʋ̈ ˈto ˗a ˗bha, ˗yö ꞊faan ˗nu kwa ˗dhɛ ˈö ˈkwa kwa ˗bha ˈwɔn ˈˈgbɩɩ˗ ˗nu kun kwa ˗bha. (Këw. 16:25) ˈˈTanbhosü ˗ya ˗kë ˈö ˈkwa˗ ˗zɔn ꞊dhɛ Zoova ˗dhɔ ˗yö kwa ˗kë ˈö ˈkwa kwa ˗zoyö ˗a ˗dhɛ.